ކޮވިޑް-19: އެންމެ ފަހުގެ

ކޮވިޑް-19 އާއި ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ކުއްލި ހާލަތު އިއުލާންކޮށްފައިވަނީ ހުކުރު ދުވަހު އެވެ.

ކުއްލި ހާލަތު އެމެރިކާގައި އިއުލާންކުރިއިރު، އެ ޤައުމުގެ 44 ސްޓޭޓާކުން ކޮވިޑް-19 އަށް ޕޮޒިޓިވްވެފައިވާ ކޭސްތައް ފެނިފައިވެއެވެ. އަދި ޖުމްލަ 1920 މީހަކު ކޮވިޑް-19 އަށް ޕޮޒިޓިވްވެފައިވާއިރު، 41 މީހަކު އެމެރިކާގައި ވަނީ މަރުވެފަ އެވެ.

ޑީއެޗް- 11 ގައި ފަރުވާދެމުންދާ 70 އަހަރުގެ މީހާގެ ހާލު ކުރިއަށް ވުރެ ދެރަ ކަމަށް ހުކުރު ދުވަހުގެ ނޫސްވެރިންގެ ބައްދަލުވުމުގައި ބައިވެރިވި ޑޮކްޓަރު މޫސާ މުރާދު ވިދާޅުވެއްޖެއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން މުރާދު ވިދާޅުވީ އެންމެ ފަހުން ބަލި މީހާގެ ހާލު ބެލިއިރު އެމީހާގެ ހާލު ކުރިއަށް ވުރެ ދެރަކަމަށް ފާހަގަކުރެވުނު ކަމަށެވެ. އެގޮތުން މިހާރު އޭނާގެ ހަށިގަނޑުގެ އޮކްސިޖަން ލެވެލް ހިފެހެއްޓެނީ އޮކްސިޖަން ދީގެން ކަމަށް އޭނާ ވިދާޅުވިއެވެ. އެހެންނަމަވެސް އެހެން ކަންތައްތައް ހުރީ ރަނގަޅަށް ކަމަށްވެސް އޭނާ ވިދާޅުވިއެވެ.

އޭނާ ޑީއެޗްއަށް ބަދަލުކުރެވުނީ ކުރިއަށް އޮތްތަނުގައި އޭނާގެ ހާލަތު ގޯސްވެދާނެ ކަމަށް ބެލެވޭތީ ކަމަށް ވެސް މުރާދު ވިދާޅުވިއެވެ.

އަނަންތަރާ އިން ޕޮސިޓިވް ވި މީހާ ފަރުކޮޅުފުއްޓަށް ގެނައުމުގެ މަސައްކަތް ދަނީ ކުރެވެމުން ކަމަށް ސަރުކާރުން އެކުލަވާލާފައިވާ ކޮވިޑް-19 ގެ ޓާސްކްފޯސްގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.

12 ފަރާތެއް މިހާތަނަށް އައިސޮލޭޓް ކުރެވިފައިވާކަމަށާއި އިތުރު ކޮންޓެކްޓް ޓްރޭސިންގް ގެ މަސައްކަތް ދަނީ ކުރެވެމުން ކަމަށް ވެސް އޭނާ ވިދާޅުވިއެވެ.

ސިކްސް ސެންސެން ލާމުގައި 4 ބިދޭސީއަކު އެރަށުގައި އައިސޮލޭޓްކުރެވިފައިވާ ކަމަށް ސަރުކާރުން އެކުލަވާލާފައިވާ ކޮވިޑް-19 ގެ ޓާސްކްފޯސްގެ ތަރުޖަމާން މަބްރޫކް އަޒީޒް ވަނީ ވިދާޅުވެފައެވެ. އެ ރަށުން 4 ބިދޭސީ އަކު އައިސޮލޭޓް ކުރެވުނީ އެމީހުން އެމީހުންގެ އަމިއްލަ ގައުމުގައި އޮތް ކައިވެނީގެ ހަފްލާއެއްގައި ބައިވެރިވެފައިވާތީ ކަމަށް މަބްރޫކް ވިދާޅުވިއެވެ. އެމީހުން އައިސޮލޭޓް ކުރެވުނީ ކައިވެނީގެ ހަފްލާއަށް ދިޔަ މީހެއް ކޮވިޑް-19 އަށް ޕޮސިޓިވްވުމާއި ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ކަމަށް މަބްރޫކް ވިދާޅުވިއެވެ.

ބ.ފެހެންދޫގެ ގެސްޓްހައުސްއަކަށް އައި ބިދޭސީ ޓުއަރިސްޓެއްގެ ގައިން ކޮވިޑް-19 އަށް ޝައްކުކުރެވޭ އަލާމާތްތަކެއް ހުރުމުން ފެހެންދޫ ވަނީ މޮނީޓަރިނގްގެ ހާލަތަށް ގެނެސްފައިކަމަށް ސަރުކާރުން އެކުލަވާލާފައިވާ ކޮވިޑް-19 ގެ ޓާސްކްފޯސްގެ ތަރުޖަމާން މަބްރޫކް އަޒީޒް ވަނީ ވިދާޅުވެފައެވެ. އަދި ކޮންޓެކްޓް ޓްރޭސިންގް އާއި ސާމްޕްލިންގް ގެ މަސައްކަތް ކުރުމަށް ޓީމެއް މިހާރު ފެހެންދޫއަށް ދަތުރުކުރަމުންދާ ކަމަށް ވެސް ވިދާޅުވިއެވެ.

ސާމްޕްލިންގް

ޖުމްލަ: 101 ސާމްޕަލް

9 ފަރާތެއް ވައިރަހަށް ޕޮސިޓިވް

92 ފަރާތެއް ނެގެޓިވް

ލެބޯރެޓްރީ އަށް އައިސް ނަތީޖާ ނުލިބި 18 ސާމްޕަލްއެއް ހިމެނޭ

އެ ސާމްޕަލްތަކަކީ:

ފަރުކޮޅުފުށިން: 1 ސާމްޕަލް

އިރުވެލިން: 1 ސާމްޕަލް

ކުރެއްދޫ އައިލެންޑް ރިސޯޓުން:10 ސާމްޕަލް

ސަރވެއިލެންސް ސާމްޕްލިންގްގެ ތެރެއިން: 6 ސާމްޕަލް

އައިސޮލޭޝަން އަދި ކަރަންޓީނު ފެސިލިޓީތަކުގައި ތިބި ފަރާތްތަކުގެ އަދަދު

ފަރުކޮޅުފުށި: 9 ފަރާތެއް

ވިލިވަރު: 17 ފަރާތެއް

ޑީއެޗް 11: 1 ފަރާތެއް އެޑްމިޓް ކުރެވިފައި

1 ފަރާތެއް ކަރަންޓީނުގައި

ސަރުކާރުން އެކުލަވާލާފައިވާ ކޮވިޑް-19 ޓާސްކްފޯސްގެ ތަރުޖަމާން މަބްރޫކް ވިދާޅުވީ ކޮންޓެކްޓް ޓްރޭސިންގްތައް މިހާރުވެސް ހެދެމުންދާ ކަމަށާއި ކޮންމެ މިނެއްޓެއްގައިވެސް އެ އަދަދު ދަނީ ބަދަލު އަންނަމުން ކަމަށެވެ.

ކޮރޯނާވައިރަސް (ކޮވިޑް-19) ގެ ސަބަބުން ޖަރުމަން ލީގުގެ މެޗުތައް ފަސްކޮށްފިއެވެ.

ޖަރުމަން ފުޓުބޯޅައިގެ މައި އިދާރާއިން ބުނީ ޖަރުމަން ލީގު ފަސްކުރީ މިހާރު ޖަރުމަންގައި ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ކަމަށާއި ލީގުގެ ކުޅުން އަލުން ފަށާނީ އޭޕްރީލް ދެވަނަ ދުވަހު ކަމަށެވެ.

ޖަރުމަން ލީގުގެ މެޗުތައް ކުރިން ކުޅެން ނިންމީ ސަޕޯޓަރުން ނުވައްދައެވެ.

ފިލިޕީންސްގެ މަނީލާ ލޮކްޑައުންގައި އޮތުމުން މަނީލާގައި ކިޔަވަމުންދާ ދިވެހި ކުދިން އަދި އެތަނުގައި ތިބި ދިވެހިންގެ ކަންތައްތައް ފޮރިން މިނިސްޓްރީންނާއި ބަންގްލަދޭޝްގައި ހުންނަ ހައި ކޮމިޝަންއާއި ގުޅިގެން ބަލަމުންދާ ކަމަށް ކޮވިޑް-19 ގެ ޓާސްކްފޯސްގެ ތަރުޖަމާން މަބްރޫކް އަޒީޒް ވިދާޅުވިއެވެ.

އިންޑިއާގެ ޑޮކްޓަރުންގެ ޓީމު މަސައްކަތް ކުރަމުންގެންދާނީ އައިޖީއެމްއެޗްގެ ޑޮކްޓަރުންގެ ޓީމާއި އެކު ކަމަށް ސަރުކާރުން އެކުލަވާލާފައިވާ ކޮވިޑް-19 ގެ ޓާސްކްފޯސްގެ ތަރުޖަމާން މަބްރޫކް އަޒީޒް ވަނީ ވިދާޅުވެފައެވެ.

އިންޑިއާގެ ޑޮކްޓަރުންގެ ޓީމުގައި ހިމެނެނީ:

5 ޑޮކްޓަރުން

2 ނަރުހުން

7 ޕެރެމެޑިކްސް

އެއްވެސް ބަޔަކު އިހުމާލު ވެއްޖެ ނަމަ، ފުރިހަމަ ފިޔަވަޅު އަޅާނެކަމަށް ސަރުކާރުން އެކުލަވާލާފައިވާ ކޮވިޑް-19 ގެ ޓާސްކްފޯސްގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ. ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ ދިވެހި ރާއްޖޭގެ ސަލާމަތަށްޓަކައި ނާޅާނެ އެއްވެސް ފިޔަވަޅެއް ނޯންނާނެ ކަމަށެވެ.

ދިވެހި ސަރުކާރުން މަސައްކަތް ކުރަމުން ދަނީ އިތުރަށް މި ބަލި ފެތުރުނަނުދީ ރައްކާތެރިކުރެވޭނެ ދުވަހެއް ހޯދުމަށްޓަކައި ކަމަށް ސަރުކާރުން އެކުލަވާލާފައިވާ ކޮވިޑް-19 ގެ ޓާސްކްފޯސްގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.

ކޮންމެ ބޭފުޅަކުވެސް ފަރުދީ ޒިންމާ އަދާ ކޮށް ތެދުވެރިވުމަށް ގޮވާލެއްވިއެވެ. އައިސޮލޭޝަންގައި ތިއްބެވި ބޭފުޅުން އައިސޮލޭޝަންގައި ތިބެ، ރައްކާތެރި ކަމުގެ ފިޔަވަޅުތައް އެޅުމަށް ގޮވާލެއްވިއެވެ.

އިންޑިއާގެ ޑޮކްޓަރުންގެ ޓީމްއާއި މިނިސްޓަރ އަމީން ބައްދަލުކުރައްވައިފިއެވެ.

އިންޑިއާގެ ސިއްހީ ދާއިރާގެ މާހިރުންގެ ޓީމެއް ރާއްޖެ އައިސްފައިވަނީ ހުކުރު ދުވަހު އެވެ. ކޮވިޑް-19 އާއި ދެކޮޅަށް ސަރުކާރުން ކުރަމުންގެންދާ މަސައްކަތްތަކުގެ ތެރެއިން، ދިވެހި ސަރުކާރުން އިންޑިއާގެ އެހީތެރިކަމަށް އެދިފަިއވަނީ ބުރާސްފަތި ދުވަހު އެވެ.

ކޮވިޑް-19 އާ ގުޅިގެން ވާރކް ވިސާ އަދި އެހެނިހެން ވީސާތަކުގެ މުއްދަތު އިތުރުކުރުމަށް އެދި ހުށަހަޅާއިރު، މެޑިކަލް ރިޕޯޓާއި ނުލާ ވިސާ ދޫކުރާނެކަމަށް މޯލްޑިވްސް އިމިގްރޭޝަނުން ބުނެފިއެވެ.

އިމިގްރޭޝަނުން ބުނީ ދުނިޔޭގެ އެކި ޤައުމުތަކުގައި މިހާރު ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން ގުޅިގެން މިމަހުގެ 12 ވަނަ ދުވަހު ރާއްޖޭގައި ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިއުލާންކޮށްފައިވާތީ ދަތުރު ފަތުރުކުރުން މަދުކޮށް، ރައްކާތެރިކަމުގެ ފިޔަވަޅުތައް އިތުރުކުރުމުގެ މަސައްކަތްތައް ކުރަމުންދާ ކަމަށެވެ.

އެގޮތުން ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގެ މުއްދަތުގެ ތެރޭގައި، ވާރކް ވިސާ އަދި އެހެނިހެން ވިސާތަކުގެ މުއްދަތު އިތުރުކުރުމަށް އެދި ހުށަހަޅާއިރު، މެޑިކަލް ރިޕޯޓާއި ނުލާ ވިސާ ދޫކުރުމަށް ނިންމާފައިވާ ކަމަށެވެ. ނަމަވެސް، އަލަށް ވާރކް ވިސާ އަދި އެހެނިހެން ވިސާއަށް އެދި ހުށަހަޅާއިރު، މިހާރުވެސް އަމަލުކުރަމުންދާ ގޮތުގެ މަތިން މެޑިކަލް ރިޕޯޓު ހުށަހަޅަންޖެހޭ ކަމަށެވެ.

ކޮވިޑް-19 އިން ރައްކާތެރިވުމަށްޓަކައި ސަރުކާރުގެ އެކި މުއައްސަސާތަކުން އަންނަނީ ތަފާތު ފިޔަވަޅުތައް އަޅަމުންނެވެ. އެގޮތުން ފެނަކައިގެ މަސައްކަތް ކުރާ މާބަނޑު މުއައްޒަފުން ގޭގައި ތިބެގެން މަސައްކަތް ކުރެވޭނެ އިންތިޒާމް ވަނީ ހަމަޖައްސާފައެވެ.

ކޮވިޑް-19 އިން ރައްކާތެރިވުމަށް ކުރަމުންދާ މަސައްކަތްތަކުގެ ދަށުން ފެނަކަ ކޯޕަރޭޝަން ލިމިޓެޑްގެ މާބަނޑު މުއައްޒަފުންނަށް ގޭގައި ތިބެގެން މަސައްކަތް ކުރެވޭ ގޮތް ހަމަޖައްސައިފިއެވެ.

ރާއްޖޭއިން މިހާތަނަށް ކޮވިޑް-19 އަށް ނުވަ މީހަކު ޕޮޒިޓިވްފައިވާއިރު، މިމަހުގެ 12 ވަނަ ދުވަހު އާންމު ސިއްހަތުގެ ކުއްލި ނުރައްކަލުގެ ހާލަތު ވަނީ އިއުލާންކޮށްފައެވެ. އެހެންކަމުން ފެނަކައިގެ މެނޭޖިން ޑިރެކްޓަރު އަހްމަދު ސައީދު މުހައްމަދު ވަނީ މުއައްޒަފުންގެ ރައްކާތެރިކަމަށްޓަކައި އެކުންފުނީގެ މަސައްކަތްތައް ކުރިއަށް ގެންދާ ގޮތަށް ބަދަލުތަކެއް ގެންނަވާފައެވެ.

ފެނަކައިން ކޮށްފައިވާ ޓުވީޓުގައި ބުނެފައިވަނީ މިވަގުތު ދުނިޔެއަށް ކުރިމަތިވެފައިވާ ކޮވިޑް-19 ގެ ނުރައްކަލުން ދިވެހި ރައްޔިތުން އަދި ޚާއްސަކޮށް ފެނަކައިގެ މުއައްޒަފުންގެ ރައްކާތެރިކަމަށްޓަކައި މިމަހުގެ 15 އިން ފެށިގެން ކޮންމެ ދުވަހެއްގެ މަސައްކަތް ކީރިތި ޤުރުއާންގެ ބަރަކާތުން އަދި ބަލި މަޑުކަމުން ދިންނެވުމަށް އެދި ކުރާ ދުއާއަކުން ފެށުމަށް ނިންމާފައިވާ ކަމަށެވެ. އަދި މިވަގުތު ފެނަކައިގެ ތިބި މާބަނޑު އަންހެން މުއައްޒަފުންނަށް ގޭގައި ތިބެ މަސައްކަތް ކުރެވޭނެ އިންތިޒާމް ވެސް ހަމަޖައްސާފައިވާ ކަމަށެވެ.

ކޮވިޑް-19 ހަލުހިމިނެއްގައި ފެތުރެމުންދާއިރު، އާންމުން އެއްވެ އުޅޭތަންތަނަށް ނުދިއުމަށް ސިއްހީ މާހިރުން ދަނީ އިލްތިމާސްކުރަމުންނެވެ.

ކަޒަޚްސްތާނުން ކޮވިޑް-19 ގެ ފުރަތަމަ ދެކޭސް ރިޕޯޓުކޮށްފިއެވެ.

މިއީ ކަޒަޚްސްތާނުން ރިޕޯޓު ކުރެވުނު ކޮވިޑް-19 ގެ ފުރަތަމަ ދެ ކޭސްއެވެ. ކަޒަޚްސްތާނަށް ނިސްބަތްވާ ދެމީހުންނަކީ ޖަރުމަނަށް ދަތުރުކުރި ދެމީހުން ކަމަށް އެގައުމުގެ ސިއްހަތާއި ބެހޭ ވަޒީރާއި ހަވާލާދީ ބޭރުގެ މީޑިއާތަކުން ރިޕޯޓުކޮށްފައިވެއެވެ.

އަދި އެދެމީހުންނަށް ދަނީ އެގައުމުގެ އެންމެ ބޮޑު ސިޓީ ކަމަށްވާ އަލްމަޓީގައި ކޮރޯނާ އަށް ފަރުވާދިނުމަށް ޚައްސާކުރެވިފައިވާ ހޮސްޕިޓަލެއްގައެވެ. އެދެމީހުންނަށް ވެސް ފަރުވާދެމުންދާއިރު ދެމީހުންގެ ހާލުވެސް ރަނގަޅު ކަމަށް ވެސް ރިޕޯޓުތަކުން ބުނެއެވެ.

އެގައުމުގެ ސިވިލް އޭވިއޭޝަން ކޮމިޓީން ވަނީ ހުކުރު ދުވަހު ނެދަރލޭންޑްސް، ޕޮލެންޑް، ޓަރކީ އަދި ޔޫކޭ އަށް ދަތުރުކުރާ އިންޓަރނޭޝަނަލް ފްލައިޓުތަކަށް ދަތުރުކުރުން މަނާކޮށްފައެވެ.

ކޮވިޑް-19 އާ ދެކޮޅަށް ރާއްޖެއިން ކުރަމުންދާ މަސައްކަތުގައި އެހީ ފޯރުކޮށްދިނުމަށް ޑޮކްޓަރުންނާއި، ކަމާއިގުޅުންހުރި ފަރާތްތައް ހިމެނޭ ޓީމް ރާއްޖެ އަތުވެއްޖެ އެވެ.

އިންޑިއާގެ ސިއްހީ ދާއިރާގެ މާހިރުންގެ ޓީމެއް ރާއްޖެ އައިސްފައިވަނީ ހުކުރު ދުވަހު އެވެ. ކޮވިޑް-19 އާއި ދެކޮޅަށް ސަރުކާރުން ކުރަމުންގެންދާ މަސައްކަތްތަކުގެ ތެރެއިން، ދިވެހި ސަރުކާރުން އިންޑިއާގެ އެހީތެރިކަމަށް އެދިފަިއވަނީ ބުރާސްފަތި ދުވަހު އެވެ. އެކަން ރައީސް އިބްރާހިމް މުހައްމަދު ސޯލިހް ވަނީ ޤައުމާއި މުހާތުބުކުރައްވާ ދެއްކެވި ވާހަކަފުޅުގައިވެސް ފާހަގަކުރައްވާފަ އެވެ.

ހުކުރު ދުވަހު އިންޑިއާގެ ޓީމް ރާއްޖެ އައުމާއެކު، އެ ޓީމަށް މަރުހަބާ ދެންނެވީ ހާރިޖީ ވުޒާރާގެ އިސްބޭފުޅުންނާއި، އިންޑިއާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އެވެ.

އަނަންތަރާ ދިގު މޯލްޑިވްސް ރިސޯޓުން ކޮވިޑް-19 އަށް ޓެސްޓު ކުރެވުނު މީހާގެ ޓެސްޓު ނަތީޖާ ޕޮސިޓީވް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ވައިރަހަށް ޝައްކުކުރެވޭ އަލާމާތްތައް ފެނިގެން އަނަންތަރާ ދިގު މޯލްޑިވްސް ރިސޯޓުން ބިދޭސީއެއް އެކަހެރި ކޮށްފައިވާކަން އެޗްޕީއޭ އިން ހާމަކޮށްފައިވަނީ ރޭގެ ވަގުތެއްގައެވެ.

އެޗްޕީއޭ އިން ބުނީ ކޮންޓެކްޓް ޓްރޭސިންގްގެ ތެރެއިން 11 މީހަކު ފާހަގަކުރެވިފައިވާ ކަމަށާއި އަދި އެމީހުން އައިސޮލޭޝަންއަށް ގެންދިޔުމުގެ މަސައްކަތް ކުރަމުންދާ ކަމަށެވެ. އަދި މޮނިޓަރކުރުމުގެ އިންތިޒާމް ހަމަޖެހިފައިވާ ކަމަށެވެ.

ބުރާސްފަތި ދުވަހު ސަރުކާރުން ހާމަކުރި މައުލޫމާތު ތަކަށް ބަލާލާއިރު ކޮވިޑް-19 އާ ގުޅިގެން މިހާތަނަށް 91 ސާމްޕަލް ނަގާފައިވެއެވެ. އަދި އޭގެ އިތުރުން ބަނދަރުތަކުން ދެ ލައްކައަށްވުރެ ގިނަ މީހުން ސްކްރީން ކުރެވިފައިވާ ކަމަށާއި، އޭގެތެރެއިން 37 މީހަކު ރާއްޖެއަށް އައުން މަނާކޮށްފައިވާ ކަމަށެވެ.

އަނަންތަރާ އިން ޕޮސިޓިވްވި ކޭސް އާއިއެކު މިހާރު މުޅި ޖުމްލަ ރާއްޖެއިން 9 ކޭސްއެއްވަނީ ރިޕޯޓުކުރެވިފައެވެ. ރާއްޖެއިން މިހާތަނަށް ފެނުނު ނުވަ ކޭހަކީވެސް ތަފާތު ހަތަރު ރިސޯޓަކުން ފެނުނު ކޭސްތަކެވެ. އަދި މިހާތަނަށް މި ބައްޔަށް ދިވެއްސަކު ޕޮޒިޓިވްވެފައެއް ނުވެއެވެ.

އަނަންތަރާ ދިގު މޯލްޑިވްސް ރިސޯޓުން ކޮވިޑް-19 އަށް ޝައްކުކުރެވޭ މީހަކު ޓެސްޓު ކުރުމުގެ މަސައްކަތް ކުރަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން ބުނީ ކޮވިޑް-19 އަށް ޝައްކުކުރެވޭ އަލާމާތްތައް ފެނިގެން އަނަންތަރާ ދިގު މޯލްޑިވްސް ރިސޯޓުން ބިދޭސީއެއް އެކަހެރި ކޮށްފައިވާ ކަމަށެވެ.

އަދި އެމީހާގެ ސާމްޕަލް ނަގާ ޓެސްޓްކުރުމުގެ މަސައްކަތް ކުރިއަށްދާ ކަމަށާއި ޓެސްޓުގެ ނަތީޖާ ލިބެންދެން އެ މީހާ ރިސޯޓުގައި އެކަހެރި ކުރެވިފައިވާ ކަމަށް އެޗްޕީއޭ އިން ބުންޏެވެ.

އަނަންތަރާ ދިގު މޯލްޑިވްސް ރިސޯޓުން ވައިރަހަށް ޝައްކުކުރެވޭ މީހަކު ޓެސްޓު ކުރުމުގެ މަސައްކަތް ކުރަމުންދާއިރު ކޮވިޑް-19 އަށް ޕޮޒިޓިވްވި މީހަކާ ކޮންޓެކްޓްވި 2 ބިދޭސީއެއް ސިކްސް ސެންސަސްގައި އައިސޮލޭޓްކޮށް މޮނިޓަރކުރަން ވެސް ވަނީ ފަށާފައެވެ.

ކޮރޯނާވައިރަސް (ކޮވިޑް-19) ގެ ސަބަބުން އިނގިރޭސި ޕްރިމިއާ ލީގުގެ މެޗުތައް ފަސްކޮށްފި އެވެ.

ޕްރިމިއާ ލީގު މެޗުތައް ފަސްކުރަން ނިންމީ ހުކުރު ދުވަހު ކްލަބުތަކާއެކު ބޭއްވި ކުއްލި ބައްދަލުވުމުގައެވެ. އެގޮތުން އަންނަ އޭޕްރީލް މަހުގެ ތިންވަނަ ދުވަހުގެ ނިޔަލަށް ލީގު މެޗުތައް ވަނީ މެދުކަނޑާލާފައެވެ. ޕްރިމިއާ ލީގުގެ އިތުރުން، އިންގްލެންޑުގައި ކުރިއަށްދާ ހުރިހާ ފުޓްބޯޅަ މުބާރާތްތައްވެސް ވަނީ އޭޕްރީލް ތިނެއްގެ ނިޔަލަށް މެދުކަނޑާލާފައެވެ.

ލީގު މެޗުތައް ފަސްކުރަން ނިންމީ އާސެނަލްގެ ކޯޗު މިކޭލް އާޓެޓާ އާއި ޗެލްސީގެ ޒުވާން ފޯވާޑް ކަލުމް ހަޑްސަން-އޮޑޯއި ކޮރޯނާވައިރަސް (ކޮވިޑް-19) އަށް ޕޮޒިޓިވްވުމާއި ގުޅިގެންނެވެ.

މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ފްރެންޗު ލީގުގެ މެޗުތައް ފަސްކޮށްފި އެވެ.

އެމެރިކާގައި ހުންނަ އދ ގެ މައިމަރުކަޒުގައި މަސައްކަތްކުރާ ފިލިޕީންސްގެ މިޝަންގެ ޑިޕްލޮމޭޓަކު ކޮވިޑް-19 އަށް ޕޮޒިޓިވްވެއްޖެއެވެ. މިއީ އެމެރިކާގައި މަސައްކަތްކުރާ ޑިޕްލޮމޭޓަކަށް މި ވައިރަސް ޖެހުނު ފުރަތަމަ ފަަހަރެވެ.

މިކަން ބަޔާންކޮށް އދ ގެ ފިލިޕީންސް މިޝަންއިން ޢާންމުކޮށްފައިވާ ބަޔާނެއްގައި ބުނެފައިވަނީ، ވައިރަސްއަށް ޕޮޒިޓިވްވި ޑިޕްލެމޭޓް އަންގާރަދުވަހުން ފެށިގެން ހުންވައްތަރުވެގެން ޑޮކްޓަރަށް ދެއްކުމުން ވައިރަސްއަށް ޓެސްޓްކުރި ކަމަށެވެ. އަދި ނަތީޖާ މިއަދު ލިބުނު އިރު އޭނ ޕޮޒިޓިވްކަން އެނގުމުން މިޝަންގެ އެހެން ބޭފުޅުންގެ ސަލާމަތާއި ރައްކަލަށް މިހާރު ފިޔަވަޅު އަޅާފައިވާކަމަށެވެ.

ފިލިޕީންސްގެ ފޮރިން އެފެއަރަޒް ސެކްރެޓަރީ ވިދާޅުވީ ޑިޕްލޮމޭޓުގެ ޙާލު ރަނގަޅުކަމަށާއި، ޑޮކްޓަރުންގެ އިރުޝާދާ އެއްގޮތައް ފަރުވާ ހޯދަމުން އަންނަކަމަށެވެ.

މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ޔުއެފާއިން ޗެމްޕިއަންސް ލީގާއި ޔޫރޮޕާ ލީގުގެ މެޗުތައް ފަސްކޮށްފި އެވެ.

ސާރކުގެ މެންބަރު ޤައުމުތަކުން ކޮވިޑް-19 އާއި ހަނގުރާމަކުުރުމަށް އެކަށީގެންވާ ވަރުގަދަ އިސްތިރާޖީއެއް އެކުލަވާލުމަށް ހުށަހަޅުއްވި ހުށަހެޅުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު މަރުޙަބާ ވިދާޅުވެއްޖެއެވެ.

މޯދީ މިކަން ހުށަހަޅުއްވާ ކުރެއްވި ޓްވީޓަަށް ޖަވާބުދެއްވައި ރައީސުލްޖުމްހޫރިއްޔާ ވިދާޅުވީ ކޮވިޑް-19 އިން އަރައިގަތުމަށް ގުޅިގެން މަސައްކަތް ކުރުން މުހިންމުކަމަށެވެ. އަދި މޯދީގެ ހުށަހެޅުމަށް މަރުޙަބާ ދަންނަވާ، ޞަރަޙައްދީގޮތުން ކުރެވޭ މިމަސައްކަތައް ދިވެހި ސަރުކާރުގެ ފުރިހަމަ އެއްބާރުލުން ލިބޭނޭ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ އަރުވާފައެވެ.

އޮސްޓްރޭލިއާއިން މިއަދު ކޮވިޑް-19 އަށް ޕޮޒިޓިވްވިކަން އެޤައުމުން ހާމަކުރި، އެޤައުުމުގެ ހޯމް އެފެއަރޒް މިިނިސްޓަރ، ޕީޓަރ ޑަަޓަން މިދިޔަ ހަފުތާގައި އެމެރިކާގެ ރައީސް ޑޮނާލްޑް ޓްރަމްޕްގެ އަންހެން ދަރިކަނބަލުންނާއި ބައްދަލުކުރެއްވިކަން ހާމަަވެއްޖެއެެވެ. ޓްރަމްޕްގެ ސީނިއަރ އެޑްވައިޒަރުކަންވެސް ކުރައްވަމުން ގެންދަވާ އިވޭންކާ ޓްރަމްޕް ގެ އިތުރުން، އެމެރިކާގެ އެޓަރނީ ޖެނެރަލް ވިލިއަން ބާރ އާއިވެސް އޮސްޓްރޭލިއާގެ ހޯމް މިނިސްޓަރ ބައްދަލުކުރެއްވިކަން ވަޏި އެނގިފައެވެ. އެހެންނަމަވެސް، މިކަމާއި ގުޅޭގޮތުން އެމެރިކާގެ ރިޔާސި ގަނޑުވަރުން އެދި ރަސްމީ ސިފައެއްގައި އެއްވެސް އެއްޗެއް ބުނެފައެއް ނުވެއެވެ.

އިންޑިއާގެ އެކިކަންކޮޅުތަކުގައި ހަލުވިކަމާއެކު ކޮވިޑް-19 ފެތުރެމުންދާތީ، އަދި ކަރްނާޓަކާ ސްޓޭޓަށް މިކަމުގެ ނުރައްކާ ބޮޑުކަމުން، އެކަމުން އަރައިގަތުމަށް ކުރަމުންދާ މަސައްކަތުގެ ދަށުން އެސްޓޭޓުގެ ހެލްތު ޑިޕާޓްމަންޓުގެ މުވައްޒަފުންނަށް ވައިރަސް ކޮންޓްރޯލް ކުރެވެންދެން ޗުއްޓީ ނުދޭގޮތައް ނިންމައިފިއެވެ.

އެޑިޕާޓްމެންޓުން ބުނެފައިވަނީ، އަހަރީ ޗުއްޓީއާއި އެހެނިހެން ޗުއްޓީތައް މި ވަގުތު މަޑުޖައްސާލި ނަމަވެސް، ރަސްމީ ބަނދު ދުވަހާއި، ހަފުތާއަކު އެއްދުވަސް އޮފްގެގޮތުގައި ދޭނެކަމަށެވެ.

އިންޑިއާގެ ބޮޑުވަޒީރު ނަރެންދްރަ މޯދީ މިއަދުވަނީ ކޮވިޑް-19 ގެ ޙާލަތާއި ގުޅިގެން ގިނަ ޓްވީޓްތަކެއް ކުރާއްވާފައެވެ. އޭގެ ތެރެއިން އެއް ޓްވީޓެއްގައި ވަނީ ސާރކުގެ މެންބަރު ޤައުމުތަކުން ކޮވިޑް-19 އާއި ހަނގުރާމަކުުރުމަށް އެކަށީގެންވާ ވަރުގަދަ އިސްތިރާޖީއެއް އެކުލަވާލުމަށް ހުށަހަޅުއްވާފައެވެ. އެމަނިކުފާނު ވިދާޅުވީ ދެކުނު އޭޝިޔާގެ ރައްޔިތުން ދުޅަހެޔޮ ޞިއްހަތެއްގައި ބޭތިއްބުމަށް މަގުފަހިކުރުވާނެ ކަންތައްތަކާއި ބެހޭ ގޮތުން ވީޑިއޯ ކޮންފަރެންސްގެ ޒަރީއާއިން މަޝްވަރާތައް ކުރިޔަށް ގެންދެވިދާނެކަމަށެވެ. އަދި ގުޅިގެން މަސައްކަތްކޮށް ދުނިޔެއަށް މިކަމުގައި މިސާލެއްގެގޮތުގައި ދެއްކިދާނެކަމަށެވެ.

މޯދީގެ އެހެން ޓްވީޓެއްގައި ވިދާޅުވެފައިވަނީ، މުޅި ދުނިޔެ ކޮވިޑް-19ގެ ޝިކާރައަކަށް ވެފައިވާއިރު، އެކި ސަރުކާރުތަކުންނާއި ޤައުމުތަކުގެ ރައްޔިތުން އެންމެ އެކަށީގެންވާގޮތުގައި އެއާއި ހަނގުރާމަކުރުމަށް މަސައްކަތްކުރަމުންދާކަމަށެވެ. އަދި ދުނިޔޭގެ އާބާދީގެ ބޮޑުބައެއް ހިއްސާކުރާ ދެކުނު އޭޝިޔާގެ ރައްޔިތުން މި ބަލިން މިންޖުކުރުމަށް، އަދި އެމީހުންގެ ދުޅަހެޔޮކަން ކަށަވަރުކުރުމަަށް ކުރެވެން އޮތް ހުރިހައި ކަމެއް ކުރައްވާނޭކަމުގެ ޔަޤީންކަން މޯދީ ވަނީ ދެއްވާފައެވެ.

ކެންޔާގެ ހެލްތު ކެބިނެޓް ސެކްރެޓަރީ މުތާހީ ކާގްވޭއާއި ޙަވާލާދީ ބޭރުގެ މީޑިއާތަކުން ރިޕޯޓުކުރާގޮތުގައި މިއަދު ކެންޔާއިން ވަނީ އެކަކު ކޮވިޑް-19 އަށް ޕޮޒިޓިވްވެފައެވެ.

ވައިރަސްއަށް ޕޮޒިޓިވްވީ އުމުރުން 27 އަހަރުގެ ކެންޔާގެ ރައްޔިތެއްކަމަށާއި، އޭނާ ވައިރަަށްއަށް ހުށަހެޅުނީ ދާދި ފަހުން އޭނާ އިނގިރޭސި ވިލާތުގެ ލަންޑަން މަގުން އެމެރިކާއަށް ކުރި ދަތުރުން ކަމަށް ކެބިނެޓް ސެކްރެޓަރީ ވިދާޅުވެފައިވެއެވެ.

ވެރިރަށް ނައިރޯބީގެ ކެންޔައްޓާ ނެޝަނަލް ހޮސްޕިޓަލުގެ އިންފެކްޝަސް ޑިޒީސް ޔުނިޓުގައި އޭނާ އެކަހެރިކުރެވި ފަރުވާދެމުންދާއިރު، އޭނާގެ ޢާންމު ޙާލަތު މުހާރު ރަނގަޅެވެ. އެހެންނަމަވެސް ތަކުރާރުކޮށް ޓެސްޓުކުރުމަށް ފަހު ވައިރަސްއަށް ނެގެޓިވްވުމުން ނޫނީ އޭނާ ގެއަށް ދޫކޮށްނުލާނެކަމަށް ކެންޔާގެ ހެލްތު މިނިސްޓްރީން ބުނެއެވެ.

ވައިރަސްއަށް ޕޮޒިޓިވްވީ މީހާ ކެންޔާއަށް އެނބުރި އައިއްސުރެ އޭނާ އެކި ޙައިޞިއްޔަތުތަކުން ބައްދަލުވި މީހުން މިހާރު ދެނެގަނެވި އެމީހުން ވައިރަސްއަށް ޓެސްޓްކުރުމުގެ މަރުޙަލާ މިހާރު ކުރިޔަށްދާކަމަށް އޮފިޝަލުން ބުނެއެވެ.

ފެނަކަ ކޯޕަރޭޝަން ލިމިޓެޑުން މިކަން ހާމަކޮށް، އެކުންފުނީގެ ރަސްމީ ޓްވިޓަރގައި ބުނެފައިވަނީ، ކޮވިޑް-19 ގެ ނުރައްކަލުން ދިވެހި ރައްޔިތުންނާއި،ފެނަކައިގެ މުވައްޒަފުންގެ ރައްކާތެރިކަން ކަށަވަރު ކުރުމުގެ ގޮތުން، 15 މާޗުން ފެށިގެން އެކުންފުނީގެ މަސައްކަތްތައް ފަށާނީ ކީރިތި ޤުރުއާނުގެ ބަރަކާތުން ކަމަށެވެ.

ހަމަ އެއާއެކު، ބަލިމަޑުކަމުން ދިންނެވުމަށް އެދި ދުޢާއަކުން ދުވަހުގެ މަސައްކަތް ފެށުމަށް އެކުންފުނީގެ މެނޭޖިންގ ޑިރެކްޓަރ އަޙްމަދު ސަޢީދު ނިންމަވާފައިވާކަމަށް ޓްވިޓަރގައި ވެއެވެ.

އަދި އެކުންފުނީގައި މަސައްކަތްކުރާ މާބަނޑު އަންހެން މުވައްޒަފުން ގޭގައި ތިބެ ވަޒީފާގެ ޒިންމާތައް އަދާކުރެވޭނެ އިންތިޒާމުވެސް ހަމަޖައްސާދީފައިވާކަމަށް އެކުންފުނިން ބުނެއެވެ.

ނޭޕާލުގައި ހުންނަ ދުނިޔޭގެ އެންމެ އުސްފަރުބަދަޔަށް އެރުމަށާއި އަދި އެތަނަށް ޒިޔާރަތް ކުރުން ނޭޕާލް ސަރުކާރުން ހުއްޓާލައިފިއެވެ. މިކަން ހާމަކޮށް އެޤައުމުގެ މިނިސްޓްރީ އޮފް ކަލްޗަރ، ޓުއަރިޒަމް އެންޑް ސިވިލްއޭވިއޭޝަނުން މިއަދު ޢާންމު ކުރި ބަޔާނުގައި ބުނެފައިވަނީ، ކޮރޯނާވައިރަސްގެ ބަލިމަޑުކަމާއި ގުޅިގެން މައުންޓް އެވަރެސްޓަށް އެރުމާއި، އެޞަރަޙައްދަށް ޒިޔާރަތްކުރުމާއި، އަދި އެކަމާއި ގުޅުން ހުރި ހުރިހާ ޙަރަކާތެއް މުއްދަތެއް މެދު ކަނޑާލާކަމަށެވެ. އަދި ވައިރަސްގެ ޙާލަތައް ބަލާ ފަހުގެ ތާރީޚެއްގައި ޙަރަކާތްތައް ފަށާނެ ދުވަހެއް އިޢުލާނު ކުރާނެކަމަށް ބަޔާނުގައިވެއެވެ.

މައުންޓް އެވަރެސްޓްުގެ ޙަރަކާތްތަކުގައި 138،000 މުވައްޒަފުން ޙަރަކާތްތެރިވެއެވެ. މައުންޓް އެވަރެސްޓަކީ ނޭޕާލަށް އާމްދަނީ ލިބޭ މައި ވަޞީލަތެވެ. އަހަރެއްގެ މައްޗަށް ދުނިޔޭގެ އެކިކަންކޮޅުތަކުން އެތައް މިލިޔަން މީހުން މައުންޓް އެވަރެސްޓަށް ޒިޔާރަތްކުރެއެވެ.

ކޮވިޑް-19ގެ އެންމެ ފަހުގެ ތަފާސް ހިސާބުތަކައް ބަލާލާއިރު، މުޅި ދުނިޔެއިން134,918މީހުން މިވަނީ ވައިރަސްއަށް ޕޮޒިޓިވްވެފައެވެ. އަދި މި ވައިރަސްގައި4,989މީހުން ވަނީ މަރުވެފައެވެ. އަދި ފަރުވާއަށް ފަހު70,395މީހުން ވަނީ ގެއަށް ދޫކޮށްލާފައެވެ. އެހެންނަމަވެސް މި ވައިރަސްގައި އަދިވެސް،59,534މީހަކަށް ފަރުވުވާދެމުންދާއިރު، މީގެތެރެއިން5,758ނާޒުކު ޙާލަތްތަކުގައި ތިބި ކަމަށް ރިޕޯޓުތައް ބުނެއެވެ.

އެންޓާޓިކާގެ ފިޔަވައި ދުނިޔޭގެ ހުރިހައި ބައްރަކަށް މިހާރު މިވައިރަސްގެ އަސަރު މިވަނީ ފޯރާފައެވެ.

ފަރަންސޭސި ވިލާތުގެ ހުރިހައި ސްކޫލެއް ބަންދުކުރުމަށް، އެޤައުމުގެ ރައީސް އެމެނުއެލް މެކްރޯން އަމުރެއް ނެރުއްވައިފިއެވެ. އެ އަމުރުގައި ވަނީ ކޮވިޑް-19 ފެތުރުން ހުއްޓުވުމަށް ސަރުކާރުން ކުރަމުންދާ މަސައްކަތައްއިތުުރ ބާރެއް ދިނުމުގެ ގޮތުންނާއި، ދަރިވަރުންނާއި ޢާއިލާތައް މި ވައިރަސްއިން ސަލާމަތްވުމަށް ސަރުކާރުން ސްކޫލްތައް ބަންދުކުރަން ކަނޑައަޅާކަމަށެވެ. އަދި ސްކޫލްތައް ބަންދު ކުރުމަށް ފަހު އިމާރާތުގެ އެތެރެއާއި ބޭރު "ޑިސްއިންފެކްޓް" ކުރުމަށް އަމުރުގައި ވެއެވެ. އަދި އަލުން ސްކޫލްތައް ހުޅުވުމާމެދު ގޮތެއް ނިންމާނީ ކޮވިޑް-19 ގެ ޙާލަތާއި އެ ފެތުރެމުންދާ ޓްރެންޑަށް ބެލުމަށްފަހު ކަމަށްވެސް މެކްރޯންގެ އަމުރުގައި ވެއެވެ. މި އަމުރު ތަންފީޒުކުރަން ފަށާނީ ހޯމަ ދުވަހުން ފެށިގެންނެވެ.

ފަރަންސޭސި ވިލާތުން މިހާތަނަށް 2،284 ކޭސް ރިޕޯޓުކުރެވިފައިވާއިރު، 48 މީހަކުވަނީ މި ވައިރަސްގައި މަރުވެފައެވެ.

ސްޕެއިންގެ ބޮޑުވަޒީރުގެ ނައިބުގެ އަނބިކަނބަލުން އަދި އެޤައުމުގެ މިނިސްޓަރ ފޮރ އިކުއާލިޓީ އައިރީން މޮންޓޭރޯ ކޮވިޑް-19 އަށް ޕޮޒިޓިވްވެއްޖެއެވެ. މިކަމާއި ގުޅިގެން ބޮޑުވަޒީރގެ ނައިބު ޕަބްލޯ އިގްލީސިއަސް 14 ދުވަހަށް ކަރަންޓީން ކުރުމަށް އެޤައުމުގެ ސަރުކާރުން މިހާރު ވަނި ނިންމާފައެވެ.

މިއާއި ގުޅިގެން ސަރުކާރުގެ އިސް މަސްއޫލުވެރިން ވައިރަށްއަށް ޓެސްޓުކުރުމުގެ މަސައްކަތް އެޤައުމުގެ ސަރުކާރުން މިހާރަވަނީ ފަށާފައެވެ.

އޮސްޓްރޭލިއާގެ ހޯމް އެފެއަރޒް މިނިސްޓަރ ޕީޓަރ ޑަޓަން ކޮވިޑް-19 އަށް ޕޮޒިޓިވްވެއްޖެއެވެ. އެމަނިކުފާނު ވަނީ މިކަން ހާމަކުރައްވާ ސިޓީއެއް ޢާންމު ކުރައްވާފައެވެ.

މިކަމާއި ގުޅިގެން އޮސްޓްރޭލިއާގެ މުޅި ކެބިނެޓް ވައިރަސްއަށް ޓެސްޓުކޮށް، އެކަހެރިކުރަން ޖެހިދާނެކަމަށް ރިޕޯޓުތައް ބުނެއެވެ.

އޮސްޓްރޭލިއާއިން މިހާތަނަށް 128 ކޭސްއެއްވަނީ ފެނިފައެވެ.

ކޮރޯނާވައިރަސް (ކޮވިޑް-19) އަށް ޗެލްސީގެ ޒުވާން ފޯވާޑް ކަލުމް ހަޑްސަން-އޮޑޯއި ޕޮޒިޓިވްވެއްޖެ އެވެ.

އުމުރުން 19 އަހަރުގެ ކަލުމް ހަޑްސަން-އޮޑޯއި ކޮރޯނާވައިރަހަށް ޕޮޒިޓިވްވިކަން އެޓީމުން ވަނީ ކަށަވަރުކޮށްދީފައެވެ. ޗެލްސީން ނެރުނު ބަޔާނެއްގައި ބުނެފައިވަނީ ކަލުމް ހަޑްސަން-އޮޑޯއި މި ވައިރަހަށް ޕޮޒިޓިވްވުމާއެކު، މިހާރު އޭނާ ވަނީ އައިސޮލޭޝަނަށް ލާފައިވާ ކަމަށެވެ. އަދި އޭނާއާ ކޮންޓެކްޓްވި އެންމެ މިހާރު ސެލްފް-އައިސޮލޭޝަނަށް ގޮސްފައިވާ ކަމަށްވެސް ވަނީ ބުނެފައެވެ.

ފިލިޕީންސްގެ ވެރިރަށް މެނީލާ "ލޮކްޑައުން" ނުވަތަ އަރާނުފޭބޭ ގޮތައް ބަންދުކޮށްފިއެވެ. މިކަން އިޢުލާންކުރައްވާ އެޤައުމުގެ ރައީސް ރޮޑްރިގޯ ޑުޓާޓޭ ވިދާޅުވެފައިވަނީ، އެއްގަމާއި، ކަނޑާއި، ވައިގެ މަގުން މެނީލާ ލޮކްޑައުން ކުރިކަން ޢާންމުކޮށް އަންގާ އިޢުލާންކުރާކަމަށެވެ. މިއީ ވެރިރަށުގައި ވައިރަސް ކޮންޓްރޯލްކޮށް ރައްޔިތުން ވައިރަސްއިން ރައްކާތެރިކުރުމުގެ ގޮތުން އެޅުއްވި ފިޔަވަޅެއްކަމަށް ވިދާޅުވެފައިވެއެވެ. ފިލިޕީންސް ސަރުކާރުން ވަނީ ސްކޫލް، ޔުނިވަރސިޓީ އަދި ކޮލެޖުތައްވެސް މިމަހުގެ ނިޔަލަށް ބަންދުކޮށްފައެވެ. އަދި މީހުން ކަރަންޓީންކޮށްގެން ފަރުވާދެމުންދާ އަވަށްތަކުގައި އާއްމު އެއްވުން ބޭއްވުންވެސް ވަނީ މަނާކޮށްފައެވެ.

ކޮވިޑް-19 އިން ސަލާމަތްވުމަށްޓަކައި އީރާނު ސަރުކާރުން ކުރަމުންދާ މަސައްކަތައް 5 ބިލިއަން ޑޮލަރު ހޯދުމަށް އެޤައުމުގެ ސަރުކާރުން އިންޓަނޭޝަނަލް މަނިޓަރީ ފަންޑް(އައިއެމްއެފް)ގައި އެދިއްޖެއެވެ. އީރާނުގެ ޚާރިޖީ ވަޒީރު ޖަވާދު ޒަރީފު ކުއްލި އެހީއަށް އެދި އައިއެމްއެފްއަށް ފޮނުވި ސިޓީގައި ވަނީ ކޮވިޑް-19 ގެ ސަބަބުން އެޤައުމުގެ އިޤުތިޞާދު އަނދަވަޅަކަށް ވެއްޓިފައިވާ ކަމަށެވެ. އެހެންކަމުން މިކަމުން އަރައިގަތުމަށާއި، ކޮވިޑް-19 އާއި ގުޅިގެން ފަރުވާދިނުމަށާއި، އަދި ވައިރަސް ކޮންޓްރޯލް ކުރުމަށް ކުރަމުންދާ މަސައްކަތައް މި ދަނޑިވަޅު ބައިނަލްއަޤުވާމީ މާލީ އިދާރާތަކުގެ އެހީތެރިކަން ބޭނުންވާކަމަށެވެ. އީރާނުގެ މި އެދުމަށް އައި އައިއެމްއެފުން ސީދާ ޖަވާބެއް ދީފައެއް ނުވެއެވެ.

އީރާނަކީ މެދުއިރުމަތީ ޤައުމުތަކުގެ ތެރެއިން ވައިރަސްގެ ނުރައްކާ އެންމެ ބޮޑު އަދި ޞިއްޙީ ނިޒާމު އެންމެ ބަލަިކަށި ޤައުމުވެސް މެއެވެ. ވައިރަސްގައި މިހާތަނަށް އައިއިރު 429 މީހުން މަރުވެފައިވާއިރު، ޖުމުލު 10،075 މީހުން ވަނީ މި ވައިރަސްއަށް ޕޮޒިޓިވްވެފައެވެ.

ކޮވިޑް -19 އާ ގުޅިގެން އަކްޝޭ ކުމާރާއި ކެޓްރީނާ ކެއިފް ލީޑް ރޯލުން ފެނިގެންދާ ފިލްމު "ސޫރިޔަވަންޝީ" ރިލީޒް ކުރުން ފަސްކޮށްފިއެވެ. ފިލްމުގެ ޑައިރެކްޓަރ ރޯހިތު ޝެޓީ ބުނީ، ކޮވިޑް-19 އާ ގުޅިގެން ފިލްމު ރިލީޒްކުރުން ފަސްކުރުމަށް ނިންމާފައިވާ ކަމަށާއި، ފިލްމު ރިލީޒް ކުރާނެ ދުވަހެއް ފަހުން އިޢުލާން ކުރާނެ ކަމަށެވެ. އަދި އޯޑިއަންސަށް ފުރިހަމަ ސިއްޙަތަކައް ވެސް އޭނާ ވަނީ އެދިފައެވެ.

ތުރުކީ ސަރުކާރުގެ ތަރުޖަމާނު އިބްރާހިމް ކަލިން ނެރުއްވި ބަޔާނެއްގައި ވަނީ، ތުރުކީގެ ހުރިހައި ސްކޫލެއް އެއް ހަފުތާގެ މުއްދަތަކައް ބަންދުކުރާކަމަށެވެ. އަދި ޔުނިވަރސިޓީތައް ތިން ހަފުތާގެ މުއްދަތަކައް ބަންދުކުރާކަމަށެވެ. މީގެއިތުުރުން ކުޅިވަރު މުބާރާތައް ސަޕޯޓަރުން ނުވައްދާ ކުރިޔަށް ގެންދިއުމަށް ވެސް ބަޔާނުގައި ވަނީ އަންގާފައެވެ.

ތުރުކީން މިފަދަ ފިޔަވަޅެއް މި އެޅީ މިދިޔަ ބުދަ ދުވަހު އެޤައުމުން ވައިރަސް ފެނުމާއި ގުޅިގެން އާންމު ރައްޔިތުންގެ ސަލާމަތާއި ރައްކަލެއްގެ ގޮތުންނެވެ.