އަންނަ އޮކްޓޯބަރު މަހު ރާއްޖޭގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ވާދަނުކުރަން ބޫޓާނުން ނިންމައިފިއެވެ.
ސާފް ޗެމްޕިއަންޝިޕް ބޭއްވުމަށް އެންމެ ފުރަތަމަ ތާވަލުކުރީ މިދިޔަ އަހަރުގެ ސެޕްޓެމްބަރު މަހު ބަންގްލަދޭޝްގައެވެ. އެކަމަކު ކޮވިޑް-19 ގެ ނުރައްކާ ބޮޑުވުމާ ގުޅިގެން މުބާރާތް މި އަހަރަށށް ސެޕްޓެމްބަރަށް ފުރަތަމަ ފަސްކުރިއިރު، އެ ފަހަރުވެސް ބޫޓާނުން ވަނީ ކޮވިޑާ ގުޅިގެން މުބާރާތުގައި ވާދަނުކުރަން ނިންމާފައެވެ.
ބަންގްލަދޭޝްއިން މުބާރާތް ބޭއްވުމުގެ ވިސްނުން ދޫކޮށްލުމާއެކު ރާއްޖެ އާއި ނޭޕާލުން ސާފް ޗެމްޕިއަންޝިޕް ބާއްވަން ބިޑުކުރިއިރު، މި މަހުގެ ނުވަވަނަ ދުވަހު އޮންލައިންކޮށް ބޭއްވި ސައުތު އޭޝިއަން ފުޓްބޯލް ފެޑެރޭޝަން (ސާފް) ގެ ބައްދަލުވުމުގައި ވަނީ މި އަހަރުގެ މުބާރާތް ރާއްޖޭގައި ބާއްވަން ފާސްކޮށްފައެވެ. އަދި މި ބައްދަލުވުމުގައި ވަނީ މުބާރާތުގައި ވާދަކުރުމާ މެދު އަލުން ގޮތެއް ނިންމަން ބޫޓާނަށް މުހުލަތެއް ދީފައެވެ.
ރިޕޯޓުތައް ބުނާ ގޮތުން ބޫޓާނުން މިހާރު ވަނީ މުބާރާތުގައި ވާދަނުކުރާނެކަން ސާފަށް އަންގާފައެވެ. އަދި އެގޮތަށް ނިންމީ ކޮވިޑުގެ ސަބަބުން ޒަރޫރީ ނޫން ކަންކަމުގައި ބޫޓާންގެ މީހުންނަށް މި ވަގުތު ދަތުރުކުރުމުގެ ހުއްދަ ނެތުމުން ކަމަށްވެސް ރިޕޯޓުތައް ބުނެއެވެ. މި އަހަރުގެ މުބާރާތުގައި ބޫޓާން ވާދަނުކުރާއިރު، 2003 ވަނަ އަހަރުން ފެށިގެން މިހާތަނަށް ބޭއްވި ހުރިހާ މުބާރާތެއްގައިވެސް އެ ގައުމު ވަނީ ވާދަކޮށްފައެވެ.
ސާފް ސަރަހައްދުގައި ހަތް ގައުމެއް ހިމެނޭއިރު، ބޫޓާނުގެ އިތުރުން ދެން މި މުބާރާތުގައި ވާދަނުކުރެވޭނީ ޕާކިސްތާނަށެވެ. ޕާކިސްތާނަށް މުބާރާތުގައި ވާދަނުކުރެވެނީ ފީފާގެ ސަސްޕެންޝަނެއްގައި އޮތުމުންނެވެ. އެހެންކަމުން މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށް ކަމަށް މައުލޫމާތުލިބެއެވެ.
އޮކްޓޯބަރު މަހުގެ އެއްވަނަ ދުވަހުން ފެށިގެން 13 ވަނަ ދުވަހުގެ ނިޔަލަށް ސާފް ޗެމްޕިއަންޝިޕް ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.
