ސޫކީ ކޯޓަށް ހާޒިރުކޮށްފި
ބަޣާވާތާ ދެކޮޅަށް މަދަނީ ބަސްނޭހުމުގެ މުޒާހަރާތަކެއް ދަނީ ކުރަމުން
މިޔަންމާގެ ކުރީގެ ލީޑަރު އަންގ ސަން ސޫކީ
މިޔަންމާގެ އަސްކަރިއްޔާއިން ފެބްރުއަރީ މަހު ބަޣާވާތް ކުރި ފަހުން ގޭ ބަންދުގައި ބެހެއްޓި، އެގައުމުގެ ކުރީގެ ލީޑަރު އަންގ ސަން ސޫކީ ފުރަތަމަ ފަހަރަށް ކޯޓަށް ހާޒިރުކޮށްފިއެވެ.
ރިޕޯޓްތައް ބުނާ ގޮތުން މީގެ ކުރިން ކޯޓު އަޑު އެހުންތަކުގަ އާއި ވަކީލުންގެ ބައްދަލުވުންތަކުގައި ހަމައެކަނި ވީޑިއޯ މެދުވެރިކޮށް ބައިވެރިވެވަޑައިގެންނެވި ސޫކީ ހޯމަ ދުވަހު ކޯޓަށް ވަނީ ހާޒިރު ކޮށްފައެވެ. އަދި އޭނާގެ ވަކީލުންގެ ޓީމާ ވާހަކަ ދެއްކެވި ކަމަށާއި ހާލު ރަނގަޅު ކަމަށް ބެލެވޭ ކަމަށް ވަކީލުންގެ ޓީމުން ބުންޏެވެ.
މިދިޔަ ފެބްރުއަރީ މަހު އަސްކަރިއްޔާއިން ވެރިކަން އަތުލި ފަހުން ސޫކީ ހުންނެވީ ގޭބަންދުގައި ބަހައްޓާފައެވެ. އަދި އޭނާގެ މައްޗަށް ކެމްޕޭން ކުރުމުގައި ކޮވިޑް-19އާ ގުޅުން ހުރި ގަވައިދުތަކާ ޚިލާފުވުމާއި ގަވައިދާ ޚިލާފަށް އެތެރެކޮށްފައިވާ ވޯކީޓޯކީތަކެއް ގެންގުޅުމާއި، ދައުލަތުގެ ސިއްރުތަކާ ބެހޭ ގާނޫނަކާ ޚިލާފުވުމުގެ ދައުވާ ވަނީ ކޮށްފައެވެ.
ސޫކީ ކޯޓަށް ހާޒިރުކުރިއިރު މިޔަންމާގައި އަންނަނީ ބަޣާވާތާ ދެކޮޅަށް މަދަނީ ބަސްނޭހުމުގެ މުޒާހަރާތަކެއް ކުރަމުންނެވެ. އަދި އަސްކަރިއްޔާއިން އަނިޔާވެރިކޮށް އަމަލު ކުރަމުންދާތީ ހަތިޔާރުއެޅި ޖަމާއަތެއްވެސް ވަނީ އުފައްދާފައެވެ.
މިޔަންމާގެ އަސްކަރިއްޔާއިން ބަޣާވާތް ކޮށްފައިވަނީ މިދިޔަ ނޮވެމްބަރު މަހު އެގައުމުގައި ބޭއްވި އިންތިޚާބު އޮޅުވާލާފައިވާ ކަމަށް ބުނެއެވެ.
