ކޮވިޑް-19: އެންމެ ފަހުގެ

އަޅުގަނޑުމެން އަންދާޒާ ކޮށްގެން މިތިބީ، މިއަހަރުގެ ތެރޭގައި 7.5 އިންސައްތައިގައި، ޖީ.ޑީ.ޕީ ކުރިއަރާނެ ކަމަށް. ނަމަވެސް ކޯވިޑް19ގެ ސަބަބުން، އިޤްތިޞާދަށް އަރާނެ ލޮޅުމަށް ބަލާއިރު، މިއަހަރުގެ ތެރޭގައި ޖީ.ޑީ.ޕީ ކުރިއަރާ މިންވަރު ހުންނާނެ ކަމަށް މިހާރު ބެލެވެނީ، 0.5 އިންސައްތަ އާއި މައިނަސް 5.6 އިންސައްތައާ ދެމެދުގެ މިންވަރެއްގައި.

މި ބަދަލުގެ ސަބަބުން، މިއަހަރުގެ ތެރޭގައި އާމްދަނީ ލިބޭނެ ކަމަށް ލަފާކުރި ޢަދަދަށް ވުރެ، 2.1 ބިލިއަން ރުފިޔާ އާއި 6.9 ބިލިއަން ރުފިޔާގެ މިންވަރެއް ދަށްވާނެ ކަމަށް، މިހާރު އަންދާޒާ ކުރެވޭ.

މި މަހުގެ ފުރަތަމަ 10 ދުވަހުގެ ތެރޭގައި އެކަނިވެސް، ރާއްޖެ އައި ފަތުރުވެރިންގެ ޢަދަދު، މިދިޔަ އަހަރާ އަޅައިބަލާއިރު، 22.8 އިންސައްތަ ދަށަށް ހިނގައްޖެ. އަދި ޖަނަވަރީ 26 ވަނަ ދުވަހުން ފެށިގެން މިހާތަނަށް 161740 ބެޑްނައިޓް ކެންސަލްވެއްޖެ.

މިހާރު ހަދާފައި ހުރި ބުކިންތައް ކެންސަލްވަމުންދާ ނިސްބަތަށް ބަލާއިރު، މިއަހަރުގެ ތެރޭގައި ރާއްޖެ އަންނަ ފަތުރުވެރިންގެ ޢަދަދު، މިދިޔަ އަހަރާ އަޅައި ބަލާއިރު، 12 އިންސައްތަ އާއި 35 އިންސައްތައާ ދެމެދުގެ މިންވަރަކަށް ދަށަށް ދާނެ ކަމަށް ލަފާކުރެވޭ. އަޅުގަނޑުމެން ކުރިން އަންދާޒާ ކުރީ މިއަހަރުގެ ފަތުރުވެރިކަން 8 އިންސައްތަ ކުރިއަރާނެ ކަމަށް.

ރައީސުލްޖުމްހޫރިއްޔާ މިއަދު ދެއްވި ޚިޠާބުގައި ވިދާޅުވީ ވިޔަފާރިތަކަށް، ހާއްސަކޮށް ކުދި އަދި މެދު ފަންތީގެ ވިޔަފާރިތަކަށް، ލިބިދާނެ ގެއްލުންތަކުން އަރައިގަތުމުގައި އެހީތެރިވެދެވޭނެ ގޮތްތައް ހޯދުމަށް ރާއްޖޭގައި ހިންގާ ބޭންކްތަކާ އެކު މަރުކަޒީ އެމްއެމްއޭއިން މަސައްކަތް ކުރަމުން އަންނަ ކަމަށެވެ.

އަދި އޭގެ އިތުރުން ރާއްޖޭން ބޭރުން ލޯނު އެހީ އާއި ހިލޭ އެހީ ހޯދުމަށް މަސައްކަތް ކުރަމުން އަންނަކަން ފާހަގަކުރައްވާ ރައީސް ވިދާޅުވީ، އެކަމުގައިވެސް އެކުވެރި ގައުމުތަކުންނާއި މާލީ އިދާރާތަކުން ފެހި ސިގްނަލް ލިބިފައިވާ ކަމަށެވެ.

މި ބައްޔަށް ޝައްކުކުރެވޭ އެއްވެސް ޢަލާމާތެއް ފެނިއްޖެ ނަމަ، އެކަން ހޮޓްލައިން ނަންބަރު 1676 އަށް ރިޕޯޓް ކުރެއްވުމަށް އަޅުގަނޑު ރާއްޖޭގެ ލޮބުވެތި ރައްޔިތުންނަށް އިލްތިމާސްކުރަން. ހަމައެއާ އެކު، އެކަހެރި ކުރެވޭ މީހުންނަށް ދޭ އިރުޝާދުތައް ތަންފީޒުކުރުމަކީ ވެސް އެހާމެ މުހިންމު ކަމެއް. އަދި އެކަން އެގޮތަށް ހިނގާތޯ، ކަމާ ގުޅޭ އިދާރާތަކުން ބަލަމުންދާނެ.

އޭގެ އިތުރުން މި ބަލި ބޮޑަށް ފެތުރެމުންދާ ޤައުމުތަކަށް، ދިޔުމުގައި ރައްކާތެރިކަމުގެ ފިޔަވަޅުތައް އެޅުމަށް މިހާރުވާނީ އިޢުލާންކޮށްފައި. އަދި މި ބަލި ބޮޑަށް ފެތުރެމުންދާ ޤައުމުތަކުން ރާއްޖެއަށް މީހުން އައުން ވަގުތީ ގޮތުން މިދަނީ މަނާކުރަމުން.

މި ރޯގާގެ ސަބަބުން މުޅި ދުނިޔޭގެ އިޤްތިޞާދަށް ވަރަށް ބޮޑު ހީނަރުކަމެއް މިހާރުވެސް އަތުވެއްޖެ. އަދި ރާއްޖޭގެ އިޤްތިޞާދަށްވެސް ވަރަށް ބޮޑު ހީނަރުކަމެއް އެބަ އާދެ. ދުނިޔޭގެ މާލީ އިދާރާތަކުގެ ދިރާސާތައް ދައްކާ ގޮތުން، ކޯވިޑް19ގެ ސަބަބުން އިޤްތިޞާދަށް އެންމެ ބޮޑަށް ލޮޅުން އަރާނެ ޤައުމެއްގެ ގޮތުގައި ރާއްޖެ ފާހަގަކުރެވޭ.

ރާއްޖޭގައި ވެސް މި ބަލި ޖެހިފައިވާ 8 މީހަކު މިހާރު އެބަތިބި. އަދި އެ މީހުންނާ އެކި ގޮތްގޮތުން ބައްދަލުވެފައިވާ މީހުން ދެނެގަތުމުގެ މަސައްކަތް، ވަރަށް ހަރުދަނާ ގޮތެއްގައި، ކަމާ ބެހޭ ފަރާތްތަކުން އަންނަނީ ކުރަމުން. މި ދެންނެވި 8 މީހުންނާ ގުޅިގެން ރާއްޖޭގެ ތިން ރިސޯޓެއްގައި ތިބި މީހުންގެ ޙާލަތު ބަލައި މޮނިޓަކުރަން ފެށުނު.

އެ ތިން ރިސޯޓަށް މެޑިކަލް ޓީމުތައް ގޮސް، ބަލަންޖެހޭ ކަންކަން ބެލުމަށް ފަހު، އެކަހެރި ކުރަންޖެހޭ މީހުން އެކަހެރިކޮށް، ރައްކާތެރިކަމުގެ ފިޔަވަޅުތައް ވަނީ އަޅާފައި. އަދި އެ ރިސޯޓްތަކުގައި ތިބި ފަތުރުވެރިން، އެމީހުންގެ ޤައުމުތަކަށް ދެވޭނެ އިންތިޒާމު މިހާރު ވަނީ ހަމަޖައްސާފައި.

މި ބަލިން ރައްކާތެރިވުމަށް ކުރަން އޮތް އެންމެ މުހިންމު ކަމަކީ، ކޮންމެ ބޭފުޅަކުވެސް ފަރުދީ ޒިންމާ އަދާކުރެއްވުން. އެ ގޮތުން ޞިއްޙީ ތަޖުރިބާކާރުންގެ ލަފަޔާއި އިރުޝާދާ އެއްގޮތަށް އަޅުގަނޑުމެންގެ ޢަމަލުތައް ބަހައްޓައި، ޢާންމު ސާފުތާހިރުކަމަށް މިދުވަސްވަރު ޚާއްޞަ ސަމާލުކަމެއް ދެއްވުމަކީ ވަރަށް މުހިންމު ކަމެއް.

ކޮވިޑް-19 އާ ގުޅިގެން މިއަދު ގައުމާ މުހާތަބުކުރައްވާ ރައީސް ސާލިހު ވަނީ ސަރުކާރު މުވައްޒަފުންގެ މުސާރަ ކުޑަކުރަން ގަސްދުނުކުރާކަން ފާހަގަ ކުރައްވާފައެވެ. އެމަނިކުފާނު ވިދާޅުވީ، ސަރުކާރުން މަސައްކަތް ކުރަމުންދަނީ ރާއްޖޭގައި މިހާރު ފަށާފައިވާ ތަރައްގީގެ އެއްވެސް މަޝްރޫއެއް މެދުކަނޑާނުލައި ކުރިއަށް ގެންދިޔުން ކަމަށެވެ.

ސަރުކާރުން ފިޔަވަޅުތައް އަޅަމުން މިއަންނަނީ، ރާއްޖޭގައި ލިބެން ހުރި ވަސީލަތްތަކާއި ޙާލަތަށް ބަލައި، ރާއްޖޭގައި ތިއްބެވި ޑޮކްޓަރުންގެ އިރުޝާދާ އެއްގޮތަށް. އެގޮތުން މި ބަލި ފެތުރުން ހުއްޓުވުމަށް ކުރާ މަސައްކަތްތައް ކަނޑައެޅުމަށް "ރިސްކް ލެވެލް" ބަލާ މިންގަނޑުތައް ކަނޑައަޅައި، މި މަޢުލޫމާތުތައް މިހާރު ވާނީ ޢާންމުކޮށްފަ.

ރާއްޖެއަށް މި ބަލީގެ ނުރައްކާ އޮތް މިންވަރު ވަޒަންކުރުމަށް ފަހު، ޢާންމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން، ޑިރެކްޓަރ ޖެނެރަލް އޮފް ޕަބްލިކް ހެލްތުގެ ލަފާގެ މަތިން، މިނިސްޓަރ އޮފް ހެލްތު ޢަބްދުﷲ އަމީން މިއަދު ވަނީ، ޞިއްޙީ ކުއްލި ނުރައްކަލުގެ ޙާލަތު އިޢުލާން ކުރައްވާފައި.

މިބަލި ރާއްޖެއިން ފެނުމުގެ އެތައް ދުވަހެއް ކުރިން، މި ބައްޔާ މެދު ރައްކާތެރިކަމުގެ ފިޔަވަޅުތައް އަޅުގަނޑުމެން އަޅަން ފަށައިފިން. ރާއްޖެއަށް މިބަލީގެ ނުރައްކާ އޮތް މިންވަރު ދެނެގަތުމަށް، މިދިޔަ ޖެނުއަރީ މަހުގެ ފުރަތަމަ ހަފުތާގެ ތެރޭގައި އެސެސްމަންޓެއް ހަދައި، ތައްޔާރުވާން ފަށައިފިން.

މި ބަލި ފެތުރެމުންދާ ހަލުވިމިނަށް ބަލާއިރު، މި ބަލި ކޮންޓްރޯލް ކުރެވޭނެ ވަކި ދުވަސްވަރެއް، ދުނިޔޭގެ ޞިއްޙަތާ ބެހޭ ތަޖުރިބާކާރުންނަށް ވެސް އަދި ޔަޤީނެއް ނުވޭ. އެހެންކަމުން، މި ނުރައްކާތެރި ބަލިން އެންމެހައި ދިވެހިންނާއި ރާއްޖޭގައި އުޅޭ އެންމެން ރައްކާތެރިކުރުމަށް، ސަރުކާރުން މަސައްކަތް ކުރަމުން މިއަންނަނީ، ދުނިޔޭގެ ޞިއްޙަތު ޖަމްޢިއްޔާގެ ލަފަޔާ އެއްގޮތަށް.

އެނގިވަޑައިގަންނަވާނެ ފަދައިން، "ކޮރޯނާ ވައިރަސް" ނުވަތަ "ކޯވިޑް19" އެންމެ ފުރަތަމަ އިންސާނުންގެ ހަށިގަނޑުން ފެންނަން ފެށީ، މިދިޔަ އަހަރުގެ ޑިސެމްބަރު މަހުގެ މެދުތެރޭގައި ޗައިނާއިން. އެދުވަހުން ފެށިގެން މިއަދާ ހަމައަށް، ދުނިޔޭގެ ހުރިހާ ބައްރަކަށް މިބަލި ފެތުރި، ވަރަށް ގިނަ ޤައުމުތަކުގައި، މި ބަލީގެ މީހުން މިހާރު އެބަތިބި.

ކޯވިޑް19 އަކީ ދުނިޔޭގައި ހަލުވިކަމާ އެކު ފެތުރެމުންދާ ބަލިމަޑުކަމެއް ކަމަށް، ދުނިޔޭގެ ޞިއްޙަތު ޖަމްޢިއްޔާއިން މިހާރުވަނީ ކަނޑައަޅައި އިޢުލާންކޮށްފައި. މިއީ ދުނިޔޭގެ އެންމެ ކުރިއަރާފައިވާ ޤައުމުތަކުގެ ޞިއްޙީ އިދާރާތަކަށް ވެސް ކުރިމަތިވެފައި އޮތް ވަރަށް ބޮޑު ގޮންޖެހުމެއް.

ރާއްޖެއަށް މީހުން އައުން މަނާކުރަނީ، އެ ގައުމެއްގައި ބަލި ފެތުރާ މިންވަރާއި، އެ ގައުމުގެ ސިއްހީ ވަސީލަތްތަކައި ބަލި ފެތުރޭ ޓްރެންޑަށް ބެލުމަށް ފަހުގައި ކަމަށް އަމީން ވިދާޅުވެއްޖެއެވެ.

ކުރިޔަށް އޮތް ލޯކަލް ކައުންސިލް އިންތިހާބުގެ ތާރީހު އައުމުގެ ކުރިން، ގިނަ މީހުން އެއްވެގެން ބާއްވާ އެއްވެސް ހަރަކާތެއް ބޭއްވޭނެ ކަމަށް ގަބޫލުނުކުރެވޭ ކަމަށް ހެލްތް މިނިސްޓަރ އަމީން ވިދާޅުވިއެވެ.

ސިއްހީ ކުއްލި ނުރައްކަލުގެ ހާލަތާ ގުޅިގެން އެޗްޕީއޭއަށް ލިބިދޭ ބާރުތަކުގެ ތެރޭގައި، ސްކޫލްތައް ބަންދުކުރުމުގެ ބާރުވެސް އެ އެޖެންސީއަށް ލިބިފައިވާ ކަމަށް އަމީން ވިދާޅުވެއްޖެއެވެ.

ނަމަވެސް، މިހާތަަނަށް އަދި އިތުރު އެއްވެސް ހަރަކާތެއް ހުއްޓާލުމަށް މިހާތަނަށް ނިންމާފައި ނުވާކަމަށް އަމީން ވިދާޅުވިއެވެ.

ޔޫރަޕުގައި ބަލި ފެތުރެމުންދާ މިންވަރާ އަޅާބަލާއިރު، އޭޝިއާގެ ގައުމުތަކުގައި ބަލި ފެތުރެމުންދާ މިންވަރު ދަށް ކަމަށް ހެލްތް މިނިސްޓަރ އަމީން ވިދާޅުވިއެވެ.

ނެޝަނަލް އެމަރޖެންސީ އޮޕަރޭޝަން ސެންޓަރުގައި މިހާރު ކުރިޔަށްދާ ޕްރެސްގައި ހެލްތު މިނިސްޓަރ އަމީން ކޮވިޑް-19 ކޮންޓެއިން ކުރެވިދާނެކަމުގެ އުންމީދު އަދިވެސް އެބައޮތްކަމަށެވެ. ކަމާއި ގުޅުން ހުރި ހުރިހައި ފަރާތްތަކުގެ އެހީގައި އުންމީދު ކަނޑާނުލައްވާ ވައިރަސް ކޮންޓެއިން ކުރުމުގެ މަސައްކަތް ކުރައްވާނެކަމަށް މިނިސްޓަރ ވިދާޅުވިއެވެ.

ނެޝަނަލް އެމަރޖެންސީ އޮޕަރޭޝަން ސެންޓަރުގައި މިހާރު ކުރިޔަށްދާ ޕްރެސްގަ ހެލްތު މިނިސްޓަރ ވިދާޅުވީ، ކޮވިޑް-19ގެ ނުރައްކަލުން ސަލާމަތްވުމަށް ކުރަމުންދާ މަސައްކަތުގައި ދުނިޔޭގެ ޞިއްޙަތު ޖަމްޢިއްޔާގެ އެހީތެރިކަން ލިބެމުންދާކަމަށެވެ. އަދި ކުރިޔަށް އޮތް ތާނގައި ވެސް ލިބޭނެ ކަމުގެ ޔަޤީންކަން އެބައޮތް ކަމަށެވެ.

ރާއްޖޭގައި މިހާރުވެސް ކޮވިޑް-19 އަށް ޓެސްޓްކުރަމުން ދަނީ ޑަބްލިއުއެޗްއޯއިން ހަދިޔާކުރި ޚާއްޞަ ކިޓުތަކެއް ބޭނުންކޮށްގެންނެވެ.

ރާއްޖޭގައި ހުރި ސިއްހީ ވަސީލަތްތައް ބޭނުންކޮށްގެން، ކޮވިޑް-19 ޖެހިގެން ފަރުވާދޭން ޖެހޭ ފަރާތްތަކަށް ބޭނުންވާ އިންތިޒާމްތައް މިދަނީ ހަމަޖައްސަމުން ކަމަށް އަމީން ވިދާޅުވި

އިތުރު އައިސޮލޭޝަން ފެސިލިޓީތައް ގާއިމްކުރުމުގެ މަސައްކަތް ކުރަމުންދަނީ ދުރާލާ ދިމާވެދާނެ ހާލަތަކަށް ތައްޔާރުވުމުގެ ގޮތުން ކަމަށް އަމީން ވިދާޅުވި

ސިއްހީ ކުއްލި ނުރައްކަލުގެ ހާލަތު އިއުލާންކުރީ ނިންމަންޖެހޭ ނިންމުންތައް ނިންމުމުގައި ފަސާހަ ކުރުމުގެ ގޮތުން ކަމަށް އަމީން ވިދާޅުވެއްޖެ

ހެލްތް ޕްރޮޓެކްޝަން އެޖެންސީން މި ހާލަތު އިއުލާން ކުރުމާއި ގުޅިގެން ކުރަންޖެހޭ ހުރިހާކަމެއް ކުރަމުން ގެންދާނެ ކަމަށް މިނިސްޓަރ އަމީން ވިދާޅުވި.

ނެޝަނަލް އެމަރޖެންސީ އޮޕަރޭޝަން ސެންޓަރުގައި މިހާރު ކުރިޔަށްދާ ޕްރެސްގައި ޢާންމު ޞިއްހަތުގެ ކުއްލި ނުރައްކަލުގެ ޙާލަތު އިޢުލާންކުރެއްވީ ހެލްތު މިނިސްޓަރ އަމީން އެވެ.

ރައީސް ސޯލިހް ގައުމާ މުހާތަބު ކުރެއްވުން 16:00 އަށް ވަނީ ލަސްކުރެވިފައެވެ.

ކޯވިޑް19 އާއި ގުޅިގެން ރާއްޖޭގެ ޙާލަތު ބަދަލުވަމުންދާ ގޮތާ ގުޅޭގޮތުން ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު މިއަދު 14:00 ގައި ގައުމާއި މުހާތަބްކޮށް ވާހަކަދައްކަވާނެކަމަށް ރައީސް އޮފީހުން ބުނެފިއެވެ.

މާލެ ސިޓީ ކައުންސިލުން ބުނީ މި ކެމްޕޭންގެ ދަށުން ބިދޭސީން ދިރިއުޅޭ ސަރަހައްދުތަކާއި، ހޮޓާތަކަށް ކައުންސިލްގެ މުވައްޒިފުން ގޮސް، ކޮވިޑް-19 އާއިގުޅޭ މައުލޫމާތުދޭނެކަމަށެވެ. އަދި ބަންގްލަދޭޝް ބަހުންނާއި، ދިވެހި ބަހުން ހުންނަ ލިޔުންތައް އެކި ސަރަހައްދުތަކުުގައި ހަރުކުރެވޭނެކަމަށް ކައުންސިލުން ބުންޏެވެ.

ސަޢުދީ ޢަރަބިއްޔާގެ ހެލްތު މިނިސްޓްރީއާއި ޙަވާލާދީ ބޭރުގެ މީޑިއާތަކުން ރިޕޯޓުކުރާ ގޮތުގައި، މިއަދު ހެދުނު އެޤައުމުން ވަނީ އިތުރު 24 ކޭސް އެއް ރިޕޯޓުކޮށްފައެވެ. މީގެ ތެރޭގައި ހިމެނެނީ ދާދި ފަހުން އަމިއްލަ ބޭނުމަކީ އިރާޤަށް ގޮސް އެނބުރި އައި ސައުދީގެ 2 ރައްޔިތަކާއި، 12 އަަހަރުގެ ސައުދީ ކުއްޖަކާއި، ސައުދީގައި ދިރިއުޅޭ މިޞްރުގެ 21 މީހުންވެ. ސައުދީ ކުއްޑަ ކުއްޖާއަށް ވައިރަސް ޖެހުނީ އޭނާގެ ކާފަގެ ފުށުންނެވެ. އަދި މީޞްރުގެ މީހުންނަށް ވައިރަސް ޖެހުނީ، ކުރިން ވައިރަސް ޖެހިފައި ހުރި މިޞްރުގެ އެހެން ރައްޔިތަކާއި ދިމާވެގެންކަމަށް ރިޕޯޓުތައް ބުނެއެވެ.

މިއަދު ރިޕޯޓުކުރެވުނު 24 ކޭސްއާއެކު، މިހާރު ސައުދީގައި ވައިރަސްއަށް ޕޮޮޒިޓިވްވެގެން ރިޕޯޓު ކުރެވުނު ކޭސްތަކުގެ ޖުމުލަ އަދަދަކީ، 45 އެވެ.

ފާއިތުވެދިޔަ 24 ގަޑިއިރުގެ ތެރޭގައި އިޓަލީއިން އެކަނިވެސް ކޮރޯނާވައިރަސް ޖެހިގެން އިތުރު 196 މީހަކު މަރުވެއްޖެއެވެ.މިއާއެކު އިޓަލީއިން މަރުވީ މީހުންގެ ޖުމްލަ އަދަދު ވަނީ 827 އަށް އަރާފައެވެ. މިއީ މި ވައިރަސް އިޓަލީއިން ފެންނަށް ފެށި ފަހުން އެންމެ ގިނަ އަދަދަކަށް މީހުން މަރުވީ ދުވަހެވެ.

މިހާތަނަށް ޖުމްލަ 12,462 ކޭސްއެއް އިޓަލީއިން ފެނިފައިވާއިރު، ބުދަ ދުވަހު އެކަނި 2000 އަށް ވުރެ ގިނަ މީހުން ވަނީ ވައިރަސްއަށް ޕޮޒިޓިވްވެފައެވެ. އަދި މިހާތަނަށް 1،028 މީހަކު ބަލިން އެއްކޮށް ރިކަވަރވެގެން ދޫކޮށްލާފައިވާއިރު، 10،590 އަށް ވުރެ ގިނަ މީހުން އަންނަނީ ބައްޔަށް ފަރުވާ ހޯދަމުންނެވެ. އޭގެ ތެރެއިން 1،028 މީހެއްގެ ހާލު ސީރިއަސް ކަމަށް އިޓަލީގެ ކަމާބެހޭ ވުޒާރާތަކާ ހަވާލާދީ ރިޕޯޓްކޮށްފައިވެއެވެ.

އިންޑިއާގެ ނޫސްތަކުން ރިޕޯޓުކުރާ ގޮތުގައި އިންޑިއާގެ ވިޔަފާރި މަރުކަޒީ ރަށް މުމްބާއީން 2 މީހަކު ކޮވިޑް-19 އަށް ވަނީ ޕޮޮޒިޓިވްވެފައެވެ. މިއީ މުމްބާއީން މި ވައިރަސް ފެނުނު ފުރަތަމަ ފަހަރެވެ.

މިއާއެއެކު އިންޑިއާގައި ވައިރަސް ޖެހުނު މީހުންގެ އަދަދު ވަނީ 68 އަށް އަރާފައެވެ.

އެމެރިކާގެ މައިކްރޯބްލޮގިންގ އަދި ސޯޝަލް ނެޓްވޯރކިންގ ގެ ޚިދުމަތްދޭ ޓްވިޓަރގައި މަސައްކަތް ކުރާ ހުރިހައި މުވައްޒަފުން ގޭގައި ތިބިގެން މަސައްކަތް ކުރަން އެކުންފުނިން ނިންމައިފިއެވެ. އެކަން ބަޔާންކޮށް ޓްވިޓަރ އިން ޢާންމުކޮށްފައިވާ ބަޔާނެއްގައި ބުނެފައިވަނީ، މިފަދަ ނިންމުމެއް ނިންމީ ކޮވިޑް-19 އިން އަރައިގަތުމަށާއި، އެ ވައިރަސް ކޮންޓްރޯލް ކުރުމަށް ބައިނަލްއަޤުވާމީ ފެންވަރުގައި ކުރަމުންދާ މަސައްކަތުގައި ބައިވެރިވުމުގެ އިތުރުން ދުނިޔޭގެ އެކި ކަންކޮޅުތަކުގައި މަސައްކަތްކުރާ އެކުންފުނީގެ މުވައްޒަފުންގެ ވައިރަސްއިން ރައްކާތެރިކުރުމުގެ ބޭނުމުގައި ކަމަށެވެ.

އިޓަލީގެ ބޮޑު ވަޒީރު ގިއުސެޕޭ ކޯންޓޭއާއި ޙަވާލާދީ ބޭރުގެ މީޑިއާތަކުން ޚަބަުފަތުރާގޮތުގައި، އިޓަލީގެ މައި ހުރިހައި ވިޔަފާރިތައް މިއަދުން ފެށިގެން ވަނީ ބަންދުކޮށްފައެވެ. މީގެ ތެރެއިން ފާމަސީތަކާއި، ކާބޯތަކެތީގެ ވިޔަފާރި އިސްތިސްނާވެއެވެ.

ކޮރޯނާ ވައިރަސް ފެތުރުން ހުއްޓުވުމަށް މި ހަފުތާގައި މުޅި އިޓަލީ ލޮކްޑައުން ކުރިނަމަވެސް، އަދިވެސް ހަލުވި މިނެއްގައި ވައިރަސް ދަނީ ފެތުރެމުންނެވެ. ވިޔަފާރިތައް ބަންދުކުރުމުގެ ބޭނުމަކީ، ވައިރަސް ފެތުރުން ހުއްޓުވުމަށް ކުރަމުންދާ މަސައްކަތައް ބާރު ދިނުން ކަމަށް ބޮޑު ވަޒީރު ވިދާޅުވެފައިވެއެވެ.

މިހާތަނަށް އައިއިރު، އިޓަލީން 12،000 މީހުން ވައިރަސްއަށް ޕޮޒިޓިވްވެފައިވާއިރު، 630 މީހުން ވަނީ ވައިރަސްގައި މަރުވެފައެވެ.

ޑެންމާކުގެ ބޮޑު ވަޒީރު މެއްޓޭ ފްރެޑަރ ރިކްސެން، މިއަދު ބޭއްވި ނޫސްވެރިންގެ ބައްދަލުވުމެއްގައި މިކަން އިޢުލާންކުރައްވާ ވާހަކަފުޅު ދައްކަވަމުން ވިދާޅުވީ، ޤައުމުގެ ހުރިހައި ސްކޫލްތަކާއި ޔުނިވަރސިޓީތައް މިއަދުން ފެށިގެން ދެ ހަފުތާގެ މުއްދަތައް ބަންދުކުރާ ކަމަށެވެ. މިގޮތައް ނިންމި ރައްޔިތުންގެ ސަލާމަތާއި ރައްކަލެއްގެ އިތުރުން، ވައިރަސް ކޮންޓްރޯލް ކުރުމަށް ކުރަމުންދާ މަސައްކަތއް ބާރު ދިނުމުގެ ގޮތުންކަމަށެވެ.

އަދި ޢާންމު ޚިދުމަންދޭ އިދާރާތަކާއި އޮފީސްތަކުގައި މަސައްކަތްކުރާ މުވައްޒަފުންގެ ތެރެއިން ކޮންމެހެން ނިކުންނަން ޖެހޭ މުވައްޒަފުން ފިޔަވައި އެހެން މުވައްޒަފުން މުސާރައާއިއެކު ގޭގައި މަޑުކުރަން ބޮޑު ވަޒީރު ވަނީ ނިންމަވާފައެވެ.

ޑެންމާކުން 440 މީހުން ވަނީ ވައިރަސްއަށް ޕޮޒިޓިވްވެފައެވެ.

ބޭރުގެމީޑިއާތަކުން ރިޕޯޓުކުރާގޮތުގައި އިއްޔެ އެކަނިވެސް އެޤައުމުން 9 މީހުން ވައިރަސްއަށް ޕޮޒިޓިވްވިއެވެ. އަދި އިއްޔެ ވަނީ އެޤައުމުން ފުރަތަމަ ފަހަރަށް ވައިރަސްގައި މީހަކު މަރުވެފައެވެ. ވައިރަސް އަލަށް ޖެހުނު މީހުންނަކީ ފާއިތުވެދިޔަ ދުވަސްތަކުގައި ވައިރަސް ފެތުރިފައިވާ ޤައުމުތަކަށް ޒިޔާރަތްކުރުމަށް ފަހު އެނބުރި ޤައުމަށް އައި މީހުންނާއި، ކުރިން ވައިރަސް ޖެހުނު މީހުންނާއި އެކި ގޮތްގޮތުން ދިމާވެފައިވާ މީހުން ކަމަށް އޮފިޝަލުން ބުނެއެވެ.

މިއާއެކު، އެޤައުމުގައި ވައިރަސް ޖެހުނު މީހުންގެ ޖުމުލއަ އަދަދަކީ 43 އެވެ.

އިނގިރޭސި ވިލާތް ފިޔަވައި ޔޫރަޕުގެ ހުރިހައި ޤައުމަކަށް ދަތުރު ކުރުން އެމެރިކާއިން މަނާކޮށްފިއެވެ. ވައިޓްހައުސްގައި ދެއްވި ބަޔާނެއްގައި ރައީސް ޑޮނާލްޑް ޓްރަމްޕް ވިދާޅުވެފައިވަނީ ހުކުރ ދުވަހުގެ ދަންވަރު 12 އިން ފެށިގެން ޔޫރަޕުގެ ޤައުމުތަކަށް އެމެރިކާ ރައްޔިތުން ދަތުރުކުރުން މަނާކުރާ ކަމަށެވެ. ޓްރަމްޕުގެ މި އަމުރު 1 މަސްދުވަހުގެ މުއްދަތައް ދެމިގެންދާނެކަމަށް ވައިޓްހައުސްއިން ބުނެއެވެ.

ޗައިނާގެ ނެޝަނަލް ކޮމިޝަނުން ބުނާގޮތުންނަމަ، އިއްޔެ އެޤައުމުގައި 15 މީހުންނަށް ވައިރަސް ޖެހި، ވައިރަސްއަށް ފަރުވާ ހޯދަމުން ދިޔަ 11 މީހުން ވަނީ މަރުވެފައެވެ. މިއީ، ޑިސެންބަރު މަހަށްފަހު އެޤައުމުން، މިވައިރަސްގައި އެންމެ މަދުން މީހުން މަރުވި ދުވަސްކަމަށް އެކޮމިޝަނުން ބުނެއެވެ.

ޗައިނާއިން މިހާތަނަށް އައިއިރު، 80،793 ވައިރަސްއަށް ޕޮޒިޓިވްވެފައިވާއިރު، 3،169 މީހުން ވަނީ މަރުވެފައެވެ.

ޗައިނާ ސަރުކާރުން ބުނެފައިވަނީ، ވައިރަސް މިހާރު ކޮންޓްރޯލް ކުރެވޭ ޙާލަތަކަށް ގެނެވިފައިވާކަމަށެވެ.

ދެކުނު ކޮރެއާގެ ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަން ބުނެފައިވަނީ ފާއިތުވެދިޔަ 24 ގަޑިއިރު އެޤައުމުން 114 މީހުން ވައިރަސްއަށް ޕޮޒިިވްވެފައިވާކަމަށާއި، މިއާއެކު އެޤައުމުގައި ވައިރަސް ޖެހިފައިވާ މީހުންގެ އަދަދު 7،869 އަށް އަރާކަމަށެެވެ.

އަދި އިއްޔެ ވައިރަސްގައި 6 މީހުން މަރުވެފައިވާއިރު، ވައިރަސްގައި މަރުވީ މީހުންގެ އަދަދު މިހާރު 66 އަށް އަރާކަމަށެވެ.

ހޮލީވުޑްގެ މަޝްހޫރު ފިލްމީތަރި އަދި ޕްރޮޑިއުސަރ ޓޮމް ހޭންކްސްއާއި އޭނާގެ އަންހެނުން ވައިރަސްއަށް ޕޮޒިޓިވްވެއްޖެއެވެ. ކޮމެޑީ ރޯލުތަކުން މީހުންގެ މަޤުބޫލުކަން ހޯދާފައިވާ ޓޮމް ހޭންކްސް މިކަން ހާމަކޮށްފައިވަނީ އޭނާގެ ޓްވިޓަރގައެވެ. ޓޮމްގެ ދެމަފިރިން އޮސްޓްރޭލިޔާގެ ގޯލްޑް ކޮސްޓްގައި ތިބީ އެލްވިސް ޕްރެސްލީގެ ހަޔާތާ ބެހޭގޮތުން ކުޅެމުން ދިޔަ ފިލްމެއްގެ މަސައްކަތަށެވެ. ހުން އައިސް، ވަރުބަލިވުން އިހުސާސް ކުރެވޭތީ ވައިރަސްއަށް ޓެސްޓު ކުރީކަމަށް އޭނާ ބުނެއެވެ.

ފިލިޕީންސްގެ މެނީލާގައި ހުންނަ އޭޝިއަން ޑެވެލޮޕްމެންޓް ބޭންކުގެ މައި މަރުކަޒު ބަންދުކޮށްފިއެވެ. ބައިނަލްއަޤުވާމީ މީޑިއާ ރިޕޯޓުތައް ބުނާގޮތުންނަމަ، ބޭންކުގެ މައި މަރުކަޒު ބަންދުކުރީ، ބޭންކުގެ ދެ އިމާރާތައް ކޮވިޑް19 އަށް ޕޮޒިޓިވްވެފައިވާ ބަޔަކު ޚިދުމަތްހޯދުމަށް ވަންކަން ސާބިތުވުމާއި ގުޅިގެންނެވެ.

ދެ އިމާރާތްވެސް މިހާރު ވަނީ ބަންދުކޮށް، ޑިސްއިންފެކްޓް ކުރުމުގެ މަސައްކަތް ދަނީ ކުރަމުންނެވެ. އެހެންނަމަވެސް، މުޒައްޒަފުން ގޭގައި ތިބެގެން މަސައްކަތްކުރާގޮތައް މެނޭޖްމެންޓުންވަނީ ނިންމާފައެވެ.

ބޭންކުން ބުނެފައިވަނީ، މުވައްޒަފުން ގޭގައި ތިބެގެން މަސައްކަތްކުރާގޮތައް ނިންމީ، އެ ބޭންކުގެ މުވައްޒަފުންނާއި އެމީހުންގެ ޢާއިލާތަކުގެ ސަލާމަތާއި ރައްކަލަށް ކަމަށް ކަމަށެވެ. އަދި ބޭންކުން ޚިދުމަތް ހޯދިވައިރަސް ޖެހިފައި ތިބި މީހުންނާއި ދިމާވި ބޭންކުގެ މުވައްޒަފުންނަށް އެހީތެރިވަމުންދާކަމަށްވެސް އެބޭންކުން ބުނެއެވެ.

ކޮވިޑް-19 އާ ގުޅިގެން ސަރުކާރުން އެކުލަވާލާފައިވާ މޮނިޓަރިން ކޮމެޓީއާ މަޝްވާރާކުރުމަށްފަހު، ލޯކަލް ކައުންސިލް އިންތިޚާބު ފަސްކުރުމާމެދު ގޮތެއް ނިންމާނެ ކަމަށް އިލެކްޝަންސް ކޮމިޝަން (އީސީ) ބުނެފިއެވެ.

ކޮވިޑް-19 ރާއްޖެއިން ފެނިފައިވާތީ އަންނަ އޭޕްރީލް މަހުގެ 04 ވަނަ ދުވަހު ބޭއްވުމަށް ހަމަޖެހިފައިވާ ކައުންސިލް އިންތިޚާބު ފަސްކުރުމަށް ބައެއް ފަރާތްތަކުން ދަނީ ގޮވާލަމުންނެވެ.

އީސީގެ ނައިބު ރައީސް އަހްމަދު އަކްރަމް ވިދާޅުވީ ކައުންސިލް އިންތިޚާބު ފަސް ކުރުމާ ގުޅޭގޮތުން ވަރަށް އަވަހަށް މޮނިޓަރިން ކޮމިޓީއާ އީސީން ބައްދަލުކުރާނެ ކަމަށެވެ. އަދި މަޝްވަރާތަކަށްފަހު ގޮތެއް ނިންމާނެ އަކްރަމް ވިދާޅުވިއެވެ. ނަމަވެސް މަޝްވަރާ ބައްދަލުވުން އޮތް ދުވަހެއް އަކްރަމް ހާމައެއް ނުކުރައްވައެވެ.

ކޮރޯނާވައިރަސް (ކޮވިޑް-19) އަށް އިޓަލީގެ ޔުވެންޓަސްގެ ޑިފެންޑަރު ޑެނިއެލް ރުގާނީ ޕޮޒިޓިވްވެއްޖެ އެވެ.

އުމުރުން 25 އަހަރުގެ ރުގާނީ ކޮރޯނާވައިރަހަށް ޕޮޒިޓިވްވިކަން ޔުވެންޓަސްއިން ވަނީ ކަށަވަރުކޮށްދީފައެވެ. ޔުވެންޓަސްއިން ނެރުނު ބަޔާނެއްގައި ބުނެފައިވަނީ ރުގާނީ މި ވައިރަހަށް ޕޮޒިޓިވްވުމާއެކު، މިހާރު އޭނާ އައިސޮލޭޝަނަށް ލާފައިވާ ކަމަށެވެ. އަދި މުޅި ޓީމުގެ ކުޅުންތެރިންނާއި އޮފިޝަލުންގެ ކަންކަންވެސް މިހާރު ބަލަމުންދާ ކަމަށް ވަނީ ބުނެފައެވެ.

މީގެ ކުރިން ޔުވެންޓަސްގެ 23 އަހަރުން ދަށުގެ ޓީމު ވަނީ ކަރަންޓީނުކޮށްފައެވެ. އަދި މިހާރު ވަނީ ޔުވެންޓަސްގެ ފަރިތަކުރުންތައްވެސް ހުއްޓާލާފައެވެ.

ކޮވިޑް-19 އަށް ޓެސްޓު ކުރުމަށް ސާމްޕަލް ނަގާފައިވާ ފަރާތެއްގެ ނަތީޖާ "ނެގަޓިވް" ވުމާ ގުޅިގެން، ފަރުކޮޅުފުށީގައި އައިސޮލޭޓް ކޮށްފައިވާ ފަރާތެއް ގޭގައި އެކަހެރިކޮށް ހުރުމަށް ފޮނުވާފައިވާ ކަމަށް އެޗްޕީއޭއިން ބުނެފިއެވެ.

ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން ސަން އަކުއާރ ރިސޯޓުން ބިދޭސީއެއްގެ ސާމްޕަލް ނަގާ ޓެސްޓްކުރުމުގެ މަސައްކަތް ކުރިޔަށްދާކަމަށް އެޗްޕީއޭއިން ބުނެފިއެވެ. އަދި ޓެސްޓްގެ ނަތީޖާ ލިބެންދެން އެރިސޯޓުގައި ވަނީ މޮނިޓަރިންގްއަށް ލެވިފައި ކަމަށް އެޗްޕީއޭއިން ބުނެއެވެ.

ކުރެއްދޫ، ބަތަލާ އަދި ކުރަމަތި އަރާ ފޭބުމުގެ ހުއްދަ ދީފިއެވެ.

ހެލްތް ޕްރޮޓެކްޝަން އެޖެންސީން ނެރުނު ނޫސްބަޔާނެއްގައި ބުނެފައިވަނީ އެ ތިން ރިސޯޓަށް އަރާ ފޭބުމުގެ ހުއްދަ ދިން ނަމަވެސް އަދިވެސް ގާތުން އެ ތިން ރިސޯޓް މޮނިޓާ ކުރަމުންދާނެ ކަމަށެވެ.

"ކޮވިޑް-19 އާއި ގުޅިގެން އަރާފޭބުން ވަގުތީގޮތުން ހުއްޓުވާފައިވާ ކުރެއްދޫ އައިލެންޑް ރިސޯޓު، ސޭންޑީސް ބަތަލާ އަދިކުރަމަތި މޯލްޑިވްސް މިހާރުވަނީ އަރާފޭބުން ހުޅުވާ ލެވިފައެވެ. ނަމަވެސް ރައްކާތެރިކަމުގެ ފިޔަވަޅެއްގެ ގޮތުން، މިހާރުވެސް މި ބަލިފެނުމުގެ ފުރުޞަޠު ބޮޑަށް އޮތް ފަރާތްތައް ބޭރަށް ނުނިކުމެވޭ ގޮތަށް ވަކި ސަރަހައްދެއްގައި އެކަހެރިކޮށް ބެހެއްޓުމުގެ އިންތިޒާމްއެ ރިސޯޓްތަކުގައި ވަނީ ހަމަޖައްސާފައެވެ. އަދި މިގޮތުން އެކަހެރިކޮށްފައިވާ ފަރާތްތައް ޢަމަލުކުރާނެ ގޮތާ ބެހޭގޮތުންއެކުލަވާލައިފައިވާ އުސޫލުތަކާއި ޕްރޮސީޖަރތަކާ އެއްގޮތަށް އެ މީހުން ޢަމަލު ކުރަމުންދޭތޯ ރިސޯޓްގެ މެނޭޖްމަންޓުން ބަލާ ކަށަވަރުކުރަމުންދާނެއެވެ. ހަމައެއާއެކު އެރިސޯޓުތަކުން މީހުން ފޭބުމުގެ ކުރިން 'އެގްޒިޓް ސްކްރީން! ކުރެވޭނެއެވެ. އަދި މީގެ އިތުރުން މިބަލިން ރައްކާތެރިކުރުމަށްޓަކާ އަޅާ ފިޔަވަޅާއި މިބަލި ފެތުރުނަ ނުދިނުމަށްޓަކާ ކުރާ މަސައްކަތްތައް ތަންފީޒު ކުރުމަށް ޞިއްޙީމުވައްޒަފަކު ރިސޯޓްގައި ހަރަކާތްތެރިވަމުން ދާނެއެވެ. ކޮވިޑް-19 އަކީ މުޅިދުނިޔެއަށް ފެތުރިފައިވާ ބައްޔެއް ނުވަތަ 'ޕެންޑަމިކް'އެއް ގޮތުގައި ދުނިޔޭގެ ޞިއްޙަތު ޖަމުޢިއްޔާއިންމިހާރުވަނީ ކަނޑައަޅާފައެވެ. މިއީ ކޮރޯނާވައިރަސްއަކާ ގުޅިގެން 'ޕެންޑަމިކް' ކަނޑައެޅި ފުރަތަމަ ފަހަރެވެ،" އެޗްޕީއޭގެ ބަޔާނުގައި ބުނެފައިވެއެވެ.