ނުގޮވާ އޮތް 300 ބޮން ގާޒާއިން ފެނިއްޖެ
ގާޒާ ސާފުކުރުމުގެ މަސައްކަތް ވަނީ ފަށާފައި
ގާޒާގެ އިމާރާތްތައް ބިމާ ހަމަވެފައި، ހަމަލާ ދީފައިވާ ތަންތަނުން ނުގޮވާ ހުރި ބޮންތައް ފެނިފައި
ނުގޮވާ އޮތް 300 ބޮން ގާޒާއިން ފެނިއްޖެއެވެ.
ގާޒާގެ ފުލުހުންގެ އިސްވެރިޔާ މުހައްމަދު ސަލާހު ވިދާޅުވެފައިވަނީ، ގާޒާގެ ހާލަތު ދެނެގަތުމަށް ކުރިއަށްގެންދާ މަސައްކަތުގެ ތެރެއިން އިސްރާއިލްގެ އުދުވާނީ ހަމަލާތަކުގައި ނުގޮތާ އޮތް 300 ބޮން ގާޒާގެ އެކި ހިސާބުތަކުން ފެނިފައިވާ ކަމަށެވެ. އެތަކެތި ރައްކާތެރިކަމާއެކު ނައްތާލުމުގެ މަސައްކަތް ކުރަމުންދާކަމަށް ވިދާޅުވެފައިވެއެވެ.
ގާޒާއަށް ހަމަލާ ދިނުން ހުއްޓާލާނެކަން އިސްރާއީލުން އިއުލާން ކުރުމާއެކު ގާޒާގެ ބިމާ ހަމަކޮށްފައިވާ އިމާރާތްތައް ސާފުކުރުމަށް ކުއްލި ހާލަތުގައި މަސައްކަތްކުރާ ފަރާތްތަކާ ވޮލަންޓިއަރުން ވަނީ މަސައްކަތް ފަށާފައެވެ. ސްކޫލްތަކުގައި ދިރިއުޅެމުންދިޔަ އާއިލާތައް އަނބުރާ ގެއަށް ބަދަލުވުމަށްވަނީ ފަށާފައެވެ.
11 ދުވަހު މެދުކެނޑުމެއްނެތި ދެމުން ގެންދިޔަ ހަމަލާތަކުގައި 255 މީހުން ގާޒާއިން ޝަހީދުވެފައިވެއެވެ. އޭގެ ތެރޭގައި 66 ކުޑަކުދިންނާއި 39 އަންހެނުންވެސް ހިމެނެއެވެ. އިސްރާއީލުން ހަމަލާތައް ހުއްޓާލާފައިވަނީ ހުކުރު ދުވަހުގެރޭ މެންދަމު ގާޒާ ގަޑިން 2:00ޖެހުމާއެކުގައެވެ.
