ދިރާގު ދިވެހި ޕްރިމިއާ ލީގުގެ ތިންވަނަ ބުރު ނުކުޅެ، މި ހިސާބުން ލީގު ނިންމާލުމުގެ ވިސްނުމެއް ގެންގުޅުއްވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ދިވެހި ޕްރިމިއާ ލީގުގެ ކުޅުން މެދުކެނޑިފައިވާއިރު، މި މަހުގެ ދެވަނަ ދުވަހު ލީގުގެ ދެވަނަ ބުރުގެ ކުޅުން ވަނީ ނިންމާލާފައެވެ. ދެވަނަ ބުރަށްފަހު ލީގު މެދުކަނޑާލީ މީގެ ކުރިން މި މަހު ރާއްޖޭގައި ބޭއްވުމަށް ހަމަޖެހިފައި އޮތް އޭއެފްސީ ކަޕާއި، ކުރިއަށް އޮތް ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނަށް ވަގުތު ދިނުމުގެ ގޮތުންނެވެ. އެކަމަކު ދާދި ފަހުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ މާލެ ސަރަހައްދުގައި ކުޅިވަރު ކުޅުމާއި، ކުޅިވަރު މުބާރާތްތައް ބޭއްވުން ހުއްޓާލުމަށް އަންގާފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން އެފްއޭއެމުގެ ރައީސް ވިދާޅުވީ ލީގު އަލުން ފެށުމާ ގުޅޭ ގޮތުން ވަކި ގޮތެއް ނިންމޭނީ ސަރުކާރާއި އެޗްޕީއޭއާއެކު ބައްދަލުކޮށް މަޝްވަރާކުރުމަށްފަހު ކަމަށެވެ. އަދި ލީގު އަލުން ފަށަން ބޭނުންވަނީ ރާއްޖޭގެ ހާލަތު އޮތް ގޮތް ޔަގީންކުރުމަށްފަހު ކަމަށާއި، ލީގު އަލުން ފެށުމަށްފަހު އަނެއްކާވެސް ލީގު މެދުކަނޑާލުމަކީ ފަސޭހަކަމަކަށް ނުވާނެ ކަމަށް ވިދާޅުވިއެވެ.

ބައްސާމް ވިދާޅުވީ މިހާރުގެ ހާލަތަށް ބަލާއިރު ލީގު ދިގުދެމިގެންދިއުމުގެ ބަދަލުގައި، އޭނާގެ އަމިއްލަ ވިސްނުމަކީ ލީގުގެ ދެ ބުރު ކުޅެފައިވުމާއެކު، ތިންވަނަ ބުރު ނުކުޅެ މި ހިސާބުން ލީގު ނިންމާލުން ކަމަށެވެ. އެ ހިސާބުން ޕްރެޒިޑެންޓްސް ކަޕް ފަދަ މުބާރާތެއް ބޭއްވުމަށް މަސައްކަތްކުރާނެ ކަމަށާއި، ކަޕް މުބާރާތެއް ބާއްވަން ޖެހެނީ އޭއެފްސީ ކަޕުގެ ކޮލިފައިންގެ ޖާގަ ލިބޭނީ ކަޕް މުބާރާތެއްގެ ޗެމްޕިއަންކަން ހޯދާ ޓީމަކަށް ކަމަށް ވާތީ ކަމަށްވެސް ވިދާޅުވިއެވެ.

ޕްރެޒިޑެންޓްސް ކަޕުވެސް ނުބޭއްވިޖެ ނަމަ، ލީގުގެ ދެވަނައިގައި އޮތް ޓީމަށް އެ ޖާގަ ދިނުމަކީވެސް ގެންގުޅުއްވާ ވިސްނުމެއް ކަމަށް ބައްސާމް ވަނީ ވިދާޅުވެފައެވެ. އަދި މިހާރު ވިސްނުން ހުރީ މި އަހަރުގެ އެފްއޭ ކަޕުވެސް ނުބޭއްވުމަށް ކަމަށާއި، ސަބަބަކީ އެ މުބާރާތަކީ ބައިވަރު ކުލަބުތަކެއް ވާދަކުރާނެ މުބާރާތަކަށް ވުމުން، މި ދަނޑިވަޅުގައި އެ މުބާރާތް ބޭއްވުމަކީ އެންމެ ރަނގަޅު ގޮތް ނޫން ކަމަށްވެސް ވަނީ ވިދާޅުވެފައެވެ.

ދިވެހި ޕްރިމިއާ ލީގުގެ ދެވަނަ ބުރުގެ ކުޅުން ނިމިފައިވާއިރު، ނުވަ ޕޮއިންޓުގެ ލީޑަކާއެކު އެއްވަނައިގައި އޮތީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނެވެ. މާޒިޔާއަށް 14 މެޗުން 34 ޕޮއިންޓް ލިބިފައިވާއިރު، ދެވަނައިގައި އޮތް ކުލަބު ވެލެންސިއާއަށް 14 މެޗުން ލިބިފައިވަނީ 25 ޕޮއިންޓެވެ. އެހެންކަމުން ދެވަނަ ބުރާ ހަމައިން ލީގު ނިންމާލަން ފާސްކޮށްފިނަމަ، ޗެމްޕިއަންކަން ލިބޭނީ މާޒިޔާއަށެވެ.

ބައްސާމް ވިދާޅުވީ ތިންވަނަ ބުރު ނުކުޅެ ލީގު ނިންމާލުމަކީ އޭނާގެ އަމިއްލަ ވިސްނުމެއް ކަމަށާއި، އެކަން ފައިނަލް ކުރާނީ ޓެކްނިކަލް މީހުންނާއި، ކުލަބުތަކާއެކު މަޝްވަރާކުރުމަށްފަހު، އެފްއޭއެމުގެ އެކްސްކޯއިން ކަމަށެވެ.

ތިންވަނަ ބުރު ނުކުޅެ ލީގު ނިންމާލުމުގެ ވިސްނުމެއް ގެންގުޅޭއިރު، އެޗްޕީއޭގެ ހާއްސަ ހުއްދައެއްގެ ދަށުން ދިވެހި ޕްރިމިއާ ލީގުގެ ކުޅުން ފަށާފައިވަނީ މިދިޔަ އަހަރުގެ ޑިސެމްބަރު މަހުގެ 13 ވަނަ ދުވަހުއެވެ. ލީގު ކުރިއަށް ގެންދިޔުމަށް އެފްއޭއެމުން ޚާއްސަ އުސޫލުތަކެއް ކަނޑައެޅި ނަމަވެސް، ދެވަނަ ބުރުގެ މެދުތެރެއިންވެސް ލީގު މެދުކަނޑާލަން ޖެހުނެވެ. ފެބްރުއަރީ މަހުގެ ތިންވަނަ ދުވަހު ލީގު މެދުކަނޑާލާފައި އެ ފަހަރު ލީގުގެ ކުޅުން އަލުން ފަށާފައިވަނީ 52 ދުވަސް ފަހުންނެވެ. އެއާއެކު ގިނަ ކުލަބުތަކަށް ބޮޑެތި ގެއްލުންތަކެއް ކުރިމަތިވި ކަމަށް އެ ކުލަބުތަކުން ވަނީ ބުނެފައެވެ.