ތައިލެންޑްގައި ދުވާލެއްގެ މައްޗަށް ރިޕޯޓުކުރާ ކޮވިޑް ކޭސްތަކުގެ އަދަދު 20 ހާހުން މަތީގައި

ތައިލެންޑުގައި ދުވާލެއްގެ މައްޗަށް ރިޕޯޓުކުރާ ކޮވިޑް ކޭސްތަކުގެ އަދަދު 20 ހާހުން މައްޗަށް އަރައިފިއެވެ.

ތަފާސްހިސާބުތައް ދައްކާ ގޮތުން 20،200 މީހުންނަށް ކޮވިޑް ޖެހިގެން ބުދަ ދުވަހު ވަނީ ރިޕޯޓު ކޮށްފައެވެ. މިއީ ތައިލެންޑްގައި ކޮވިޑް ކޭސްތައް އިތުރުވާން ފެށި ފަހުން އެންމެ ގިނަ އަދަދަކަށް ދުވާލެއްގެ މައްޗަށް ރިޕޯޓު ކުރި އަދަދެވެ. މި ބަލީގައި އަންގާރަ ދުވަހު 188 މީހުން ވަނީ މަރުވެފައެވެ. އަދި މިއީ އެންމެ ގިނަ މީހުން މަރުވެގެން ރިޕޯޓުކުރި ދުވަހެވެ.

އެ ގައުމުގައި މިހާރު އެކްޓިވް ކޭސްގެ ގޮތުގައި 672،385 މީހުން އެބަތިއްބެވެ. ބަލީގައި މަރުވި މީހުންގެ އަދަދުވަނީ 5،503ށް އަރާފައި ކަމަށް ހެލްތް މިނިސްޓްރީގެ ތަފާސް ހިސާބުތަކުން ދައްކައެވެ.

ބަލިން ރައްކާތެރިވުމަށް އެގައުމުގައި ވެސް ވެކްސިން ޕްރޮގްރާމް ފަށައިގެން މިހާރު ކުރިއަށްދެއެވެ.

ތައިލެންޑްގެ ސަރުކާރުގެ އަމާޒަކީ މި އަހަރު ނިމުމުގެ ކުރިން 50 މިލިޔަން މީހުންނަށް ވެކްސިން ދިނުމަށެވެ. ނަމަވެސް އެ ޤައުމުގެ 66 މިލިޔަން މީހުންގެ އާބާދީން ވެކްސިންގެ ޑޯޒުތައް މިހާތަނަށް ފުރިހަމަކޮށްފައިވަނީ 5.6 އިންސައްތަ މީހުންނެވެ. ފުރަތަމަ ޑޯޒް ފުރިހަމަ ކޮށްފައިވަނީ އާބާދީގެ 19.2 އިންސައްތައެވެ.

ސިއްޙީ އިދާރާތަކުން ބުނެފައިވަނީ، މިހާރު އެ ގައުމަށް ފައިޒާ ވެކްސިންގެ 20 މިލިއަން ޑޯޒް ލިބިފައިވާ ކަަމަށެވެ. އިތުރު 50 މިލިއަން ޑޯޒަށް މި ހަފުތާގައި އޯޑަރު ކުރާނެ ކަމަށެވެ.

ކޮވިޑަށް ފަރުވާދިނުމަށް ބެންކޮކް އެއަރޕޯޓުގައި މިހާރުވަނީ ހޮސްޕިޓަލެއް ވެސް ގާއިމްކޮށްފައެވެ.

ބެންކޮކްގެ ބައިނަލްއަގުވާމީ އެއަރޕޯޓުގައި މި ހޮސްޕިޓަލް އަޅާފައިވަނީ، ކާގޯ ގުދަނެއް ހުސްކުރުމަށްފަހުގައެވެ. ފަރުވާދިނުމަށް ޚާއްސަކޮށްގެ 1800 އެނދާއެކު އެ ހޮސްޕިޓަލުގައި ކޮވިޑަށް ފަރުވާ ދިނުމަށް ބޭނުންވާ ހުރިހާ އިންތިޒާމުތަކެއް ވެސް ވަނީ ހަަމަޖައްސާފައެވެ.

ތައިލެންޑަކީ ކޮވިޑްގެ ކޭސްތައް އެންމެ ފުރަތަމަ ފެނުނު ގައުމުތަކުގެ ތެރޭގައި ހިމެނޭ ގައުމެކެވެ. ތައިލެންޑްގައި ބަލި ފެތުރުން އިތުރުވަމުން އަންނާތީ ޚާއްސަ ފިޔަވަޅުތަކެއް ވަނީ އަޅާފައެވެ. އެގޮތުން 29 ޕްރޮވިންސެއްގައި ޚާއްސަ ފިޔަވަޅުތައް އަޅާފައިވެއެވެ. ޗަންބުރި، އަޔުޓިއާ އަދި ޗަޗޮންގްސައޯ ޕްރޮވިންސްގައި ވަނީ ރޭގަނޑު 9:00ން ފެށިގެ ފަތިހު 4:00ށް ކާރފިއު އިއުލާން ކޮށްފައެވެ. ބެންކޮކް ލޮކްޑައުންކޮށް، ޕްރޮވިންސްތަކުން ބެންކޮކަށް ކުރާ ވައިގެ ދަތުރުތައް ވެސް އަންގާރަ ދުވަހުން ފެށިގެން ވަނީ މެދުކަނޑާލާފައެވެ.