ކަރަޕްޝަންގެ މައްސަލައިގައި ތައިލެންޑުގެ ކުރީގެ ބޮޑުވަޒީރު ތަކްސިން ޖަލަށްލާން ހުކުމް ކޮށްފި

ތައިލެންޑްގެ އެންމެ މަތީ ކޯޓުން އެ ގައުމުގެ ކުރީގެ ބޮޑުވަޒީރު ތަކްސިން ޝިނަވަޓްރާ އެއް އަހަރު ދުވަހުގެ މުއްދަތަށް ޖަލަށްލާން ހުކުމް ކޮށްފިއެވެ.

މި ހުކުމް ގުޅިފައި ވަނީ ކުރީގެ މައްސަލައަކާއެވެ. އެ މައްސަލައިގައި އޭނާގެ މައްޗަށް ކޮރަޕްޝަންގެ ކުށް ސާބިތުވެ އަހަރުތަކަކަށް ޖަލަށްލުމަށް ޙުކުމް ކުރެވުނެވެ. ނަމަވެސް އޭނާ ޖަލުގައި ހޭދަކުރީ އެންމެ ދުވަހަކަށްވުރެ މަދު ވަގުތު ކޮޅަކަށެވެ. ޖަލަށް ގެންދެވުނު ތަނުން އޭނާގެ ބަލި ހާލަތު ހުރި ގޮތުން ކަމަށް ބުނެ އޭނާ ހޮސްޕިޓަލަށް ބަދަލު ކުރެވުނެވެ.

އަންގާރަ ދުވަހު ސުޕްރީމް ކޯޓުން ނިންމީ މި ބަދަލު ކުރުން ޤާނޫނާ ޚިލާފު ކަމަށެވެ. އަދި އުމުރުން 76 އަހަރުގެ ތަކްސިން ޖަލުގައި ޙުކުމް ތަންފީޒު ކުރަންޖެހޭނެ ކަމަށެވެ.

2001 ވަނަ އަހަރު އޭނާ ފުރަތަމަ ބޮޑުވަޒީރު ކަމަށް އިންތިޚާބުވީ ހިސާބުން ފެށިގެން ތަކްސިން އާއި އޭނާގެ ޢާއިލާ އިން ތައިލެންޑްގެ ސިޔާސީ މަސްރަހުގައި އިސް ދައުރެއް އަންނަނީ އަދާކުރަމުންނެވެ. އޭނާގެ ދަރިކަނބަލުން ޕެޓޮންގްޓާން ވެސް ވަނީ ބޮޑު ވަޒީރުކަން ކުރައްވާފައެވެ. ނަމަވެސް ލީކުވި ފޯނުކޯލެއްގެ މައްސަލަ އާ ގުޅިގެން ފާއިތުވި މަހު އޭނާ މަޤާމުން ވަކިކުރެވުނެވެ.

"14 ވަނަ ފަންގިފިލާގެ މައްސަލަ" އިގެ ނަމުން ތައިލޭންޑް މީހުން ކިޔާ ތަކްސިންގެ މި މައްސަލަ އަކީ ފާއިތުވި މަސްތަކުގައި ތަކްސިން ކުރިމަތިލާން ޖެހުނު ހަމައެކަނި މައްސަލައެއް ނޫނެވެ.

އޭނާއާ ދެކޮޅަށް ތައިލެންޑްގެ ރަސްގެފާނަށް ފުރައްސާރަ ކުރުމުގެ ދަޢުވާ ވެސް އުފުލުނެވެ. ނަމަވެސް ފާއިތުވި މަހު ކޯޓަކުން ވަނީ ލޭސް-މަޖެސްޓޭގެ ކުށް ސާބިތު ނުވާކަމަށް ނިންމާފައެވެ.

"14 ވަނަ ފަންގިފިލާގެ މައްސަލަ" ގެ ނަމުން މި މައްސަލަ މަޝްހޫރުވީ ހޮސްޕިޓަލުގައި އޭނާ ހުންނެވީ 14 ވަނަ ފަންގިފިލާގައި ކަމުގައި ވާތީއެވެ. އެ ފަންގިފިލާ އަކީ ސެކިއުރިޓީ ވަރުގަދަ ޚިދުމަތް ފުރިހަމަ ތަނެއްކަމަށް އޮންނަނީ މަޝްހޫރު ވެފައެވެ.

މިހެން މިކަން ވުމުން ގިނަ ތައި ރައްޔިތުން ފާޑުކިޔަމުން ބުނެފައިވަނީ މުއްސަނދިންނާއި ބާރުގަދަ މީހުންނަށް އަބަދުވެސް ޚާއްޞަ އިމްތިޔާޒުތަކެއް ލިބޭ ކަމުގައެވެ.

އަންގާރަ ދުވަހުގެ ޙުކުމުގެ ކުރިން ގިނަ ބަޔަކު ތަކްސިންގެ ހަރަކާތްތައް ވަރަށް ގާތުން ބަލަމުން ގެންދިޔައެވެ.

ކޯޓަށް ކިޔާފައި ވަނިކޮށް ފާއިތުވި ހަފްތާގައި އޭނާ ޕްރައިވެޓް ޖެޓެއްގައި ތައިލެންޑުން ދުބާއި އަށް ދަތުރުކުރެއްވިއެވެ. އޭނާ ވިދާޅުވި ގޮތުގައި އެއީ ބޭސްފަރުވާ އަށް ކުރެއްވި ދަތުރެކެވެ. އަދި ކޯޓުގެ އަޑުއެހުމަށް އަނބުރާ އަންނަން ގަސްދުކުރާ ކަމަށް އޭނާ ސޯޝަލް މީޑިއާގައި ވިދާޅުވިއެވެ.

މި މައްސަލައިގައި ތަކްސިންގެ މައްޗަށް ކުރި ފުރަތަމަ ކުރި ހުކުމު ލުއިކޮށް ދިނުމަށް ރަސްގެފާނަށް ހުށަހެޅުމުން އޭނާގެ ހުކުމް އެއް އަހަރަށް ކުޑަކޮށްދެއްވިއެވެ.

ތަކްސިން ހޮސްޕިޓަލުގައި 6 މަސް ދުވަހު ހުންނެވުމަށްފަހު، ޕެރޯލް ލިބި ބެންކޮކްގައި ހުރި އޭނާގެ ގެއަށް ބަދަލުވިއެވެ.

އަންގާރަ ދުވަހު ސުޕްރީމް ކޯޓުން ހުކުމް ކުރި ފަނޑިޔާރަކު ބަޔާނެއްގައި ވިދާޅުވެފައި ވަނީ ތަކްސިން ހޮސްޕިޓަލުގައި ހުންނެވި އިރު އޭނާގެ ޙާލަތަކީ ނާޒުކު ނުވަތަ ކުއްލި ޙާލަތެއް ނޫންކަން އޭނާ އަށް އެނގޭ ކަމުގައެވެ.

އެހެން ކަމުން ހޮސްޕިޓަލުގައި އޭނާ ހުންނެވީ ޤާނޫނާ ޚިލާފަށް ކަމަށާއި ޖަލުގައި ހުކުމް ތަންފީޒު ކުރަން ޖެހޭނެ ކަމަށް ފަނޑިޔާރު ވިދާޅުވިއެވެ.