މާލޭގައި މާރާމާރި ހިންގާ މީހަކު ޒަހަމްކޮށްލައިފިއެވެ.
ރާއްޖެމްވީއަށް ފުލުހުން ބުނީ އަލިކިލޭގެފާނު މަގު، ނޭޝަނަލް ޑްރަގް އެޖެންސީން (އެންޑީއޭ) ކުރިމަތީ މީހެއްގެ ގައިގައި ޖަހައި މާރާމާރީ ހިންގި މައްސަލައެއް ބުރާސްފަތި ދުވަހުގެ ހަވީރު 5:23 ހާއިރު ފުލުހުންނަށް ހުށަހަޅާފައިވާ ކަމަށެވެ.
އަނިޔާވި މީހާ އައިޖީއެމް ހޮސްޕިޓަލަށް ގެންގޮސް ފަރުވާ ދެމުންދާ ކަމަށް ފުލުހުން ބުނެފައިވެއެވެ.
މިމާރާމާރީގައި ޒަހަމްވެފައިވަނީ ޒުވާން ފިރިހެނެކެވެ. އެމީހާގެ ބޯފަޅާލާފައިވާއިރު، މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ބުރާސްފަތި ދުވަހު އިތުރު މާރާމާރިއެއް ހިންގާފައިވާއިރު، މިމަހުގެ 17 ވީ ހޮނިހިރު ދުވަހު ވެސް މާލޭގައި ކާރެއް ހުއްޓުވައި، ކުޑަކުއްޖެއްގެ ބޯ ފަޅާލާފައިވެއެވެ.
މިމައްސަލައާ ގުޅިގެން ފުލުހުން ބުނެފައިވަނީ މަޖީދީމަގު މަގު، މާވެޔޮ މަގާ ގުޅުނު ހިސާބުން ދުއްވާފައި ދިޔަ ކާރެއް ހުއްޓުވައި، އެ ކާރުގައި އިން އުމުރުން 14 އަހަރުގެ ފިރިހެން ކުއްޖެއްގެ ގައިގައި ތަޅައި މާރާމާރި ހިންގި ކަމުގެ ރިޕޯޓް ލިބިފައިވަނީ ހޮނިހިރު ދުވަހުގެ އިރުއޮއްސި 18:38 ހާއިރު ކަމަށެވެ.
މި މައްސަލަ ވެސް ފުލުހުން ދަނީ އިތުރަށް ތަހުގީގު ކުރަމުންނެވެ.
