ގާޒާ އާރާސްތު ކުރުމަށް މިސްރުގެ ދީލަތި އެހީއެއް
19 މެއި 2021 | ބުދަ 14:33މިސްރުން ވަނީ 500 މިލިއަން ޑޮލަރުގެ އެހީތެރިކަން ގާޒާއަށް ފޯރުކޮށްދޭން ނިންމާފައި
ގާޒާއަށް އިޒްރޭލް ސިފައިން ދެމުންދާ ހަމަލާތަކުގެ ސަބަބުން އަވަށްތައް ވަނީ އަލުން އާރާސްތު ނުކުރެވޭވަރަށް ވީރާނާވެފައި
އިސްރާއީލުގެ ޔަހޫދީ ދައުލަތުން ފަލަސްތީނުގެ ގާޒާއަށް ދެމުން ގެންދާ ވަރުގަދަ ހަމަލާތަކުގެ ސަބަބުން ސުންނާފަތިވެފައިވާ ގާޒާ އަލުން އާރާސްތު ކުރުމަށް މިސްރުން 500 މިލިއަން ޑޮލަރުގެ ދީލަތި އެހީއެއް ދިނުމަށް ނިންމައިފިއެވެ.
މިސްރުގެ ރައީސް އަބްދުލް ފައްތާހު އަލް ސީސީ ވިދާޅުވީ ފަލަސްތީނަށް ލިބެމުންދާ ގެއްލުމަކީ ފޫނުބެއްދޭނެ ބޮޑެތި ގެއްލުންތަކެއް ކަމަށެވެ. އެހެން ނަމަވެސް އިސްރާއީލުގެ ހަމަލާތަކުގެ ސަބަބުން ސުންނާފަތިވެފައިވާ ގާޒާ އަލުން އާރާސްތު ކުރުމަށް މިސްރުން އެހީވާން އަބަދުވެސް ތައްޔާރަށް އޮންނާނެ ކަމަށް ފައްތާހު ވިދާޅުވިއެވެ. އެގޮތުން ގާޒާ އަލުން އާރާސްތު ކުރުމަށް މިސްރުން 500 މިލިއަން ޑޮލަރުގެ އެހީތެރިކަމެއް ދޭން ނިންމާފައިވާ ކަމަށާއި، ގާޒާ އާރާސްތު ކުރުމުގައި މިސްރުގެ ސަރުކާރުގެ އިތުރުން ވިޔަފާރި ކުންފުނިތަކުގެ އެހީ ލިބޭނެ ކަމަށް ފައްތާހު ވިދާޅުވިއެވެ.
ވޭތުވެދިޔަ ދެ ހަފުތާގެ ތެރޭގައި އެކަނިވެސް އިސްރާއީލުގެ ހަމަލާތަކުގައި ފަލަސްތީނުގެ 200ށް ވުރެ ގިނަ މީހުން ޝަހީދުވެފައިވާއިރު ޒަޚަމްވި މީހުންގެ އަދަދު ހާހުން މައްޗަށް ވަނީ އަރާފައެވެ.
ހަމަލާތަކުގައި ޒަޚަމްވި ގިނަ އަދަދެއްގެ މީހުންނާއިއެކު ގާޒާގެ ހޮސްޕިޓަލްތައް މިހާރު ވަނީ ފުރިފައެވެ. އަދި ހޮސްޕިޓަލުން ލިބެންހުރި ޚިދުމަތްތައް މަދުވަމުންދާއިރު، މިސްރުން ވަނީ 60 ޓަނުގެ ސިއްހީ ސާމާނު ގާޒާއަށް ފޯރުކޮށްދީފައެވެ.
