ޔޫރޯގައި ވިދާލި ކީޕަރު ޑޮންނަރުއްމާ ޕީއެސްޖީއަށް

ނިމިދިޔަ ޔޫރޯ ފުޓުބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި އިޓަލީގެ ގޯލްކީޕަރު ޖިއަންލުއިޖީ ޑޮންނަރުއްމާ ފްރާންސްގެ ޕީއެސްޖީއަށް ސޮއިކޮށްފިއެވެ.

އިޓަލީގެ އޭސީ މިލާނުން ޑޮންނަރުއްމާއާއެކު ހަދާފައިވާ އެއްބަސްވުން މިދިޔަ ސީޒަނުގެ ނިޔަލަށް ވަނީ ހަމަވެފައެވެ. އެހެންކަމުން ޑޮންނަރުއްމާ ޕީއެސްޖީއަށް ސޮއިކުރީ ހިލޭ އެއްބަސްވުމެއްގެ ދަށުންނެވެ. އުމުރުން 22 އަހަރުގެ ކީޕަރު ޕީއެސްޖީއަށް ސޮއިކުރީ ފަސް އަހަރުގެ އެއްބަސްވުމެއްގައެވެ.

ޕީއެސްޖީއާ ގުޅުމަށްފަހު ޑޮންނަރުއްމާ ބުނީ އެ ކްލަބާއި ގުޅުން އެއީ ލިބިގެންދިޔަ ހިތްހަމަ ޖެހުމެއް ކަމަށެވެ. މީގެ އިތުރުން ޑޮންނަރުއްމާ ބުނީ ކުޅުންތެރިއެއްގެ ގޮތުގައި ގިނަ ކާމިޔާބީތަކެއް ހޯދަން ބޭނުންވާ ކަމަށާއި، އެހެންކަމުން ކާމިޔާބު ހޯދަން މަސައްކަތް ކުރާނެ ކަމަށެވެ. އަދި ޕީއެސްޖީއާ ގުޅުމަކީ ރަނގަޅު ނިންމުމެއްކަން ސާބިތުކޮށްދޭން ބޭނުންވާ ކަމަށް ޑޮންނަރުއްމާ ބުންޏެވެ.

އުމުރުން 16 އަހަރުގައި އޭސީ މިލާނުގެ ގޯލުން ޑޮންނަރުއްމާ ފެނިގެންދިޔައިރު، އޭގެ އަހަރެއް ފަހުން ޑޮންނަރުއްމާ ވަނީ އިޓަލީގެ ގައުމީ ޓީމުގެ ގޯލު ބަލަހައްޓަން ފަށައިފައެވެ.

އިޓަލީގެ ކޯޗުކަމާ 2018 ވަނަ އަހަރު ރޮބާޓޯ މަންޗިނީ ހަވާލުވި ފަހުން ޑޮންނަރުންމާ އަކީ އެ ޓީމުގެ އެއް ވަނަ ގޯޯލްކީޕަރެވެ. މި ފަހަރުގެ ޔޫރޯގައި އިޓަލީ ޗެމްޕިއަންކަން ހޯދިއިރު، ޑޮންނަރުންމާ ވަނީ މޮޅު ކުޅުމެއް ދައްކައިފަ އެވެ. ހާއްސަކޮށް ސެމީ ފައިނަލާއި ފައިނަލުގައި ޕެނަލްޓީ ޖަހައިގެން އިޓަލީ މޮޅުވިއިރު، ޑޮންނަރުންމާ ތަފާތު ދެއްކިއެވެ.

މި ފަހަރުގެ ޓްރާންސްފާ މާކެޓްގެ ތެރޭގައި ޑޮންނަރުންމާގެ އިތުރުން ލިވަޕޫލްގެ ޖިއޮޖީނިއޯ ވައިނަލްޑަމް އާއި ރެއާލް މެޑްރިޑްގެ ސާޖިއޯ ރާމޯސް ވެސް ވަނީ ހިލޭ ޓްރާންސްފާއެއްގައި ޕީއެސްޖީ އަށް ސޮއިކޮށްފަ އެވެ. މީގެ އިތުރުން އިންޓަ މިލާނަށް ކުޅެމުން އަންނަ މޮރޮކޯގެ ފުލްބެކް އަޝްރަފް ހަކީމީ ވަނީ 70 މިލިއަން ޑޮލަރުގެ ފީ އަކަށް ޕީއެސްޖީ އަށް ސޮއިކޮށްފައެވެ.