ކޮވިޑް-19 ވެކްސިންއާ އެމެރިކާގެ 25 ކުޑަކުއްޖެގެ މަރާ ގުޅުވުމަށް ޓްރަމްޕް ގެ ސަރުކާރުގެ ސިއްހީ އޮފިޝަލުން ތައްޔާރުވަމުންދާ ކަމަށާއި، އަދި ވެކްސިން ޖެހުން މަދުކުރުމަށް ބާރު އެޅުމަށް އެމެރިކާ ސަރުކަރުން ވިސްނަމުންދާކަމަށް ވޮޝިންގްޓަން ޕޯސްޓުން ހުކުރު ދުވަހު ރިޕޯޓު ކޮށްފައިވެއެވެ.

މި ހޯދުންތައް ބިނާވެފައި ވަނީ ފެޑެރަލް ވެކްސިން އެޑްވާރސް އިވެންޓް ރިޕޯޓިންގ ސިސްޓަމް (ވެއަރސް) އަށް ހުށަހެޅިފައިވާ މައުލޫމާތުތަކުގެ މައްޗަށް ކަމަށާއި، މި ސިސްޓަމުގައި ހިމެނެނީ ވެކްސިންގެ ސައިޑް އިފެކްޓްތަކާއި ނޭދެވޭ ތަޖުރިބާތަކުގެ ޔަގީން ކުރެވިފައިނުވާ ރިޕޯޓުތަކެވެ.

ޔޫއެސް ފުޑް އެންޑް ޑްރަގް އެޑްމިނިސްޓްރޭޝަން އަދި ސެންޓަރސް ފޮރ ޑިޒީޒް ކޮންޓްރޯލް އެންޑް ޕްރިވެންޝަންގެ މުވައްޒަފުން އާންމު ގޮތެއްގައި ވެއަރސް އަދި އެހެނިހެން ސަލާމަތީ މޮނިޓަރިންގ ޑޭޓާ ދިރާސާ ކުރާ ކަމަށް ޔޫއެސް ޑިޕާޓްމަންޓް އޮފް ހެލްތް އެންޑް ހިއުމަން ސަރވިސަސް އިން ބުނެފައިވެއެވެ.

ވެކްސިން ގެ ރައްކައުތެރި ކަމާ ބެހޭ ފުރިހަމަ މައުލޫމާތު އާންމުކޮށް ހިއްސާ ކުރެވެންދެން، މިއީ "ހަމައެކަނި ލަފާކުރުމެއް" ކަމުގައި ބެލުމަށް އެ ބަޔާނުގައި އިތުރުކޮށްފައިވެއެވެ.

ވެކްސިން އުފައްދާ ކުންފުނިތަކުގެ ތެރެއިން މޮޑަރނާގެ ހިއްސާ 8 އިންސައްތަ ދަށަށް ގޮސްފައި ވާއިރު، ފައިޒަރގެ ހިއްސާ 3 އިންސައްތަ އަށް ވުރެ ބޮޑަށް ދަށަށް ގޮސްފައިވެއެވެ. ބަޔޯއެންޓެކްގެ އެމެރިކާ ގައި ލިސްޓުކުރެވިފައިވާ ހިއްސާ 9 އިންސައްތަ އަށް ވުރެ ބޮޑަށް ދަށަށް ގޮސްފައިވެއެވެ.

ޓްރަމްޕްގެ ސިއްހީ އޮފިޝަލުން، ކުޑަކުދިންގެ މި މަރުތަކާ ކޮވިޑް ވެކްސިން އާ ހުރި ގުޅުމުގެ ވާހަކަ ހިމަނަން ގަސްތު ކުރަނީ އަންނަ ހަފްތާގައި ސީޑީސީގެ މާހިރުންގެ ޕެނަލް އަށް ހުށަހަޅާ ޕްރެޒެންޓޭޝަނެއްގައި ކަމަށް ރިޕޯޓުގައި ބުނެފައިވެއެވެ.

90 އަށްވުރެ ގިނަ ގައުމުތަކުގެ ރެގިއުލޭޓަރުން ކުޑަކުދިންނާއި މާބަނޑު އަންހެނުންނަށް މޮޑަރނާގެ ކޮވިޑް-19 ވެކްސިން ދިނުމާ ގުޅިގެން އައު ނުވަތަ ހާމަނުކުރެވި ހުރި ކަންބޮޑުވުންތަކެއް ފާހަގަކޮށްފައި ނުވާ ކަމަށް ކުންފުނިން ރޮއިޓާރސް އަށް ފޮނުވި އީމެއިލް ޖަވާބެއްގައި ބުނެފައިވެއެވެ.

ސީއެންއެން އަށް ދިން އިންޓަވިއުއެއްގައި އެފްޑީއޭގެ ކޮމިޝަނަރ މާޓީ މަކާރީ ބުނެފައި ވަނީ "ކޮވިޑް ވެކްސިންގެ ސަބަބުން ކުޑަކުދިން މަރުވެފައިވާ" ކަމަށެވެ. އޭނާ މި ވާހަކަ ދެއްކީ ވެއަރސް ޑޭޓާބޭސް އަށް ހަވާލާދީއެވެ.

"އަޅުގަނޑުމެން ރަނގަޅު ތަހުގީގެއް ކުރަމުން މިދަނީ،" އޭނާ އެ އިންޓަވިއުގައި ބުނެފައިވެއެވެ. އެފްޑީއޭ އިން އަންނަ ހަފްތާތަކުގައި ރިޕޯޓެއް ނެރުމަށް ތައްޔާރުވަމުންދާ ކަމަށް އޭނާ ފާހަގަކުރިއެވެ.

ވެކްސިންތަކާ މެދު ދިގު މުއްދަތެއްގައި ފާޑުވިދާޅުވެފައިވާ އެމެރިކާގެ ހެލްތު ސެކްރެޓަރީ ރޮބަޓް އެފް. ކެނެޑީ ޖޫނިއަރ ވަނީ ކޮވިޑް-19 ވެކްސިން ޖެހުމުގެ ސިޔާސަތައް ބޮޑު ބަދަލެއް ގެނެސްފައެވެ. އެމެރިކާ ސަރުކާރުން ވަނީ ދުޅަހެޔޮ ކުޑަކުދިންނާއި، ޓީންއޭޖަރުންނާއި މާބަނޑު އަންހެނުންނަށް އާންމުކޮށް ވެކްސިން ޖެހުމުގެ ލަފާ އުވާލައި، އުމުރުން ދުވަސްވީ މީހުންނާއި ބަލިތަކެއް ހުންނަ މީހުންނަށް އެކަނި ވެކްސިން ދިނުމަށް އިރުޝާދު ދީފައެވެ.

މި ސިޔާސަތު ބަދަލުވުމާ ގުޅިގެން އެމެރިކަން އެކަޑަމީ އޮފް ޕީޑިއެޓްރިކްސް ހިމެނޭގޮތަށް މެޑިކަލް އަދި ޕަބްލިކް ހެލްތު ޖަމްއިއްޔާތަކުން ދެކޮޅުހަދާފައިވެއެވެ. އެމެރިކާގެ ސަރުކާރުގެ ސިޔާސަތު ތަކާ ޚިލާފަށް މި ފަރާތްތަކުން ގެންދަނީ ކުޑަކުދިންނާއި މާބަނޑު އަންހެނުންނަށް ކޮވިޑް-19 ވެކްސިން ޖެހުމަށް ލަފާދެމުންނެވެ.

ކޮންގްރެސްގެ ޕްރެޝަރާއި، އާންމު ސިއްހަތާ ގުޅޭ ކަންބޮޑުވުންތަކާއި، ގައުމީ ފެންވަރުގައި ވެކްސިންގެ ސިޔާސަތުތައް ބަދަލުކުރުމުގެ ސިޔާސީ ނުރައްކާތައް ހުރި ނަމަވެސް ރައީސް ޑޮނަލްޑް ޓްރަމްޕް ވަނީ ކެނެޑީއަށް ތާއީދު ކުރައްވާފައެވެ.

ކެނެޑީ ވަނީ ވެކްސިން ދިރާސާތަކަށް ދޭ ފައިސާ ބޮޑުތަން މަދުކޮށް، އެމެރިކާގެ ވެކްސިން އާ ބެހޭ ލަފާ ދޭ ސީޑީސީގެ އިސްވެރިޔާ ވަޒީފާއިން ވަކިކޮށް، ވެކްސިންގެ މާހިރުންގެ ޕެނަލްގެ 17 މެންބަރުން ވަކިކޮށް، އޭނާ އަމިއްލައަށް ހޮވާ ލަފާދޭ ބަޔަކު އައްޔަންކޮށްފައެވެ.