ޕީއެސްޖީން ލިލްގެ ފަހަތުގައި ވިއްދާފައި

ފްރެންޗް ލީގުގައި އާދީއްތަ ދުވަހުގެރޭ ރެއިމްސް ބަލިކޮށް، ތާވަލުގެ އެއްވަނައިގައި އޮތް ލިލްއާ އެއް ޕޮއިންޓް ގާތަށް އެންމެ ފަހުގެ ޗެމްޕިއަން ޕީއެސްޖީ ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވީ 4-0 ގެ ނަތީޖާއަކުންނެވެ. މި މެޗުން ޕީއެސްޖީ މޮޅުވިއިރު، ލީގުގައި އާދީއްތަ ދުވަހުގެރޭ ކުޅުނު މެޗުން ލިލް ވަނީ ސެއިންޓް އެޓިއެންއާ ލަނޑެއް ނުޖެހި އެއްވަރުވެފައެވެ. އެއާއެކު ލިލްއާ އެއް ޕޮއިންޓް ގާތަށް ޕީއެސްޖީ ޖެހިލި ނަމަވެސް، އަން ހަފުތާގައި ކުޅޭ ލީގުގެ ފަހުން މެޗުން އޭންޖާސް ބަލިކޮށް ލިލްއަށް ޗެމްޕިއަންކަން ހޯދުމުގެ ފުރުސަތު އެބައޮތެވެ.

އާދީއްތަ ދުވަހުގެރޭ ޕީއެސްޖީގެ ދަނޑުގައި ކުޅުނު މެޗުގައި ރެއިމްސްއަށް މައްސަލަތަކެއް ކުރިމަތިވީ މެޗުގެ ވަރަށް ކުރީކޮޅު އެ ޓީމުގެ ޔޫނިސް އަބްދެލްހާމިދަށް ސީދާ ރަތް ކާޑެއް ދެއްކުމުންނެވެ. މެޗު ފަށައިގެން 10 ވަނަ މިނެޓުގައި އޭނާއަށް ރަތް ކާޑެއް ދެއްކީ އޭރިއާ ތެރެއިން ބޯޅައިގައި އަތްލުމާ ގުޅިގެންނެވެ. އެއާއެކު ޕީއެސްޖީއަށް ޕެނަލްޓީއެއް ލިބުނުއިރު، ނޭމާ ވަނީ މި ޕެނަލްޓީ ކާމިޔާބުކޮށް އެ ޓީމަށް ލިޑު ނަގައިދީފައެވެ.

އޭގެ ފަހުން މި މެޗުގައި ޕީއެސްޖީން ގިނަ ހަމަލާތަކެއް އުފެއްދިއިރު، މެޗުގެ 24 ވަނަ މިނެޓުގައި ކީލިއަން އެމްބާޕޭ ވަނީ ލަނޑެއް ޖަހައި، އެ ޓީމުގެ ލީޑު ފުޅާކޮށްދީފައެވެ. އަދި މި މެޗުގެ ދެވަނަ ހާފުގައި މާކީނިއޯސް ޕީއެސްޖީގެ ތިންވަނަ ލަނޑު ޖަހައިދިންއިރު، އެ ޓީމުގެ ހަތަރުވަނަ ލަނޑު މެޗު ނިމެން މިނެޓަކަށް ވެފައި ވަނިކޮށް ކާމިޔާބުކޮށްދިނީ މޮއިސް ކީނެވެ.

މި މޮޅާއެކު ޕީއެސްޖީ އޮތީ ތާވަލުގެ ދެވަނައިގައި ކުޅުނު 37 މެޗުން ލިބުނު 79 ޕޮއިންޓާއެކުއެވެ. އެއްވަނައިގައި އޮތް ލިލްއަށް 37 މެޗުން ލިބިފައިވަނީ 80 ޕޮއިންޓެވެ. އަދި ޕީއެސްޖީ އަތުން ބަލިވި ރެއިމްސް އޮތީ ތާވަލުގެ 13 ވަނައިގައި 37 މެޗުން 42 ޕޮއިންޓާއެކުއެވެ.