މިއީ ކުޅިވަރުގެ ސިޔާސަތު ބަދަލުކުރުމުގެ ނަތީޖާ: މިނިސްޓަރު މަޙްލޫފް

އިސްލާމިކް ސޮލިޑަރިޓީ ގޭމްސްގައި ރާއްޖޭގެ ޓޭބަލް ޓެނިސް (ޓީޓީ) ޓީމު ހޯދި ކާމިޔާބަކީ ކުޅިވަރުގެ ސިޔާސަތު ބަދަލުކުރުމުގެ ނަތީޖާކަމަށް ޔޫތު މިނިސްޓަރު އަޙުމަދު މަޙްލޫފް ވިދާޅުވެއްޖެއެވެ.

ތުރުކީގެ ކޮންޏާގައި ކުރިއަށްދާ އިސްލާމިކް ސޮލިޑަރިޓީ ގޭމްސްގައި އަންހެން ޓީޓީ ޓީމު ވަނީ ލޯ މެޑަލް ހޯދާފައެވެ. މިއީ އިސްލާމިކް ސޮލިޑަރިޓީ ގޭމްސްގައި ރާއްޖެއިން މެޑަލް އެއް ހޯދި ފުރަތަމަ ފަހަރެވެ.

މިކަމާ ގުޅިގެން މިނިސްޓަރު މަޙްލޫފް ކުރެއްވި ޓުވީޓެއްގައި ވިދާޅުވީ، ކައިރި މުސްތަޤުބަލް އެއްގައި ޓީޓީ ކަހަލަ ކުޑަ ކުޅިވަރަކުން ބޮޑު ގޭމެއްގައި ވާދަކޮށް، މެޑަލް އެއް ލިބިދާނެކަމަށް ބައެއް މީހުންނަށް ޤަބޫލުކުރަން ދަތިވެފައި އޮންނަ ކަމަށެވެ. ނަމަވެސް މާތްﷲގެ އިރާދަފުޅާއެކު ރާއްޖޭގެ ޓީޓީ ޓީމުން މިވަނީ ކުޅިވަރުގެ ތާރީޚުގައި ލިބުނު އެންމެ މަތީ ކާމިޔާބް ހޯދާފައިކަމަށް ވިދާޅުވެފައި ވެއެވެ.

56 ގައުމު ވާދަކުރި އިސްލާމިކް ސޮލިޑަރިޓީ ގޭމްސްގައި ލޯ މެޑަލް ހޯދައި، ދިވެހި ދިދަ އެންމެ އުހުގައި ވިހުރާލަދިން ޓީމަށާއި، ބެލެނިވެރިންނަށް މިނިސްޓަރު ވަނީ ޝުކުރުއަދާކުރައްވާފައެވެ. މީގެ އިތުރުން ޓީޓީ އެސޯސިއޭޝަންގެ ރައީސް އަލީ ރަޝީދް އާއި އެކްސްކޯއިން ކުރާ މަސައްކަތަށް ވެސް ވަނީ ޝުކުރު އަދާކުރައްވާފައެވެ.

މީގެ އިތުރުން މިނިސްޓަރު ވިދާޅުވީ މިއީ ފާއިތުވި ހަތަރު އަހަރުގެ ތެރޭގައި ކުޅިވަރުގެ ސިޔާސަތަށް ގެނެވުނު ބަދަލުގެ ނަތީޖާކަމަށެވެ. އޭގެ ތެރޭގައި ކުދި ކުޅިވަރުތަކާއި، ބޮޑެތި ކުޅިވަރުތަކުގެ މެދުގައި އޮންނަ ތަފާތު ކުރުން ނައްތާލައި، ދެ ޖިންސުގެ ހަމަހަމަކަމަށް އިސްކަން ދިނުމުގެ އިތުރުން ކުޅިވަރުގެ ތެރެއަށް ސިޔާސީ ކަންކަން ނުވައްދާ ކުރެވުނު މަސައްކަތް ހިމެނޭ ކަމަށް މަޙްލޫފް ވަނީ ފާހަގަކުރައްވާފައެވެ. ހަމައެއާއެކު މިއީ ޓީޓީ އެހެން ހަރުފަތަކަށް ގެންދިޔުމަށް ކުރެވުނު ބޮޑު ހޭދައިގެ ނަތީޖާކަމަށް ފާހަގަކުރައްވާ މިނިސްޓަރު ވަނީ އެކަންކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ދެއްވާ އެހީތެރިކަމާއި، އިރުޝާދަށް ޝުކުރު އަދާކުރައްވާފައެވެ.

ޓީޓީ ކުރިއެރުވުމަށް ކުރާ މަސައްކަތުގެ ތެރެއިން ރާއްޖޭގެ ޓީޓީ ތަރި ފާތިމަތު ދީމާ އަލީ ރާއްޖެއިން ބޭރުން ތަމްރީނުތައް ފުރިހަމަކުރިކަން މިނިސްޓަރު ވަނީ ފާހަގަކުރައްވާފައެވެ. އަދި އިސްލާމިކް ސޮލިޑަރިޓީ ގޭމްސް އަށް ފަހު، ދީމާ ފްރާންސްގައި ތަމްރީނުތަކެއް ފުރިހަމަ ކުރާނެ ކަމަށް މަޙްލޫފް ވަނީ ވިދާޅުވެފައެވެ. މީގެ އިތުރުން އައިޝަތު ރަފާ ނާޒިމް، މުޙައްމަދު ތާބިން ސުޖާއު އަދި އަހްޔަރު ކްރޮއޭޝިއާއަށް ފަރިތަކުރުންތަކަށް ދާނެ ކަމަށް ވެސް ވަނީ ވިދާޅުވެފައެވެ.

އިތުރަށް މަޙްލޫފް ވިދާޅުވީ މިހާރު އެންމެ ބޮޑު ފޯކަސްއެއް ކުރެވިފައިވަނީ ބީޗް ވޮލީ ބޯޅައަށް ކަމަށެވެ. ބީޗް ވޮލީއިން ކައިރީ މުސްތަގުބަލް އެއްގައި ރަން ވަނަތަކެއް ހޯދުމުގެ މަސައްކަތް ފަށާފައިވާ ކަމަށް މިނިސްޓަރު ވަނީ ވިދާޅުވެފައެވެ. ރާއްޖޭގެ ބީޗު ވޮލީ ޓީމަށް މިހާރު އިރުޝާދު ދެނީ ވިނީިޝިއުސް މާޓިން ޖިއޯނީއެވެ. އޭނާގެ އިރުޝާދުގެ ދަށުން ބީޗް ވޮލީ ޓީމު އަންނަނީ ކުރިއެރުންތަކެއް ހޯދަމުންނެވެ.

މި ސަރުކާރުން އަންނަނީ ރާއްޖޭގެ ކުޅިވަރު އެހެން ހަރުފަތަަކަށް ގެންދިޔުމަށް ގިނަ ގުނަ މަސައްކަތްތަކެއް ކުރަމުންނެވެ.