މީހުން ހައްޔަރުކުރަން މުހައްމަދު ބިން ސަލްމާނަށް ލަފާއަރުވަނީ މިސްރުގެ ކުރީގެ ވަޒީރެއް!

ސަޢޫދީ ޢަރަބިއްޔާގައި ކޮރަޕްޝަނާ ދެކޮޅަށް މިހާރު ހިންގާ އޮޕަރޭޝަނުގައި ވަލީޢަޙުދު މުޙައްމަދު ބިން ސަލްމާނަށް ލަފާއަރު ވަނީ މިސްރުގެ ކުރީގެ ދާޚިލީ ވަޒީރު ޙަބީބް އަލް ޢަދްލީ ކަމަށް މީޑިއާ ރިޕޯޓްތައް ބުނެފިއެވެ.

އަދްލީއަކީ 1997 ވަނަ އަހަރުން ފެށިގެން ހުސްނީ މުބާރަކްގެ ވެރިކަން 2011 ވަނަ އަހަރު ވެއްޓެންދެން މިސްރުގެ ދާޚިލީ ވަޒީރުކަން ކުރެއްވި ބޭފުޅެކެވެ. އަދި ދާޚިލީ ވަޒީރުކަމުގައި އެޤައުމުގެ އެތެރޭގެ ސަލާމަތީ ބާރުތައް ބޭނުންކޮށްގެން އަނިޔާވެރި އަމަލުތަކެއް ހިންގި ކަމަށް ތުހުމަތު ކުރެވޭ ބޭފުޅެކެވެ. އެގޮތުން މުބާރަކްގެ ވެރިކަމާ ދެކޮޅަށް ނިކުތް ރައްޔިތުންގެ ގަޔަށް ބަޑިޖަހަން ސަލާމަތީ ބާރުތަކުގެ މައްޗަށް އަމުރު ނެރުއްވި ކަމަށް ތުހުމަތުކުރެވެއެވެ. ހުސްނީ މުބާރަކްގެ ވެރިކަން ވެއްޓުމަށް ފަހު އަދްލީގެ މައްޗަށް ޝަރީޢަތް ވެސް ކުރެވުނެވެ. އަދި މިއަހަރުގެ އެޕްރީލް މަހު ކޮރަޕްޝަންގެ މައްސަލައެއް ސާބިތުވެފައިވަނިކޮށް ފިއްލަވައިގެން ސަޢޫދީއަށް ވަޑައިގެންނެވި ގޮތަށް އުމުރުފުޅުން 79 އަހަރުގެ އަދްލީ އުޅުއްވަނީ ސަޢޫދީގައެވެ.

އަދްލީގެ މައްޗަށް ކޮރަޕްޝަންގެ ކުށް ސާބިތުވެ، ހަތް އަހަރުގެ ޖަލު ހުކުމެއް ވެސް އިއްވިއެވެ. އޭނާގެ މައްޗަށް ސާބިތުވީ ދައުލަތުގެ 110 މިލިއަން ޑޮލަރަށް ޚިޔާނާތްތެރިވުމުގެ ކުށެވެ.

އަދްލީގެ ލަފަޔަކާ އެކު ސައޫދީ ވަލީޢަޙުދު ކޮރަޕްޝަނާ ދެކޮޅަށް ފެއްޓެވި މަސައްކަތުގައި މިހާތަނަށް ގިނަ ބަޔަކު ވަނީ ހައްޔަރުކުރެވިފައެވެ. އޭގެ ތެރޭގައި ޝާހީ އާއިލާގެ ނުފޫޒުގަދަ 11 އަމީރަކު ހިމެނިވަޑައިގަންނަވައެވެ.