މަގާމުން ދުރުކޮށްފައިވާ މިޔަންމާގެ ލީޑަރު އަންގްސަން ސޫކީގެ މައްޗަށް އިތުރު ދައުވާތަކެއް ކުރުމަށް އެގައުމުގެ އަސްކަރީ ސަރުކާރުން ނިންމައިފިއެވެ.

އޭނާގެ ގާނޫނީ ވަކީލުންގެ ޓީމާ ހަވާލާދީ ރޮއިޓާސްގައި ރިޕޯޓުކޮށްފައި ވަނީ، އަލަށް އުފުލި ދައުވާ ތަކަކީ، މިޔަންމާގެ ދެވަނައަށް އެންމެ ބޮޑު ސިޓީ، މަންޑަލޭގެ ކޯޓުގައި، އުފުލާފައިވާ ކޮރަޕްޝަނާ ގުޅުންހުރި ދައުވާތަކެއް ކަމަށެވެ. އެ ޓީމުން ބުނެފައިވަނީ އެނގޭހާ ވެސް ކަމަކީ ކޮރަޕްޝަނާ ގުޅުންހުރި ދައުވާ ތަކެއް ކަން ކަމަށާއި، ދައުވާ ތަކުގެ ތަފްސީލު ނުހޯދާ ކަމަށެވެ.

ސޫކީގެ ގާނޫނީ ވަކީލުންގެ ޓީމުން ވިދާޅުވެފައިވާ ގޮތުގައި، މިފަހަރު ސޫކީއާ ދެކޮޅަށް އުފުލާފައިވާ ދައުވާތަކުގެ ތެރޭގައި، ކޮރަޕްޝަނާ ގުޅުންހުރި ދައުވާތައް ވެސް ހިމެނޭ ކަމަށެވެ. އަދި އިތުރު ދެ ދައުވާއެއް، ސޫކީގެ ސަރުކާރުގައި ވަޒީރުކަން ކުރެއްވި މިން ތޫއާ ދެކޮޅަށް ވެސް އުފުލާފައިވާކަމަށް ވެސް ގާނޫނީ ވަކީލުން ވިދާޅުވެފައި ވެއެވެ.

އުމުރުން 76 އަހަރުގެ އަންގްސަން ސޫކީއާ ދެކޮޅަށް އަލަށް އުފުލާފައިވާ ދައުވާތަކުގެ ސަބަބުން، މިޔަންމާގެ ތަފާތު 3 ސިޓީއެއްގައި މިހާރު އަންގްސަން ސޫކީގެ ޝަރީއަތްތައް ކުރިޔަށް ދާނެއެވެ.

އަދި އޭނާގެ މައްޗަށް ވަނީ، ގާނޫނާ ޚިލާފަށް ވޯކީ ޓޯކީ ރޭޑިއޯ މިޔަންމާއަށް އެތެރެކޮށް ގެންގުޅުމުގެ ދައުވާގެ އިތުރުން، ޑިޒާސްޓަރ މެނޭޖްމަންޓް ގާނޫނުގެ ދަށުން ކޮވިޑާދެކޮޅަށް އަޅާފައިވާ ފިޔަވަޅުތަކާ ޚިލާފުވި ކަމުގެ ދައުވާ ވެސް އުފުލާފައެވެ. މި ދައުވާތައް ކޮށްފައިވަނީ ވެރިރަށް ނައިޕިޓޯގައެވެ.

ޔަންގޮން ކޯޓުގައި، އޭނާގެ މައްޗަށްވަނީ، މިޔަންމާގެ އޮފިޝަލް ސީކްރެޓް ގާނޫނާ ޚިލާފުވުމުގެ ދައުވާވެސް ކޮށްފައެވެ. މި ދައުވާތައް އޭނާގެ މައްޗަށް ސާބިތު ވެއްޖެނަމަ 14 އަހަރު ދުވަހުގެ ޖަލު ހުކުމެއް އަންނާނެއެވެ.

އަންގްސަން ސޫކީގެ ގާނޫނީ ވަކީލުންގެ ޓީމުންވަނީ މި ހުރިހާ ދައުވާތަކަށް ވެސް އިންކާރުކޮށްފައެވެ.

ސޫކީގެ ދަރިންނާއި އަވަހާރަވެފައިވާ ފިރިކަލުންނަކީ، ގައުމުން ބޭރުގެ ރައްޔިތުކަން އޮންނަ ބަޔަކަށް ވާތީ އޭނާއަށް އެގައުމުގެ ރައީސްކަމަށް ވާދަކުރުމުގެ ފުރުސަތުވަނީ ގެއްލިފައެވެ. ބަޣާވާތަކުން ވެރިކަން ބަދަލުކޮށްލުމުގެ ކުރިން އޭނާވަނީ މިޔަންމާގެ ސްޓޭޓް ކައުންސިލަރުކަން އަދާ ކުރައްވާފައެވެ.