ބަޣާވަތް ކުރި ލީޑަރު މާލީގެ ރައީސްކަމަށް

މާލީގެ ރައީސް ކަމަށް ބަޣާވާތުގައި އިސްކޮށް ހުންނެވި ސިފައިންގެ ކާނަލް އަދި ނައިބު ރައީސް އަސީމީ ގޮއިޓާ އައްޔަންކޮށްފިއެވެ.

މާލީގެ ދުސްތޫރީ ކޯޓުން ނެރުނު އަމުރުގައި ވަނީ މަދަނީ ސަރުކާރެއް ގާއިމު ކުރެވެންދެން އިންތިގާލީ ސަރުކާރުގެ ރައީސް ކަމުގައި ހުންނަވާނީ ގޮއިޓާ ކަމަށެވެ. އަދި އެގޮތަށް ނިންމާފައިވަނީ ކުރީގެ ރައީސް ބާ އެންޑޯ އިސްތިއުފާ ދެއްވުމުން މަގާމު ހުސްވެފައިވާތީ ކަމަށެވެ.

މާލީގެ އަސްކަރިއްޔާއިން މިދިޔަ އޮގަސްޓު މަހު ފުރަތަމަ ބަޣާވާތް ކުރީ އޭރުގެ ރައީސް އިބްރާހީމް ބޫބަކާރު ކެއިޓާއާ ދެކޮޅަށް އެގައުމުގައި ބޮޑެތި މުޒާހަރާތަކެއް ބާއްވާތާ މަސްތަކެއް ފަހުންނެވެ. އަދި މާލީގެ ވެރިކަމާ އަސްކަރިއްޔާއިން ހަވާލުވެއްޖެ ނަމަ ސަރަހައްދީ ގައުމުތަކުން ދަތިކުރުމުގެ ފިޔަވަޅު އަޅާނެ ކަމުގެ އިންޒާރު ދިނުމުން، އެގައުމުގައި އަންނަ ފެބުރުއަރީ މަހުގައި ރިޔާސީ އިންތިހާބެއް ބާއްވަން ނިންމައި، މަދަނީ ސަރުކާރެއް އެކުލަވާލައި، އެ ސަރުކާރުގެ ރައީސްކަމަށް ގޮއިޓާ ހަވާލުވެވަޑައިގެންނެވިއެވެ. އަދި ސިފައިންނަށް ކެބިނެޓުގެ މުހިންމު މަގާމުތަކެއް ހަވާލުކުރެއްވިއެވެ.

އެކަމަކު އެ ސަރުކާރަށް ބަދަލުގެނެސް، ސިފައިންގެ ދެމީހެއްގެ މަގާމު އަތުލި ފަހުން، މިދިޔަ ހޯމަ ދުވަހު އަސްކަރިއްޔާއިން ރައީސް އެންޑޯ އާއި ބޮޑުވަޒީރު މޮކްޓާ އާން ހައްޔަރު ކުރިއެވެ. އަދި އެ ދެބޭފުޅުން ހައްޔަރުން ދޫކޮށްލީ ބުދަ ދުވަހު މަގާމުން އިސްތިއުފާ ދިނުމުންނެވެ.

މާލީގެ ރައީސް ކަމުން އެންޑޯ އަދި މޮކްޓާ އިސްތިއުފާ ދެއްވާފައިވަނީ އދ. އަދި އެފްރިކަން ޔޫނިއަނުން މާލީގެ އަސްކަރިއްޔާއިން ހިންގި ބަޣާވާތް ކުށްވެރިކޮށްފައި ވަނިކޮށެވެ.