ހުރިހާ ވިސްނުމެއް ހުރީ ފުޓުބޯޅައަށް ކަމަށާއި، ސިޔާސީ ކަންކަމަށް ނުވަތަ އިތުރު ކަމަށް ފަރުވާލެއް ނެތް ކަމަށް އާސެނަލްގެ ކޯޗް އާސެން ވެންގާ ބުނެފިއެވެ.
ވެންގާ މިހެން ބުނެފައިވަނީ ހޮނިހިރު ދުވަހު ސްޓްރޯކް ސިޓީގެ މައްޗަށް 4-1 ގެ ނަތީޖާއަކުން ކުރިހޯދި މެޗަށް ފަހު ބޭއްވި ޕްރެސްގައި ވާހަކަ ދައްކަމުންނެވެ.
އެ މެޗުގައި ވެންގާގެ އިސްތިއުފާއަށް ގޮވައި ބޮޑު ބެނާއެށް ވަނީ ދަނޑުގައި ދަމާފައެވެ. ސަޕޯޓަރުންގެ މި ބަސްތަކަށް ރައްދު ދެމުން ވެންގާ ބުނެފައިވަނީ، އޭނާގެ ވިސްނުން ހުރީ ހަމައެކަނި ފުޓުބޯޅައަށް ކަމަށާ، އިތުރު އެއްވެސް ކަމަކަށް ނުވަތަ ސިޔާސީ ކަންކަމަށްވެސް އޭނާގެ އެއްވެސް ފަރުވާލެއް ނެތް ކަމަށެވެ.
ޕްރެސްގައި ވާހަކަ ދައްކަމުން ވެންގާ ބުނެފައިވަނީ، އޭނާގެ އިސްތިއުފާއަށް އެދި ދަމާ ބެނާއަކުން ނުވަތަ ކުރާ އެއްވެސް ކަމަކުން އޭނާއަށް އެއްވެސް އަސަރެއް ނުކުރާ ކަމަށާއި، މިވަގުތު އޭނާ ސަމާލުކަން ދޭން ބޭނުންވާ ހަމައެކަނި ކަމަކީ ފުޓުބޯޅަ ކަމަށެވެ.
ވެންގާ ބުނެފައިވަނީ އޭނާ އަކީ ކުޅިވަރުގެ މީހެއް ކަމަށާ، އޭނާ ކުޅިވަރު ދެކެ ވަރަށް ލޯބިވާ ކަމަށެވެ. އެގޮތުން އޭނާއަކީ އޭނާ ލޯބިވާ ކަމަކަށް ދުވާލަކު 24 ގަޑިއިރު ހޭދަކުރާ މީހެއް ކަމަށްވެސް ވެންގާ ވަނީ ބުނެފައެވެ.
މީގެ އިތުރުންވެސް ވެންގާ ބުނެފައިވަނީ، އޭނާއަކީ އޭނާ ވަރަށް ލޯބިވާ ކުލަބަކަށް ކޯޗުކަން ކޮށްދޭ މީހެއް ކަމަށާއި، އެހެންކަމުން އާސެނަލްގައި ހުރިހާ ދުވަހަކު އޭނާ މަސައްކަތް ކުރާނީ ހަމައެކަނި ފުޓުބޯޅައަށް ސަމާލުކަން ދީގެން ކަމަށެވެ.
ވެންގާ ބުނީ އޭނާގެ މި ބަހަށް ތާއީދު ކުރާ މީހުންވެސް އަދި ދެކޮޅުހަދާ މީހުންވެސް ތިބި ކަމަށާ، ނަމަވެސް އެކަންކަމަށް އޭނާގެ އެއްވެސް ސަމާލުކަމެއް ނެތް ކަމަށެވެ.
ފަހަކަށް އައިސް އާސެނަލްއިން ނެރެމުންދާ ދަށް ނަތީޖާ ތަކުގެ ސަބަބުން އާސެނަލް ގެ ގިނަ ސަޕޯޓަރުންތަކެއް އަންނަނީ ވެންގާގެ އިސްތިއުފާއަށް ގޮވައި މެޗުތަކުގައި އަޑު އުފުލަމުންނެވެ. އަދި މި ދަނޑިވަޅުގައި އެޓީމުގެ އެންމެ މުހިންމު އެއް ކުޅުންތެރިޔާ މެސުތު އޮޒިލްވެސް ވަނީ، މި ސީޒަނުގައި އާސެނަލްގެ ނަތީޖާ ރަނގަޅު ނޫން ނަމަ ކުލަބު ދޫކޮށްލާނެ ކަމަށް ބުނެފައެވެ.
