ބޫޓާން މެޗަށް ތައްޔާރުވުމުގެ ގޮތުން އަފްޣާނާ ދެކޮޅަށް ރާއްޖެ ނުކުންނަނީ

އޭޝިއަން ކަޕް ކޮލިފައިންގައި ބޫޓާނާ ދެކޮޅަށް ކުޅޭ މެޗަށް ތައްޔާރުވުމުގެ ގޮތުން އަފްޣާނިސްތާނާ ދެކޮޅަށް މެޗެއް ކުޅުމަށް ގައުމީ ފުޓްބޯޅަ ޓީމުން ތައްޔާރު ވެއްޖެއެވެ.

އަންނަ ޖޫންމަހުގެ 13 ވަނަ ދުވަހު ބޫޓާނާއި ދެކޮޅަށް ކުޅޭ މެޗަށް ތައްޔާރުވުމުގެ ގޮތުން ގައުމީ ޓީމު ކުޅޭ މެޗު އޮންނާނީ ޖޫންމަހުގެ 6 ވަނަ ދުވަހު ދުބާޢީގައެވެ.

އަފްޣާން މެޗުގެ އިތުރުން ގައުމީ ޓީމުގެ ތައްޔާރީތަކާ ގުޅޭ އެހެން އިންތިޒާމްތައް ގައުމީ ޓީމް ކޮމިޓީން އަންނަނީ ހަމަޖައްސަމުންނެވެ.

އޭޝިއަން ކަޕް ކޮލިފައިންގައި ރާއްޖެ ކުޅުނު ފުރަތަމަ މެޗުން ފަލަސްތީން އަތުން މާލޭގައި 3-0 އިން ވަނީ ބަލިވެފަ އެވެ.

ރާއްޖެ ހިމެނޭ ފަޅީގައި ބޫޓާނުގެ އިތުރުން ދެން ހިމެނެނީ އޮމާންއާ ފަލަސްތީނެވެ. އޮމާން ވަނީ ބޫޓާން އަތުން 0-14 އިން މޮޅުވެފައެވެ.

މި ސަރައްދުގައި ހިމެނޭ އެންމެ ވަރުގަދަ އެއް ގައުމުކަމަށްވާ އަފްޣާނިސްތާނާ ދެކޮޅަށް ރާއްޖޭގެ ޓީމުގެ ޖޫން ހަޔެއްގައި ނުކުންނައިރު، މީގެ ކުރިންވެސް މި ދެގައުމު ބައްދަލުކޮށްފައިވެއެވެ.

އެގޮތުން އެންމެ ފުރަތަމަ ބައްދަލުކުރި މެޗުގައި 2005 ގެ ސާފް ޗެމްޕިއަންޝިޕުގައި ރާއްޖެ ވަނީ 9-1 އިން އަފްގާން އަތުން މޮޅުވެފަ އެވެ.

އޭގެ ފަހުން 2014 ވަނަ އަހަރު ރާއްޖޭގައި ބޭއްވި އޭއެފްސީ ޗެލެންޖް ކަޕުގެ ތިން ވަނަ ހޮވި މެޗުގައި ޕެނަލްޓީ ޖަހައިގެން އަފްޣާނިސްތާން އަތުން ރާއްޖެ މޮޅުވެފައި ވެއެވެ.

ރާއްޖެ އާއި އަފްޣާނިސްތާން އެންމެ ފަހުން ބައްދަލުކުރީ 2015 ވަނަ އަހަރުގެ ސާފް ސުޒުކީ ކަޕުގަ އެވެ. އެ މެޗު އަފްޣާނިސްތާން ކާމިޔާބުކުރީ 4-1 އިންނެވެ.