އެމްއޯސީގެ ސެކެޓްރީ ޖެނެރަލަކަށް ތަމޫ

މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ސެކެޓްރީ ޖެނެރަލްގެ މަގާމަށް ތަމޫހް އަޙްމަދު ސަޢީދު (ތަމޫ) އައްޔަނުކޮށްފިއެވެ.

އެމްއޯސީގެ ސެކެޓްރީ ޖެނެރަލްގެ މަގާމަށް އޭނާ އައްޔަންކުރީ ހޯމަ ދުވަހު ބޭއްވި އޮލިމްޕިކް ކޮމެޓީގެ ހިންގާ ކޮމެޓީގެ ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ. ތަމޫގެ އިތުރުން އޮލިމްޕިކް ކޮމެޓީގެ ފިނޭންޝިއަލް ޑިރެކްޓަރުގެ މަގާމަށް ޙުސައިން ރަޝީދުވެސް ވަނީ އައްޔަންކޮށްފައެވެ.

މީގެ ކުރިން ޓޭބަލް ޓެނިސް އެސޯސިއޭޝަނުގެ ޖެނެރަލް ސެކެޓްރީގެ މަގާމުގެވެސް ފުރުއްވާފައިވާ ތަމޫ ވަރަށް ފަހުން ވަނީ އޮލިމްޕިކް ކޮމެޓީގެ ފަރާތުން ގިނަ ކަންކަމުގައި އެކްޓިވްކޮށް ހަރަކާތްތެރިވެފައެވެ. ޚާއްސަކޮށް ބައިނަލްއަގްވާމީ ގޭމްސްތަކުގައި ރާއްޖެއިން ބައިވެރިވާ ޑެލިގޭޝަންތަކުގެ ކަންކަން އިންތިޒާމު ކުރުމުގައި އިސްކޮށް ހަރަކާތްތެރިވެފައިވެއެވެ.

ތަމޫ ވަނީ އޮލިމްޕިކް ކޮމެޓީގައި ޕްރޮގްރާމް ކޯޑިނޭޓަރުގެ މަގާމުގެ އިތުރުން ޑިރެކްޓަރ ޖެނެރަލްގެ މަގާމުވެސް ފުރުއްވާފައެވެ.

އޮލިމްޕިކް ކޮމިޓީގެ ސެކްރެޓަރީގެ ޒިންމާ ތަމޫއާ މިއަދު ރަސްމީކޮށް ހަވާލުކުރެވުނުއިރު، އޭނާ މި ވަގުތު ވެސް އަންނަނީ ކުޅިވަރުގެ އިސް މަގާމެއް ފުރުއްވަމުންނެވެ. އޭނާ އަކީ މޯލްޑިވްސް އޮލިމްޕިކް ކޮމިޓީގެ ފަރާތުން ނެޝަނަލް ސްޕޯޓްސް ކައުންސިލްގައި އިންނަވާ މެމްބަރެވެ. ސްޕޯޓްސް ކައުންސިލުން ރާއްޖޭގެ ކުޅިވަރު އޮނިގަނޑަށް ގެންނަން ބޭނުންވާ ބަދަލުތަކުގެ މަޝްވަރާތަކުގައި ތަމޫގެ ހިއްސާ އޮންނާނެއެވެ.

ފާއިތުވެދިޔަ ތިން ދައުރުގައިވެސް އެމްއޯސީގެ ސެކެޓްރީ ޖެނެރަލުގެ މަގާމު ފުރުއްވާފައިވަނީ އަޙްމަދު މަރްޒޫޤް (މަރޭ)އެވެ. ތިން ދައުރަށްފަހު މަރޭ އެމްއޯސީން ވަކިވިއިރު، އޭނާ ވަނީ ރާއްޖޭގެ އެތުލީޓުންނާއި، ކުޅިވަރު ކުރިއެރުވުމަށް އަގުހުރި މަސައްކަތްތަކެއް ކުރައްވާފައެވެ.