އޮކްޓޯބަރު 3 ގެ އެއްވުމުގެ ވާހަކައާއެކު އަނެއްކާވެސް ޝަންގްރިއްލާ ހުޅުވުމުގެ ވާހަކަ ސަރުކާރުން ދައްކައިފި
ކޮވިޑް-19 އާ ގުޅިގެން 2020 ގައި ބަންދުކުރެވުނު އައްޑޫ ސިޓީގެ ޝަންގްރި-ލާ ވިލިނގިލީ ރިސޯޓް މިއަހަރުގެ ޑިސެންބަރު 31 ގެ ކުރިން އަލުން ހުޅުވުމަށް ނިންމާފައިވޭ
އައްޑޫ ސިޓީގެ ޝަންގްރިލާ ރިސޯޓު
އޮކްޓޯބަރު 3 ގައި ސަރުކާރުގެ ގޯސް ކަންތަކާއި ދެކޮޅަށް އަޑު އުފުލުމަށް ބޭއްވުމަށް ހަމަޖެހިފައިވާ ބޮޑު އެއްވުމުގެ ކުރިން، އައްޑޫ ސިޓީގެ ޝަންގްރިއްލާ ރިސޯޓު މިއަހަރުގެ ނިޔަލަށް އަލުން ހުޅުވަން ނިންމާފައިވާ ކަމަށް ސަރުކާރުން ބުނެފި އެވެ.
ވެރިކަން ބަދަލުވި އިރު ޝަންގްރިއްލާ އޮތީ ހުޅުވަންޖެހޭ ހުރިހާ ކަމެއް ފުރިހަމަކޮށް ގާނޫނީ ގޮތުން އެތަން އަލުން އޮޕަރޭޝަނަށް ގެނެވޭ ވަރަށް އިސްލާހުތައް ގެނެސްފަ އެވެ. ސަރުކާރުން ބުނީ ކޮވިޑް-19 އާ ގުޅިގެން 2020 ވަނަ އަހަރު ވަގުތީ ގޮތުން ބަންދުކުރި އައްޑޫ ސިޓީގެ ޝަންގްރިއްލާ ވިލިނގިލީ ރިސޯޓް އެންޑް ސްޕާ މިއަހަރުގެ ޑިސެންބަރު 31 ގެ ކުރިން އަލުން ހުޅުވުމަށް ނިންމާފައިވާ ކަމަށެވެ.
ރިސޯޓު އަލުން ހުޅުވުމާ ގުޅޭގޮތުން ސަރުކާރުން އައްޑޫ އިންވެސްޓްމަންޓްސް ޕްރައިވެޓް ލިމިޓެޑާއެކު ކުރި މަޝްވަރާތައް ކުރި ކަމަށް ބުނި ނަމަވެސް މިދިޔަ ވެރިކަމުގައި، ސަރުކާރުގައި އޮތް ޝަންގްރިއްލާ ރިސޯޓުގެ 30 އިންސައްތަ ހިއްސާ ދޫކޮށް ދިވެހިރާއްޖޭގެ ޓުއަރިޒަމާއި ބެހޭ ގާނޫނަށް ގެނައި އިސްލާހު ރައްޔިތުންގެ މަޖިލީހުން ފާސްކޮށްފައިވަނީ ޖުލައި 1، 2022 ގައެވެ.
ޝަންގްރިއްލާ ހިއްސާ ދޫކުރުމުގެ އެއްބަސްވުމުގައި ކުރީ ސަރުކާރުން ސޮއިކުރީ 28 އޮގަސްޓް 2023 ގައެވެ. ޝަންގްރިލާގެ 30 ޕަސެންޓް ހިއްސާ ސަރުކާރުގައި އޮތް އިރު ބާކީ ހިއްސާ އޮތީ އައްޑޫ އިންވެސްޓްމެންޓް ޕްރައިވެޓް ލިމިޓެޑުގައެވެ. އެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ޓޫރިޒަމް މިނިސްޓްރީގެ ޕާމަނަންޓް ސެކްރެޓަރީ ފާތިމަތު ނިލްފާއެވެ. އަދި އައްޑޫ އިންވެސްޓްމެންޓް ޕްރައިވެޓް ލިމިޓެޑްގެ ފަރާތުން އެ އެއްބަސްވުމުގައި ސޮއިކުރެއްވީ އެ ކުންފުނީގެ ޖެނެރަލް އެފެއާޒް ޑިރެކްޓަރު ސައުދު އަބްދުﷲއެވެ.
ޝަންގްރިއްލާ ހުޅުވުމަކީ ރައީސް ޑރ. މުހައްމަދު މުއިއްޒުގެ ވެސް ރިޔާސީ ވަޢުދެކެވެ.
ރިޔާސީ އިންތިހާބުގެ ތެރޭގައި ރައީސް ޑރ. މުހައްމަދު މުއިއްޒު ވިދާޅުވެފައިވަނީ ކޮވިޑް ބަލިމަޑުކަމުގެ ތެރޭ ބަންދުކުރި ޝަންގްރިއްލާ ވިލިނގިލި ރިސޯޓު، ވެރިކަމުގެ ފުރަތަމަ އަހަރު ހުޅުވައި، އައްޑޫގެ ޓޫރިޒަމް ފުޅާ ކުރުމުގެ ސިޔާސަތެއްގެ ދަށުން، އިތުރު މަންޒިލްތަކަށް އުދުހޭ ގޮތަށް އައްޑޫ ބައިނަލްއަގުވާމީ އެއާޕޯޓު ތަރައްގީކޮށްދެއްވާނެ ކަމަށެވެ. އެގޮތުން ޝަންގްރިއްލާ ރިސޯޓު ވަރަށް ސަމާލުކަން ދީގެން، ސަރުކާރުގެ ފުރަތަމަ އަހަރު، 2024ގެ ކުރީކޮޅު އެ ރިސޯޓު އޮޕަރޭޝަނަށް ގެނެސްދެއްވާނެ ކަމަށް ރައީސް އިންތިހާބުގެ ތެރޭގައި ވިދާޅުވެފައިވެއެވެ.
ނަމަވެސް މިހާތަނަށް އައި އިރުވެސް މި މަސައްކަތް ކުރެވިފައި ނުވެއެވެ.
