ޑޮންނަރުންމާ ސިޓީ އަށް ބަދަލުވެއްޖެ

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށްލަން ނިންމި، އިޓަލީގެ ގޯލު ކީޕަރު ޖިއާންލުއިޖީ ޑޮންނަރުންމާ، މެންޗެސްޓަރ ސިޓީ އަށް ބަދަލުވެއްޖެ އެވެ.

އުމުރުން 26 އަހަރުގެ ޑޮންނަރުންމާގެ ބަދަލުގައި ޕީއެސްޖީ އިން ވަނީ އެހެން ކީޕަރެއް ގެނެސްފަ އެވެ. އެއާއެކު، ޕީއެސްޖީގެ ކޯޗު ލުއިސް އެންރީކޭގެ ޕްލޭންގައި ޑޮންނަރުންމާ ނުހިމެނޭ ކަމަށް ވަނީ ނިންމައިފަ އެވެ. އެހެންވެ ޑޮންނަރުންމާ ވަނީ އޭނާ ޕީއެސްޖީ ދޫކޮށްލަން ނިންމާފައިވާކަން އޭނާ ވަނީ އޭރު އިއުލާން ކޮށްފަ އެވެ.

ޑޮންނަރުންމާ ހޯދުމަށް ޝައުޤުވެރިކަން ފާޅު ކުރި ކުލަބު ތަކުގެ ތެރޭގައި މެންޗެސްޓަރ ސިޓީ ހިމެނުނުއިރު، ސިޓީ އިން ޑޮންނަރުންމާ ހޯދީ، އެ ޓީމަށް ކުޅެމުން އައި އެޑާސަން ވަނީ އެ ކުލަބު ދޫކޮށް ފެނަބާޗޭ އަށް ބަދަލުވުމުންނެވެ.

ޕީއެސްޖީ އާއެކު ޑޮންނަރުންމާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެއްބަސްވުމުގައި ބާކީ އެއް އަހަރު އޮތް ނަމަވެސް، ޕީއެސްޖީ ދޫކޮށްލަން ނިންމާފައިވާކަން ހާމަ ކުރަމުން ޑޮންނަރުންމާ ވަނީ އެ ކުލަބުގެ ނިންމުމާ މެދު ހިތްހަމަ ނުޖެހޭކަން ވެސް ހާމަކޮށްފަ އެވެ.

ޑޮންނަރުންމާ ސިޓީ އަށް ބަދަލުވެފައި ވަނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން، ސިޓީ އާއެކު ޑޮންނަރުންމާ ސޮއި ކުރާ އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ. ސިޓީގެ ހުށަހެޅުމުގައި ބުނެފައިވާ ގޮތުން، ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވުމުން، ސިޓީ އިން ބޭނުންވާ ނަމަ އިތުރު އެއް އަހަރަަށް އެއްބަސްވުން އައު ކުރެވޭނެ އެވެ.

އުމުރުން 26 އަހަރުގެ ކުޅުންތެރިޔާ ޕީއެސްޖީ އަށް ބަދަލުވީ 2021 ވަނަ އަހަރު އެވެ. ޕީއެސްޖީ އިން ޑޮންނަރުންމާ ދޫކޮށްލަން ނިންމާފައިވާއިރު، އޭނާގެ އެއްބަސްވުން އައު ކުރަން އެ ކުލަބުން މަސައްކަތް ކުރި ކަމަށާއި، ނަމަވެސް ޕީއެސްޖީގެ ހުށަހެޅުން ޑޮންނަރުންމާ ޤަބޫލު ނުކުރީ ކަމަށް ވެސް ބުނެފައިވެ އެވެ. އެހެންވެ ފަހުން ޕީއެސްޖީ އިން އެއްބަސްވުން އައު ކުރަން ބޭނުން ނުވާ ކަމަށް ބުނެފައިވެ އެވެ.

ޕީއެސްޖީ ގައި ހޭދަ ކުރި ހަތަރު ސީޒަންގެ ތެރޭގައި ޑޮންނަރުންމާ ވަނީ 161 މެޗުގައި ޕީއެސްޖީގެ ގޯލު ބަލަހައްޓައިފަ އެވެ. އަދި ޕީއެސްޖީ އާއެކު އޭނާ ވަނީ 10 ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ފްރާންސް ލީގު ހަތަރު ފަހަރު ކާމިޔާބު ކުރުމުގެ އިތުރުން، ފްރާންސް ކަޕް ދެ ފަހަރު ކާމިޔާބު ކުރުން، ޓްރޮފީ ޑީ ޗެމްޕިއަންސް ތިން ފަހަރު ކާމިޔާބު ކުރުން އަދި ޔުއެފާ ޗެމްޕިއަންސް ލީގު އެއް ފަހަރު ކާމިޔާބު ކުރުން ހިމެނެ އެވެ.

ޑޮންނަރުންމާ އަކީ އިޓަލީ ޤައުމީ ޓީމުގެ ގޯލު ވެސް ބަލަހައްޓަމުން އަންނަ ކުޅުންތެރިޔާ އެވެ. އޭނާ ވަނީ މިހާތަނަށް ޤައުމީ ޓީމަށް ކުޅެދިން 74 މެޗުގައި އިޓަލީގެ ގޯލު ބަލަހައްޓައިފަ އެވެ. އިޓަލީ އާއެކު އޭނާ ވަނީ 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ.