ބާސާއާއެކު ވައިނަލްޑަމް އެއްބަސްވުމަކަށް

ކުރިއަށް އޮތް ސީޒަނަށް ބާސެލޯނާއަށް ބަދަލުވާން ލިވަޕޫލް ދޫކޮށްލަން ނިންމާފައިވާ ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް އެއްބަސްވެފައިވާ ކަމަށް ރިޕޯޓުތައް ބުނެފިއެވެ.

ލިވަޕޫލާއެކު އުމުރުން 30 އަހަރުގެ ވައިނަލްޑަމް ހަދާފައިވާ އެއްބަސްވުން މި އަހަރުގެ ހޫނު މޫސުމުގައި ހަމަވާނެއެވެ. އެއާއެކު ވައިނަލްޑަމް ވަނީ މި ސީޒަނަށްފަހު ލިވަޕޫލް ދޫކޮށްލަން ނިންމާފައެވެ. އެގޮތުން އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ކްރިސްޓަލް ޕެލަސް އަތުން 2-0 ގެ ނަތީޖާއަކުން ލިވަޕޫލް މޮޅުވި މެޗަށް ފަހު ވައިނަލްޑަމް ވަނީ ލިވަޕޫލުގެ ސަޕޯޓަރުންނަށް އަލްވަދާއު ކިޔާފައެވެ.

ކުރިއަށް އޮތް ހޫނު މޫސުމުގައި ހިލޭ ޓްރާންސްފާއެއްގެ ދަށުން ވައިނަލްޑަމަށް ކުލަބު ބަދަލުކުރެވޭއިރު، ރިޕޯޓުތައް ބުނާ ގޮތުން އޭނާ މިހާރު ވަނީ ބާސާއާއެކު އެއްބަސްވުމުގައި ސޮއިކުރަން ނިންމާފައެވެ. އަދި ބާސާގެ އެއްބަސްވުން ވައިނަލްޑަމް ހަދާނީ 2024 ވަނަ އަހަރުގެ ޖޫން މަހުގެ ނިޔަލަށް ކަމަށްވެސް ރިޕޯޓުތައް ބުނެއެވެ.

ބާސާއަށް ބަދަލުވާން ވައިނަލްޑަމް އެއްބަސްވި ކަމަށް ރިޕޯޓުތައް ބުނިއިރު، މީގެ ކުރިންވެސް އޭނާ ހޯދަން ބާސާއިން ވަނީ މަސައްކަތް ކޮށްފައެވެ. ވައިނަލްޑަމަކީ ބާސާގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދުދީފައިވާ ކުޅުންތެރިއެކެވެ. އެހެންކަމުން ކޫމަނާއެކު އަލުން މަސައްކަތްކުރަން ވައިނަލްޑަމް ބޭނުންވާ ކަމަށްވެސް މީގެ ކުރިން ވަނީ ރިޕޯޓުކޮށްފައެވެ.

ލިވަޕޫލް ދޫކޮސް ވައިނަލްޑަމް ބާސާއަށް ބަދަލުވާއިރު، އޭނާ ހޯދަން ދުނިޔޭގެ ޗެމްޕިއަން ބަޔާން މިއުނިކާއި ޕީއެސްޖީންވެސް ވަނީ މަސައްކަތް ކޮށްފައެވެ. އެކަމަކު ޓްރާންސްފާއާ ގުޅޭ ގޮތުން ވައިނަލްޑަމް އެ ދެ ކުލަބާއެކު މަޝްވަރާކޮށްފައި ނުވާ ކަމަށް ރިޕޯޓުތައް ބުނެއެވެ.

ލިވަޕޫލުގައި ފަސް އަހަރު ހޭދަކުރުމަށް ފަހު އޭނާ އެ ޓީމު ދޫކޮށްލާއިރު، މީގެ ކުރިން ނިއުކާސަލް ޔުނައިޓެޑަށްވެސް ކުޅުނު ވައިނަލްޑަމް ލިވަޕޫލަށް ބަދަލުވީ 2016 ވަނަ އަހަރުއެވެ. އެއަށްފަހު އޭނާ ވަނީ ލިވަޕޫލަށް ކުޅެދިން 236 މެޗުގައި 22 ލަނޑު ކާމިޔާބުކޮށްފައެވެ. އަދި މި ފަހުން ލިވަޕޫލުން އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕް ކާމިޔާބުކުރިއިރު ވައިނަލްޑަމްގެ ހިއްސާ ބޮޑެވެ.