އެމްއޯސީގެ މިއަހަރުގެ އާމްދަނީގެ ގޮތުގައި 50 މިލިއަން ބަޖެޓްކޮށްފި

މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ މިއަހަރުގެ އާމްދަނީގެ ގޮތުގައި 50 މިލިއަން ރުފިޔާ ބަޖެޓްކޮށްފިއެވެ.

އެމްއޯސީގެ މިއަހަރުގެ ބަޖެޓް ފާސްކޮށްފައި ވަނީ ހޮނިހިރު ދުވަހު ބޭއްވި ކޮމިޓީގެ އަހަރީ އާންމު ޖަލްސާގައެވެ. ލިބޭ އާމްދަނީއަށްވުރެ ހޭދަވާ ޚަރަދު ކުޑަ މި އަރަނި ބަޖެޓުގައި މިއަހަރަށް ކަނޑައަޅާފައިވަނީ 47 މިލިއަން ރުފިޔާ ޚަރަދު ކުރުމަށެވެ. އެއީ ބައިނަލްއަގުވާމީ ފަސް ގޭމްސްއެއްގައި ރާއްޖެ ވާދަކުރުމަށާއި، ސްކޮލަޝިޕްތަކާއި ގޭމްސްތަކުގެ ތައްޔާރީތައް ވުމުގެ އިތުރުން އޮލިމްޕިކް ކޮމިޓީގެ މުވައްޒަފުންނާއި ކުޅިވަރު އެސޯސިއޭޝަނަށް ފަހިކޮށްދޭ އެކި ފުރުސަތުތަކަށް ހިނގާނެ ހަރަދުތައް ކުރުމަށެވެ.

އެމްއޯސީއިން މިއަހަރު ބައިވެރިވުމަށް ކަނޑައަޅާފައިވަނީ ފަސް ގޭމްސްއެއްގައެވެ. އެއީ އޭޝިއަން ގޭމްސް، ކޮމަންވެލްތު ގޭމްސް، އޭޝިއަން ޔޫތު ގޭމްސް، އިސްލާމިކް ސޮލިޑާރިޓީ ގޭމްސް އަދި ޗިލްޑްރަންސް އޮފް އޭޝިއާ ގޭމްސްއެވެ. މި ގޭމްސްތަކަށް ޚަރަދުވާނެކަމަށް އަންދާޒާ ކުރެވެނީ 36 މިލިއަން ރުފިޔާއެވެ.

މިއަހަރު ރަޝިޔާގައި ބޭއްވުމަށް ހަމަޖެހިފައިވާ ޗިލްޑްރަންސް އޮފް އޭޝިއާ ގޭމްސް  ކެންސަލް ކުރާނެކަމަށް ޗިލްޑްރަންސް އޮފް އޭޝިއާ އިންޓަނޭޝަނަލް ސްޕޯޓްސް ގޭމްސް ކޮމިޓީން ވަނީ އިޝާރާތެއް ދީފައެވެ. ނަމަވެސް މިއަހަރުގެ ބަޖެޓް ހަދާފައިވަނީ އެމުބާރާތަށް ހިނގާނެ ޚަރަދުތައްވެސް ހިމަނައިގެން ކަމަށް އެމްއޯސީގެ ސެކެރެޓްރީ ޖެނަރަލް ތަމޫހް އަހްމަދު ސައީދު ވިދާޅުވިއެވެ.

އޮލިމްޕިކް ކޮމިޓީގެ ރައީސް މުހައްމަދު އަބްދުލް ސައްތާރު ވިދާޅުވީ އެމްއޯސީން މަސައްކަތް ކުރާނީ ކުޅިވަރު އެސޯސިއޭޝަންތަކާއި ވަރަށް ގާތް ގުޅުމެއް ބާއްވައިގެން ކަމަށެވެ. އެގޮތުން އެސޯސިއޭޝަންތަކުގެ މެމްބަރުން މިހާރުވެސް ކޮމިޓީގައި ތިބުމާއެކު ވަރަށް ގާތް ގުޅުމެއް އުފެދިފައިވާ ކަމަށް ވިދާޅުވިއެވެ.

އޮލިމްޕިކް ކޮމިޓީން އަންނަނީ ކުރިއަށް އޮތް 10 އަހަރު ދުވަހަށް ސްޓްރެޓީޖިކް އެކްޝަން ޕްލޭނެއް އެކުލަވާލުމުގެ މަސައްކަތް ކުރަމުންނެވެ. ސައްތާރު ވިދާޅުވީ މިއީ ރާއްޖޭގެ ކުޅިވަރު ބައްޓަން ކުރަން ބައިނަލްއަގުވާމީ ފްރޭމްވޯކެއްގެ ތެެރެއިން ކުރެވޭ ކަމެއް ކަމަށެވެ.