ކޮމަންވެލްތު ގޭމްސްގައި ދިވެހި ދިދަ އުފުލުމުގެ ޝަރަފު ޖުމާނާ އާއި ޒަޔާނަށް

މިއަހަރުގެ ކޮމަންވެލްތު ގޭމްސްގައި ދިވެހި ދިދަ އުފުލުމުގެ ޝަރަފު ޤައުމީ ޓީމުގެ ޓޭބަލް ޓެނިސް ކުޅުންތެރިޔާ ފާތިމަތު ޖުމާނާ ނިމާލާއި، ބެޓްމިންޓަން ކުޅުންތެރިޔާ ޒަޔާން ޒަކީއާ ހަވާލުކޮށްފިއެވެ.

މިއަހަރުގެ ކޮމަންވެލްތު ގޭމްސް ފަށާނީ އަންނަ ބުރާސްފަތި ދުވަހު ރޭއެވެ. ގޭމްސް ކުރިއަށް ދާނީ އިނގިރޭސި ވިލާތުގެ ބާމިންހަމްގައެވެ. ދިދަ އުފުލާ އެތުލީޓުންނަށް ދިދަ ހަވާލުކޮށްދެއްވީ އެތުލީޓްސް ވިލެޖުގައި ބޭއްވި ރަސްމިއްޔާތެއްގައި ޔޫތު މިނިސްޓަރު އަޙުމަދު މަޚްލޫފާއި، އޮލިމްޕިކް ކޮމެޓީގެ ރައީސް މުޙައްމަދު ޢަބްދުއް ސައްތާރު (ޗަމްޕީ)އެވެ.

ތިރީހަކަށް ހާސް މީހުންގެ ކުރިމަތީގައި ދިވެހި ދިދަ އުފުލާ ޖުމާނާ ކޮމަންވެލްތު ގޭމްސްގައި ބައިވެރިވާ މިއީ ހަތަރު ވަނަ ފަހަރެވެ. އަދި ޒަޔާން ބައިވެރިވާ ތިން ވަނަ ފަހަރެެވެ.

މިއަހަރުގެ ކޮމަންވެލްތު ގޭމްސްގައި ރާއްޖެ ވާދަކުރާނީ ފަސް ކުޅިވަރެއްގައެވެ. އެއީ ޓޭބަލް ޓެނިސް (ޓީޓީ)، އެތުލެޓިކްސް، ފެތުން، ބީޗްވޮލީ ބޯޅަ އަދި ބެޑްމިންޓަންއެވެ. ގޭމްސްގައި ރާއްހޭގެ 46 އެތުލީޓުންނޏާއި އޮފިޝަލުން ބައިވެރިވާނެއެވެ.

ރާއްޖޭގެ ޓީޓީ އަންހެން ޓީމުގައި ހިމެނެނީ ފާތިމަތު ދީމާ އަލީ، އައިޝަތު ރަފާ ނާޒިމް، މިޝްކާ މުޙައްމަދު އިބްރާހިމް، މަލާކް ބިންތި މުއިއްޒު އަދި ޖުމާނާއެވެ. މީގެ އިތުރުން ފިރިހެން ތަރި މޫސާ މުންސިފް ވާދަކުރާނީ ޓީޓީ އޯޕަންސް ބައިގައެވެ. ގޭމްސްގައި ރާއްޖޭގެ ބީޗްވޮލީބޯޅަ ޓީމުގައި ހިމެނެނީ، އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)އެވެ.

މިއަހަރުގެ ގޭމްސްގައި ވާދަކުރާ ރާއްޖޭގެ ބެޑްމިންޓަން ޓީމުގައި ހިމެނެނީ، މުޙައްމަދު އަޖުފާން ރަޝީދު، ނިބާލް އަޙުމަދު، އައިމިނަތު ނަބާހާ އަބްދުލް ރައްޒާގު އަދި ފާތިމަތު ނަބީހާ އަބްދުލް ރައްޒާގު، ޒަޔާން އަދި ރިޝްވާން ޝިޔާމްއެވެ. މިއީ ކުލަބްތަކާ ގުޅިގެން ގައުމީ ބެޑްމިންޓަން ސްކޮޑެއް އެކުލަވާލެވުނު ފުރަތަމަ ފަހަރެވެ.

ޤައުމީ އެތުލެޓިކްސް ޓީމުގައި ހިމެނެނީ، ޙަސަން ސާއިދު، ރޫޔާ އަލީ، އައިޝަތު ހިމްނާ ހަސަން، މަރިޔަމް އަލްހާ ހުސައިން، އާމިނަތު ލަޔާނާ މުޙައްމަދު އަދި ރިފާ މުޙައްމަދެވެ. ސްވިމިން ޓީމަށް ބަލާއިރު، ސްކޮޑުގައި ހިމެނެނީ އައިޝަތު ސައުސަން، މުބާލް އައްޒާމް އިބްރާހިމް، މުޙައްމަދު ރިހާން ޝިހާމް، އާން ހުސެއިން އަދި ހަމްނާ އަޙުމަދެވެ.

އެންމެ ފަހުން ރާއްޖެއިން ކޮމަންވެލްތު ގޭމްސްގައި ބައިވެރިވީ 2014 ވަނަ އަހަރުއެވެ. ނަމަވެސް އޭގެ ފަހުން ކުރީގެ ރައީސް ޢަބްދުﷲ ޔާމީންގެ ސަރުކާރުން ކޮމަންވެލްތުން ވަކިވާން 2016 ވަނަ އަހަރު ނިންމުމާއެކު، ރާއްޖެއަށް ފުރުސަތު ގެއްލުނެވެ. އެގޮތަށް ނިންމުމުގެ ސަބަބުން 2018 ވަނަ އަހަރު އޮސްޓްރޭލިއާގެ ގޯލްޑް ކޯސްޓުގައި ބޭއްވި ކޮމަންވެލްތު ގޭމްސްގައި ރާއްޖެއަށް ބައިވެރިއެއް ނުވެވުނެވެ. އަލުން އަނބުރާ ކޮމަންވެލްތާ ގުޅުމަކީ އަދުގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ރިޔާސީ ވައުދުފުޅެކެވެ. ރައީސްގެ ވެރިކަމުގެ ފުރަތަމަ 100 ދުވަހުގެ ތެރޭގައި ކޮމަންވެލްތާ ގުޅެން މަޖިލީހަށް ހުށަހަޅައި، އެކަން ފާސްކުރިއެވެ. އެއާއެކު ކޮމަންވެލްތު ގޭމްސްގައި ބައިވެރިވުމުގެ ފުރުސަތު ރާއްޖެއަށް ލިބުނުކަން ހާމަކުރީ 2020 ވަނަ އަހަރުއެވެ.