ދިދަ އުފުލުމުގެ ފުރުސަތު ލިބުމަކީ ޝަރަފެއް، އުންމީދަކީ ރަނގަޅު ނަތީޖާއެއް ހޯދުން: ޖުމާނާ އަދި ޒަޔާން

މިއަހަރުގެ ކޮމަންވެލްތު ގޭމްސްގައި ދިވެހި ދިދަ އުފުލާލުމުގެ ފުރުސަތު ލިބުމަކީ ވަރަށް ބޮޑު ޝަރަފެއްކަމަށް ޖުމާނާ ނިމާލް އާއި ޒަޔާން ޒަކީ ބުނެފިއެވެ.

މި ދެ އެތުލީޓުންނާ މިހާރު ވަނީ ރަސްމީކޮށް ދިދަ ހަވާލުކޮށްފައެވެ. މިކަމާ ގުޅޭ ގޮތުން ޤައުމީ ބެޓްމިންޓަން ކުޅުންތެރިޔާ ޒަޔާން ބުނީ މިއީ އޭނާގެ ތިން ވަނަ ކޮމަންވެލްތު ގޭމްސް ކަމަށާއި، މި ގޭމްސްގައި ދިވެހި ދިދަ އުފުލާލުމުގެ ފުރުސަތު ލިބުމަކީ އޭނާގެ ކެރިއަރުގައި ލިބުނު އެންމެ ބޮޑެ އެއް ފަޚުރުކަމަށެވެ.

މިއީ ކޮމަންވެލްތު ގޭމްސްގައި ތަޖުރިބާކާރު ޓޭބަލް ޓެނިސް (ޓީޓީ) ކުޅުންތެރިޔާ ޖުމާނާ ވާދަކުރާ ހަތަރު ވަނަ ފަހަރެވެ. ޒަޔާންއެކޭ އެއް ގޮތަށް ޖުމާނާ ދެކެ ގޮތުގައި ވެސް ލިބުނު ފުރުސަތަކީ ފަޚުރުވެރިވާ ފުރުސަތެކެވެ. ޖުމާނާގެ ވެސް އުންމީދަކީ މިއަހަރުގެ ކޮމަންވެލްތު ގޭމްސްގައި ރާއްޖެއަށް ރީތި ނަމެއް ހޯދައިދިނުމެވެ.

މިއަހަރުގެ ކޮމަންވެލްތު ގޭމްސް ފަށާނީ އަންނަ ބުރާސްފަތި ދުވަހު ރޭއެވެ. ގޭމްސް ކުރިއަށް ދާނީ އިނގިރޭސި ވިލާތުގެ ބާމިންހަމްގައެވެ. ދިދަ އުފުލާ އެތުލީޓުންނަށް ދިދަ ހަވާލުކޮށްދެއްވީ އެތުލީޓްސް ވިލެޖުގައި ބޭއްވި ރަސްމިއްޔާތެއްގައި ޔޫތު މިނިސްޓަރު އަޙުމަދު މަޚްލޫފާއި، އޮލިމްޕިކް ކޮމެޓީގެ ރައީސް މުޙައްމަދު ޢަބްދުއް ސައްތާރު (ޗަމްޕީ)އެވެ.

މިއަހަރުގެ ކޮމަންވެލްތު ގޭމްސްގައި ރާއްޖެ ވާދަކުރާނީ ފަސް ކުޅިވަރެއްގައެވެ. އެއީ ޓޭބަލް ޓެނިސް (ޓީޓީ)، އެތުލެޓިކްސް، ފެތުން، ބީޗްވޮލީ ބޯޅަ އަދި ބެޑްމިންޓަންއެވެ. ގޭމްސްގައި ރާއްހޭގެ 46 އެތުލީޓުންނާއި އޮފިޝަލުން ބައިވެރިވާނެއެވެ.

މިއަހަރުގެ ގޭމްގައި ރާއްޖެއިން ބައިވެރިވަނީ މެދު ކެނޑުމަކަށްފަހު އެވެ. ކުރީގެ ރައީސް ޢަބްދުﷲ ޔާމީންގެ ސަރުކާރުން 2016 ވަނަ އަހަރު ކޮމަންވެލްތުން ވަކިވާން ނިންމުމާއެކު، ރާއްޖެއަށް ވަނީ ގޭމްސްގެ ފުރުސަތު ގެއްލިފައެވެ. ރާއްޖެއިން ކޮމަންވެލްތުގައި އަލުން ބައިވެރިވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ސަރުކާރުގައެވެ. އެއާއެކު ކޮމަންވެލްތު ގޭމްސްގައި ބައިވެރިވުމުގެ ފުރުސަތު ރާއްޖެއަށް ލިބުނުކަން ހާމަކުރީ 2020 ވަނަ އަހަރުއެވެ.