ފްރާންސްގައި މިމަހު ފަށާ އޮލިމްޕިކްސްގައި ރާއްޖޭގެ ދިދަ ހިފަހައްޓާނެ އެތްލީޓުންގެ ގޮތުގައި ޓީޓީ ތަރި ފާތިމަތު ދީމާ އަލީ އާއި އެތްލެޓެކްސްއިން ވާދަކުރާ އިބާދުالله އާދަމް ކަނޑައަޅާ, ދިދަ ހަވާލުކޮށްފިއެވެ.

އެދެ އެތްލީޓުންނަށް ދިދަ ހަވާލުކުރީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެވެ. މި ދެ އެތްލީޓުންގެ ތެރެއިން ދީމާ އަކީ ގޭމްސްއަށް ކޮލިފައިވެގެން ވާދަކުރާ ރާއްޖޭގެ ހަމައެކަނި އެތްލީޓެވެ. އަދި ތާރީޚުގައިވެސް ކޮލިފައިންގ ކުޅެ, ނަތީޖާ ނެރެގެން އޮލިމްޕިކްސްއަށް ކޮލިފައިވި ފުރަތަމަ އެތްލީޓަކީ ރާއްޖޭގެ އެއްވަނަ ޓީޓީ ކުޅުންތެރިޔާ ދީމާ އެވެ.

ޒުވާން އިބާދުالله އެނބުރި އައީ އަނިޔާއަށް ފަހުއެވެ. އަނިޔާގެ ސަބަބުން މިދިޔަ އަހަރު އިންޑިޔަން އޯޝަން އައިލެންޑް ގޭމްސްއިން ފުރުޞަތު ގެއްލުނެވެ. އެކަމަކު ހިތްވަރާއެކު މަސައްކަތްކޮށް, އަނިޔާއިން ސަލާމަތްވެ އޭނާ އަންނަނީ އަލުން ތަފާތު ދައްކަމުންނެވެ. ގޭމްސްގައި ރާއްޖެއިން ވާދަކުރަނީ ހަތަރު ކުޅިވަރެއްގައެވެ. އެއީ އެތްލެޓިކްސްއާއި, ޓޭބަލް ޓެނިހާއި, ބެޑްމިންޓަންއާއި ސްވިމިންގ އެވެ. ހަތަރު ކުޅިވަރުން 7 އެތްލީޓުން ރާއްޖެ ތަމްސީލް ކުރާނެއެވެ. އެއީ ޓީޓީ ފިޔަވާ އަނެއް ތިން ކުޅިވަރުން ކޮންމެ ކުޅިވަރަކުން ދެ އެތްލީޓުންނެވެ.

ދިދަ ހަވާލުކުރުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ އެތްލީޓުން ރާއްޖެއަށް ރީތިނަން ހޯދައިދޭން މަސައްކަތް ކުރާނެކަމުގެ ޔަގީންކަން އެމަނިކުފާނަށް އޮތްކަމަށެވެ. އަދި އެތްލީޓުންނަށް އެމަނިކުފާނު ވަނީ ކާމިޔާބީއަށް އެދިވަޑައިގެންފައެވެ. ރައީސް ވިދާޅުވީ އަންނަ އަހަރުން ފެށިގެން ކުޅިވަރު ކުރިއަރުވަން ބަޖެޓުން ޚާއްޞަ ސަމާލުކަން ދެއްވާނެ ކަމަށެވެ. މީގެކުރިން ކުޅިވަރު ކުރިއަރުވަން ނުކުރާ ވަރަށް މަސައްކަތްތަކެއް މިސަރުކާރުން ކުރައްވާނެ ކަމަށް ވިދާޅުވިއެވެ.

ކުޅިވަރާއިބެހޭ ވަޒީރު ޑރ.އަބްދުالله ރާފިއު އެތްލީޓުންގެ ކިބައިން އެދިވަޑައިގަތީ އެންމެ ރަނގަޅަށް މަސައްކަތްކޮށް, ކުރިއަށްވުރެ ރަނގަޅު ނަތީޖާ ހޯދަން އަޒުމް ކަނޑައަޅައިގެން ގޭމްސްއަށް ދިއުމަށެވެ. ފްރާންސްގައި އޮލިމްޕިކްސް ފަށާނީ އަންނަ ބުދަ ދުވަހުއެވެ.