މަރުވި ކަމަށް ނިންމާ ހަށިގަނޑު އަންދާލަން ސަންދޯކުގައި ގެންދިޔަ ދުވަސްވީ އަންހެނަކު ހަރަކާތް ކުރަނިކޮށް ފެނިގެން ހޮސްޕިޓަލަށް ގެންގޮސްފި
25 ނޮވެމްބަރު 2025 | އަންގާރަ 05:51ތައިލެންޑުގައި މަރުވި ކަމަށް ނިންމާ ބުދު ދީނުގެ ފައްޅިއެއް ގައި އަންދާލުމަށް ސަންދޯކުގައި ގެންދަނިކޮށް އަންހެނަކު ހަރަކާތްކުރާކަން ފާހަގަވެ ހޮސްޕިޓަލަށް ގެންދިޔައެވެ. ސަންދޯކުގެ ތެރޭގައި އޮވެ ހަރަކާތްކުރާ ވީޑިއޯ އެއް ފައްޅީގެ ފޭސްބުކް ޕޭޖުގައި ވަނީ ހިއްސާ ކޮށްފައި.
ތައިލެންޑްގައި މަރުވެފައިވާ ކަމަށް ބެލެވޭ ދުވަސްވީ އަންހެނެއްގެ ހަށިގަނޑު އަންދާލަން ގެންދަނިކޮށް ދިރިހުރިކަން އެނގިގެން ހޮސްޕިޓަލަށް ގެންދަނީ
މަރުވި ކަމަށް ނިންމާ ހަށިގަނޑު އަންދާލަން ސަންދޯކުގައި ގެންދިޔަ ދުވަސްވީ ތައިލެންޑުގެ އަންހެނަކު ހަރަކާތް ކުރާކަން ފާހަގަ ވެގެން ހޮސްޕިޓަލަކަށް ގެންގޮސްފި އެވެ.
އަންހެން މީހާ މަރުވި ކަމަށް ނިންމާ ސަންދޯކުގައި ގެންދިޔައީ ބުދު ދީނުގެ ފައްޅި އަކަށް އޭނާގެ ހަށިގަނޑުން އަންދާލުމަށެވެ.
މި އަންހެން މީހާގެ ވީޑިއޯ ބެންކޮކްގެ ބޭރުގައި އޮންނަ ނޮންތަބޫރީ ޕްރޮވިންސް ގައި ހުންނަ އެ ފައްޅީގެ ފޭސްބުކް ޕޭޖުގައި ހިއްސާކޮށްފައިވެއެވެ. އެ ވީޑިއޯ އިން ފެންނަނީ ޕިކަޕެއްގެ ފަހަތުގައި އޮތް ހުދު ސަންދޯކެއްގެ ތެރޭގައި އަންހެނަކު އޮއްވައެވެ. އޭނާ އަތާއި ބޯ ކުޑަކޮށް ހަރަކާތްކުރަމުން ދިޔައެވެ.
ފައްޅީގެ ޖެނެރަލް އަދި ފައިނޭންޝިއަލް އެފެއާޒް މެނޭޖަރު، ހޯމަ ދުވަހު އެސޯސިއޭޓެޑް ޕްރެސް އަށް ބުނީ، 65 އަހަރުގެ އެ އަންހެން މީހާގެ ހަށިގަނޑު އަންދާލަން ގެނެސްފައި ވަނީ ފިޓްސަނުލޯކް ޕްރޮވިންސުން، އޭނާގެ ބޭބެ އިން ކަމަށެވެ.
އެމީހުންނަށް ސަންދޯކުގެ ތެރެއިން އަޑެއް އިވޭތީ، ވެގެން އުޅޭ ގޮތް ބެލީ ކަމަށް ބުނެފައިވެއެވެ.
"އަހަރެން ހައިރާންވެފައި، ސަންދޯއް ހުޅުވަން އެދުނީމެވެ. އަދި އެންމެން ހައިރާންވިއެވެ،" އޭނާ ބުންޏެވެ. "އޭނާގެ ލޯ ކުޑަކޮށް ހުޅުވާލާފައި، ސަންދޯކުގެ ބިތުގައި ތަޅަމުން ދިޔަ ތަން އަހަރެން ދުށީމެވެ. އޭނާ ވަރަށް ގިނައިރު ވަންދެން ތަޅަމުން ދިޔަ ކަމަށް ބެލެވެއެވެ."
އެ އަންހެން މީހާގެ ބޭބެ ބުނީ، އެ އަންހެން މީހާ ދެ އަހަރެއްހާ ދުވަސް ވަންދެން އެނދުމަތިވެފައި އޮތް ކަމަށާއި، ދެ ދުވަސް ކުރިން ނޭވާ ހުއްޓިފައި އޮތް ކަމަށް ގަބޫލު ކުރެވުނު ކަމަށެވެ.
އޭނާ މަރުވި ކަމަށް ނިންމާ ސަންދޯކަކަށް ލައިގެން ގާތްގަނޑަކަށް 300 މޭލު ދަތުރުކޮށް ބެންކޮކްގެ ހޮސްޕިޓަލަކަށް ގެންދިޔަ އެވެ. އެއީ މީގެ ކުރިން އެ އަންހެން މީހާ މަރުވުމުން ގުނަވަން ހަދިޔާކުރަން ބޭނުންވާ ކަމަށް އެދިފައިވާ އޮތުމުން ކަމަށް ބުންޏެވެ.
އޭނާގެ ބޭބެ ބުނީ، ހޮސްޕިޓަލުން އެ އަންހެން މީހާގެ ހަށިގަނޑު ބަލައިގަންނަން ދެކޮޅު ހެދީ އޭނާގެ ރަސްމީ މަރުގެ ސެޓްފިކެޓެއް ނެތުމުން ކަމަށެވެ. ހަށިގަނޑު އަންދާލުމަށް ފައްޅި އަށް އައުމުން ވެސް މަރުގެ ސެޓްފިކެޓް ނެތުމުން މައްސަލަ ކުރިމަތިވި ކަމަށް އޭނާ ބުންޏެވެ.
ފައްޅީގެ މެނޭޖަރު ބުނީ، މަރުގެ ސެޓްފިކެޓެއް ހޯދާނެ ގޮތް އަންހެން މީހާގެ ބޭބެ އަށް ސާފުކޮށްދެމުން ދަނިކޮށް، ސަންދޯކުގެ ތެރެއިން އަންނަ އަޑެއް އިވުނު ކަމަށެވެ. ފައްޅީގެ މުވައްޒަފުން އެ އަންހެން މީހާ ބަލާފައި، ފަރުވާ ދިނުމަށް ކައިރީގައި ހުރި ހޮސްޕިޓަލަކަށް ފޮނުވިއެވެ.
މީގެ ކުރިންވެސް، ފިއުނެރަލް ހޯމްތަކުން މީހުން ދިރިހުއްޓާ ފެނުނު ހާދިސާތައް ރިޕޯޓްކޮށްފައިވެއެވެ.
