މާޒިޔާ މެޗަށްފަހު އޮތް ނޫސްވެރިންގެ ބައްދަލުވުމުގައި ނިޒާމްބެ ހުރީ ހަނު!

މާލޭ ލީގުގައި މާޒިޔާ ސްޕޯޓްސް އެންޑް ރިކްރިއޭޝަން އަތުން 0-3 ގެ ނަތީޖާއިން ޓީސީ ބަލިވި މެޗަށްފަހު އޮތް ނޫސްވެރިންގެ ބައްދަލުވުމުގައި ޓީސީގެ ކޯޗު މުހައްމަދު ނިޒާމް (ނިޒާމްބެ) ހަނު ހުރެފި އެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ނޫސްވެރިންގެ ބައްދަލުވުމަށް ނިޒާމްބެއަށް ފުރަތަމަ އިޝާރާތްކުރުމުން އެކަމަށް ވަނީ އިންކާރުކޮށްފައެވެ. އެހެންނަމަވެސް ނިޒާމްބެ ވަނީ ފަހުން ނޫސްވެރިންގެ ބައްދަލުވުމަށް ހާޒިރުވެފައެވެ. އެހެންނަމަވެސް ނޫސްވެރިން ތަކުރާރުކޮށް ނިޒާމްބެއާ ސުވާލުކޮށްފައިވާއިރު، ނިޒާމްބެ އެއްވެސް ސުވާލަކަށް ޖަވާބެއް ނުދެއެވެ.

އެފްއޭއެމްގެ ގަވައިދުބުނާ ގޮތުން ނޫސްވެރިންގެ ބައްދަލުވުމަށް ހާޒިރުނުވެއްޖެ ނަމަ އެ އިދާރާއިން ފިޔަވަޅުތަކެއް އަޅާނެއެވެ.

ބެލެވޭ ގޮތުގައި ނިޒާމްބެ ހިތްހަމަނުޖެހިފައިހުރީ ރެފްރީގެ ނިންމުންތަކާމެދުގައެވެ. އެހެންނަމަވެސް ނިޒާމްބެ ނޫސްވެރިންގެ ސުވާލުތަކަށް އެއްވެސް ވަރެއްގެ ކޮމެންޓެއް ކޮށްފައި ނުވާތީ އެކަން ކަށަވަރެއް ނުވެއެވެ.

މެޗުގެ ފަހުވަގުތު ކޮޅު ތެރޭގައި އަސަދުﷲ އަބްދުﷲ ކުރި ފައުލަކާ ގުޅިގެން ޓީސީގެ ބެންޗު ވަރަށް ހޫނުވިއެވެ. އެގޮތުން ރެފްރީ ވަނީ ބެންޗުގައި ހުރި ޓީސީގެ ދެވަނަ ކީޕަރު މުހައްމަދު އިމްރާން އަށް ސީދާ ރަތްކާޑެއް ދައްކާ ދަނޑުން ފޮނުވާލާފައެވެ.

މެޗުގެ ފުރިހަމަ ވަގުތު ހަމަވެގެން ރެފްރީ 4 މިނެޓު އިތުރުވަގުތު ކުޅުމަށް ދައްކާފައިވާއިރު، އެ ހަތަރު މިނެޓު ހަމަވާން ސިކުންތުކޮޅަކަށްވެފައިވަނިކޮށް މާޒިޔާގެ ހާފުން ޓީސީ އަށް އެއްލުމެއް ލިބުނު ނަމަވެސް ރެފްރީ ވަނީ މެޗު ނިންމާލާފައެވެ. ނިޒާމްބެ ވަނީ މެޗު ނިމުމުން ރެފްރީ ކައިރިޔަށް ގޮސް ހިތްހަމަނުޖެހުން ފާޅުކޮށްފައެވެ.

ޓީސީ މި ސީޒަނުގައި ކުޅުނު ހަތް މެޗުގެ ތެރެއިން ތިން މެޗުން ބަލިވެފައިވާއިރު، ތިން މެޗުން އެޓީމު ވަނީ މޮޅުވެފައެވެ. އަނެއް މެޗު ނިމުނީ އެއްވަރުވެގެންނެވެ.