ރޭންކުތަކަށްފަހު ރާއްޖެ އޭޝިއަން ކަޕް ކޮލިފައިންގެ ފައިނަލް ބުރަށް

އޭއެފްސީން ކަނޑައެޅި އައު ރޭންކްތަކަށްފަހު ރާއްޖެއަށް 2023 ވަނަ އަހަރުގެ އޭޝިއަން ކަޕް ކޮލިފައިންގެ ފައިނަލް ބުރުން ފުރުސަތު ލިބިއްޖެއެވެ.

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެއިން ވަނީ އަންގާރަ ދުވަހުގެރޭ ފިލިޕީންސާ 1-1 ގެ ނަތީޖާއަކުން އެއްވަރުވެފައެވެ. އެއާއެކު އަށް މެޗުން ހަތް ޕޮއިންޓް ހޯދައިގެން ރާއްޖެއަށް ލިބުނީ ކޮލިފައިންގެ ހަތަރުވަނައެވެ. ފުލުގައި ޕޮއިންޓެއް ނުލިބި ގުއާމް އޮތްއިރު، އެއްވަަނައިގައި އޮތީ ކުޅުނު އަށް މެޗުގެ ތެރެއިން ހަތް މެޗުން މޮޅުވެގެން 21 ޕޮއިންޓާއެކު ސީރިއައެވެ. ދެވަނައިގައި އޮތް ޗައިނާއަށް އަށް މެޗުން 19 ޕޮއިންޓް ލިބުނުއިރު، ތިންވަނައިގައި ފިލިޕީންސް އޮތީ އަށް މެޗުން 11 ޕޮއިންޓާއެކުއެވެ.

ފިލިޕީންސްއާ އެއްވަރުވުމުން މީގެ ކުރިން ބެލެވިފައި އޮތީ، އޭޝިއަން ކަޕުގެ ކޮލިފައިން ގްރޫޕް ސްޓޭޖަށް ވަންނަން ރާއްޖެއަށް ޕްލޭއޮފް ބުރުގައި ކުޅެން ޖެހޭނެ ކަމަށެވެ. އެކަަމަކު އޭއެފްސީން ބުދަ ދުވަހު ހާމަކޮށްފައިވާ ގޮތުން އުތުރު ކޮރެއާ ކޮލިފައިންއިން ވަކިވެ، ގަތަރު އޭޝިއަން ކަޕަށް ކޮލިފައިވުމާއެކު، ގްރޫޕް ތަކުގެ ފުލަށްދާ ޓީމާ ދެކޮޅަށް ދެވަނައިގައި ނިންމި ޓީމުތަކާއި، ހަތަރުވަނައިގައި ނިންމި ޓީމުތަކުން ކުޅުނު މެޗުތަކުގެ ޕޮއިންޓްތައް ނުގުނާއެވެ.

އެ ގޮތަށް ރޭންކިން ތަރުތީބުކޮށްގެން ގެނެވުނު ބަދަލުގެ ތެރެއިން ގިނަ ގައުމުތަކަށް އޭޝިއަން ކަޕުގެ ކޮލިފައިންގެ ފައިނަލް ބުރުން ފުރުސަތު ލިބުނިއިރު، އޭގެ ތެރޭގައި ރާއްޖެވެސް ވަނީ ހިމެނިފައެވެ. ރާއްޖެ އާއެކު ހަތަރުވަަނައިގައި ނިންމި ގައުމުތައް ކަމަށްވާ ނޭޕާލް، ހޮން ކޮންގް، ސިންގަޕޫރު، އަފްޣާނިސްތާން، މޮންގޯލިއާ، ތައިލެންޑް އަދި ސްރީލަންކާވެސް ވަނީ ކޮލިފައިންގެ ފައިނަލް ބުރުގައި ހިމެނިފައެވެ.

މިހާރު އޮތް ގޮތުން އޭޝިއަން ކަޕްގެ ކޮލިފައިންގެ ފައިނަލް ބުރުގައި ހަ ގްރޫޕް ހިމެނޭއިރު، ކޮންމެ ގްރޫޕެއްގައި ހަތަރު ގައުމު ވާދަކުރާނެއެވެ. އަދި އެ ގްރޫޕުތަކުގެ ތެރެއިން ކޮންމެ ގްރޫޕަކުން ދެ ގައުމެއް އޭޝިއަން ކަޕަށް ކޮލިފައިވާނެއެވެ.