އައު ފޯމެޓަށް އެކުވެރި އެސޯސިއޭޝަންތަކާއި، ސްޕޮންސަރުންގެ އެހީ ލިބޭނެ: ބައްސާމް

ދިރާގު ދިވެހި ޕްރިމިއާ ލީގުގެ އައު ފޯމެޓަށް ބައިނަލްއަގްވާމީ އެސޯސިއޭޝަންތަކާއި، މިހާރުގެ ސްޕޮންސަރުންގެ އެހީވެސް ލިބޭނެ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ބުރާސްފަތި ދުވަހު ދިވެހި ޕްރިމިއާ ލީގުގެ އައު ފޯމެޓު އިފްތިތާހު ކުރެއްވުމަށްފަހު ފުޓުބޯޅަ އެސޯސިއޭޝަން އޮފް މޯލްޑިވްސްގެ ރައީސް ބައްސާމް އަދީލް ޖަލީލް ވިދާޅުވީ މިއީ ރާއްޖޭގެ ފުޓުބޯޅަ ތަރައްގީ ކުރުމަށް އެޅިގެންދިޔަ އައު ފިޔަވަޅެއް ކަމަށެވެ.

ދިވެހި ޕްރިމިއާ ލީގު 2023/2024 ވަނަ އަހަރު ފަށާނީ މިހާރު ވެސް ޕްރިމިއާލީގްގައި ހިމެނޭ އަށްޓީމާއި އެކު ކަމަށާއި  އޭގެ އިތުރުން  ދެން ހިމެނޭނީ ހަތަރު ޒޯންގެ ޗެމްޕިއަނުންނެވެ. މާލެ ޒޯންގެ ޗެމްޕިއަން ގޮތުގައި ކަނޑައަޅާނީ އަންނަ އަހަރުގެ ދެ ވަނަ ޑިވިޝަނުގެ ޗެމްޕިއަނުންނެވެ. ދެން އޮތް ހަތަރު ޖާގަ ދިނުމަށް ނިންމާފައި ވަނީ ޒޯން ޗެމްޕިއަނުންނަށެވެ.

ދެ ވަަނަ ދައުރަކަށް އެފްއޭއެމްގެ ރައީސްގެ މަގާމު ފުރުއްވަމުން އަންނަ ބައްސާމް ވިދާޅުވީ މި ފޯމެޓާ މެދު ހިޔާލު ހޯދަން ރާއްޖޭގެ ސްޕޮންސަރުންނާ ވެސް މަޝްވަރާ ކޮށްފައިވާނެ ކަމަށާއި އެފްއޭއެމަށް ބައިނަލްއަގުވާމީ ގޮތުން އެކި ގައުމުތަކުން ލިބޭ ސްޕޮންސަރުންގެ އެހީގައި ވެސް މި ލީގުގެ މަސައްކަތަށް ބޭނުންވާ މާލީ ސަޕޯޓް ލިބޭނެ ކަމަށެވެ. އަދި މުޅި ރާއްޖެ ބައިވެރިވާ ކަމެއްގައި ސަރުކާރުގެ އެހީތެރިކަން ވެސް ލިބޭނެކަން ބައްސާމް ފާހަގަކުރެއްވިއެވެ.

މީގެ އިތުރުން ލީގުގެ އައު ފޯމެޓުގެ ކޮންސަލްޓަންޓަކަށް ހަރަކާތްތެރިވި ފުޓުބޯޅަ ކޯޗު މުހައްމަދު އާދަމް ވިދާޅުވީ، މީގެ ކުރިން މުޅި ރާއްޖެއަށް ހުޅުވާލައިގެން ބޭއްވި މިނިވަން ޗެމްޕިއަންޝިޕް ވެސް ބާއްވާފައިވަނީ ހޯމް އެންޑް އަވޭ އުސޫލުން ކަމަށާއި، އައު ފޯމެޓު އެކުލަވާލާފައިވަނީ ފުޓުބޯޅައިގެ ވަރަށް ގިނަ މީހުންނާއި މަޝްވަރާ ކުރުމަށްފަހުގައި ކަމަށެވެ.