ކޮވިޑް-19: އެންމެ ފަހުގެ

ރިސޯޓުތަކުން އެހެން ރަށްރަށަށް ދަތުރު ކުރުން ހުއްޓުވިފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ކޮވިޑް-19ގެ އެންމެފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ ވަހީދު ވިދާޅުވީ މީހުން ދިރިއުޅޭ އެއްވެސް ރަށަކުން އަދި އެއްވެސް ރިސޯޓަކަށް ދަތުރުކުރުން މިއަދު ފެށިގެން 14 ދުވަސްގެ މުއްދަތަށް މަނާކުރެވިފައިވާ ކަމަށެވެ.

މީގެ އިތުރުން މިނިސްޓަރު ވިދާޅުވީ ހޮނިހިރު ދުވަހުގެ ރޭ 12 އިން ފެށިގެން ސްޕެއިން އިން މީހުން ރާއްޖެ އައުން މަނާ ކުރަން ވެސް ވަނީ ނިންމާފައިވާ ކަމަށެވެ. އަދި ފްރާންސްގެ ބައެއް ސަރަހައްދުތަކުން ވެސް ފަތުރުވެރިން ރާއްޖެ ނާދެވޭ ގޮތަށް ނިންމާފައިވާ މިނިސްޓަރު ވިދާޅުވިއެވެ.

ޔުނިވަރސިޓީތަކާއި ކޮލެޖުތަކާއި ތަމްރީނުދޭ މަރުކަޒުތައް ބަންދުކުރުމަށް އެޗްޕީއޭއިން އަންގައިފި އެވެ. އެޗްޕީއޭއިން ބުނީ މިފަދަ ހުރިހާ މަރުކަޒެއް މިއަދުން ފެށިގެން 2 ހަފްތާއަށް ބަންދުކުރުމަށް އަންގާކަމަށެވެ.

މާލޭގައި (މާލެ، ހުޅުމާލެ، ވިލިމާލެ) ގެސްޓްހައުސްތަކާއި، ސިޓީ ހޮޓެލްތަކަށް ބިދޭސީ ފަތުރުވެރިން ޗެކްއިން ވުން ހުއްޓާލުމަށް އަންގައިފި އެވެ.

އެޗްޕީއޭއިން ބުނީ މާލޭގައި (މާލެ، ހުޅުމާލެ، ވިލިމާލެ) ގެސްޓްހައުސްތަކާއި، ސިޓީ ހޮޓެލްތަކަށް ބިދޭސީ ފަތުރުވެރިން ޗެކްއިން ވުން މިރޭ 12:00 އިން ފެށިގެން 14 ދުވަހުގެ މުއްދަތަށް ބިދޭސީ އެއްވެސް ފަތުރުވެރިއަކު ޗެކިން ކުރުން ހުއްޓާލުމަށް އަންގާކަމަށެވެ. އަދި މިހާރު މިފަދަ ތަންތަނުގައި ޗެކިންވެފައި ތިބި ބިދޭސީ ފަތުރުވެރިންނަށް ބުކިންގ މުއްދަތުގައި ތިބުމުގައި އެއްވެސް ހުރަހެއް ނެތްކަމަށްވެސް އެޗްޕީއޭއިން ބުނެއެވެ.

ރިސޯޓްތަކުން ރާއްޖޭގައި މީހުން ދިރިއުޅޭ އެއްވެސް މީހަކަށް ދަތުރު ކުރުމާއި، ރާއްޖޭގެ އެހެން ރަށްރަށުން ރިސޯޓްތަކަށް މީހުން ދަތުރުކުރުން މިއަދު 18:00 އިން ފެށިގެން 14 ދުވަހުގެ މުއްދަތަށް ހުއްޓާލުމަށް އެޗްޕީއޭއިން އަންގައިފި

ކޯވިޑް-19 އިން ރައްކާތެރިވުމުގެ ގޮތުން މާފުށީ ޖަލުގެ އޮފިސަރުން މިއަދު އެ ޖަލު ސާފުކުރުމާއި ޑިސްއިންފެކްޓްކުރުމުގެ މަސައްކަތް ކުރިއަށް ގެންދާކަމަށް ކަރެކްޝަނަލް ސަރވިސް އިން ބުނެފި އެވެ.

މާފުށީ ޖަލުގައި ކުރިއަށް ގެންދާ މި މަސައްކަތަކީ ކޯވިޑް-19 އާ ގުޅިގެން ދިވެހިރާއްޖެގައި 30 ދުވަހަށް ސިއްޙީ ކުއްލި ނުރައްކަލުގެ ޙާލަތު އިޢުލާންކުރުމާ ގުޅިގެން، މި ސަރވިސްގެ ބެލުމުގެ ދަށުގައިވާ ޤައިދީންނާއި ބަންދުމީހުން އަދި ޖަލުތަކުގައި މަސައްކަތްކުރަމުންދާ އޮފިސަރުންނާއި މުވައްޒަފުންގެ ސަލާމަތާއި ރައްކަލައްޓަކައި އަޅަމުންދާ ފިޔަވަޅުތަކުގެ ތެރެއިން ފިޔަވަޅެއް ކަމަށް ކަރެކްޝަންސް އިން ބުނެއެވެ. މި ގޮތުން މި ހަރަކާތުގައި ޖަލުގެ ގޮޅިތަކާއި ފާހާނާތަކާއި ކޮރިޑޯތަކުގެ އިތުރުން ޤައިދީންނާއި ބަންދުމީހުން ބޭނުންކުރާ ޢާންމު ތަންތަންވެސް ސާފުކޮށް ޑިސްއިންފެކްޓްކުރުމަށް ވަނީ ހަމަޖެހިފައެވެ.

މާފުށީ ޖަލު ސާފުކޮށް ޑިސްއިންފެކްޓްކުރުމުގެ ހަރަކާތުގައި ޤައިދީންނާއި ބަންދުމީހުންނަށް ކޯވިޑް-19 އާ ގުޅޭގޮތުން މައުލޫމާތު ވެސް ހިއްސާކުރެވޭނެ ކަމަށް ކަރެކްޝަންސް އިން ބުނެއެވެ،

ކޮވިޑް-19 އާ ގުޅިގެން އެންމެ ފަހުގެ މައުލޫމާތު ހިއްސާކުރުމަށް މިއަދު މެންދުރު 14:30 ގައި ނޫސްވެރިންގެ ބައްދަލުވުމެއް އޮންނާނެ ކަމަށް އެޗްޕީއޭއިން ބުނެފި އެވެ.

ކޮވިޑް-19 އަށް އިތުރު މީހަކު ރާއްޖެއިން ޕިޒިޓިވް ވެފައިވާ ކަމަށް އެޗްޕީއޭއިން ބުނެފި އެވެ. އެޗްޕީއޭއީން ބުނީ މިމީހާއަކީ ކުރެއްދޫ އިން ޓެސްޓް ކުރި 10 މީހުންގެ ތެރެއިން އެކަކު ކަމަށެވެ. ބާކީ 9 މީހުން ނެގެޓިވްކަމަށް އެޗްޕީއޭއިން ބުނެއެވެ. އެއާއެކު މިހާތަނަށް ރާއްޖެއިން މިވައިރަސް އަށް 10 މީހަކު ވަނީ ޕޮޒިޓިވް ވެފައެވެ.

ކޯވިޑް-19 އަށް ޝައްކުކުރެވޭ އަލާމާތްތަކެއް ހުރި 2 ބިދޭސީން ސަފާރީ އުޅަނދެއްކަމުގައިވާ ވައިޓް ވޭވްސްގައި އެކަހެރިކޮށް، އެފަރާތް ތަކުގެ ސާމްޕަލް ނަގައި ޓެސްޓު ކުރުމުގެ މަސައްކަތްވަނީ ފަށާފައިވާ ކަމަށް އެޗްޕީއޭއިން ހާމަކޮށްފިއެވެ. މިކަމާއި ގުޅިގެން، އެ ސަފާރީ އުޅަނދު ވަނީ މޮނީޓަރިންގ ހާލަތަކަށް ގެނެވިފައެވެ.

ކޮވިޑް-19 އަކީ މުޅި ދުނިޔެއަށް އޮތް ބޮޑު ރޯގާއެއްގެ ގޮތުގައި ދުނިޔޭގެ ޞިއްޙަތު ޖަމްޢިއްޔާއިން ކަނޑައެޅުމާއި ގުޅިގެން ގިނަ ޤައުމުތަކުން ވަނީ ދަތުރުފަތުރުގެ ސަމާލުތަކާއި އިންޒާރުތައް ނެރެފައެވެ. އިންޑިއާއަށް ބަލާލާއިރު، އެޤައުމުގެ ޤައުމީ އެއަރލައިން އެއަރ އިންޑިއާއިން ވަނީ ބައެއް ބޭރުގެ ޤައުމުތަކައް ދަތުރުތައް ހުއްޓާލާފައެވެ. އެގޮތުން އިޓަލީ، ފްރާންސް، ކުވައިތު، ޖަރުމަން، ސްޕެއިން، އިސްރޭލް، ދެކުނު ކޮރެއާ، ސްރީލަންކާއަށް ކުރަމުންދާ ތާވަލު ފްލައިޓުތައް އެޕްރީލް މަހުގެ 30 ވަނަ ދުވަހުގެ ނިޔަލަށް ހުއްޓާލާފައެވެ.

މީގެ އިތުރުން މިދިޔަ މަހު އެކަނިވެސް ބައިނަލްއަޤުވާމީ 600 ތާވަލު ދަތުރުތައް ވަނީ ކެންސަލްކޮށްފައެވެ. އަދި އެތެރޭގެ ދަތުރުތަކައް ބަލާއިރު 90 ދަތުރެއް ވަނީ ކެންސަލްކޮށްފައެވެ.

އިންޑިގޯއާއި ސްޕައިސްޖެޓުންވެސް ވަނީ ދަތުރުކެންސަލްކޮށް ގިނަ ބޯޓުތައް ބަނދަރުކުރަން ޖެހިފައެވެ. މިއާއެކު، އިންޑިއާގެ އޭވިއޭޝަން ސިނާއަތަށް މިދަނީ ބޮޑެތި ގެއްލުންތައް ވަމުންނެވެ.

އެމްޑީޕީން ބުނީ، ކޮވިޑް-19އާ ގުޅިގެން ދިވެހިރާއްޖޭގެ ހުރިހާ ޞަރަޙައްދަކަށް ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާނުކުރެވި، ރައީސް އިބްރާހިމް މުޙައްމަދު ޞާލިޙު ޤައުމާ މުޚާތަބުކުރައްވާ، ދެއްކެވި އިރުޝާދުތަކަށް އެމްޑީޕީން މަރުޙަބާ ކިޔާ ކަމަށެވެ.

އެމްޑީޕީން ބުނީ އިންތިޚާބު ލަސްކޮށްފައިވާއިރު، މިހާރު އެޕާޓީގެ ކޭމްޕޭނުގެ ހުރިހާ ޙަރަކާތްތަކެއް އެއްކޮށް މެދުކަނޑާލާފައިވާ ކަމަށެވެ. އަދި ކޮވިޑް-19 އާގުޅިގެން ރައްޔިތުންގެ ކިބައިން ސަރުކާރުން އެދޭ ކޮންމެ ކަމެއްގައި އެޕާރޓީގެ މެންބަރުންނާއި، އެންމެހާ އިންތިޒާމުތަކާއި، ވަޞީލަތްތަކެއް އެންމެ ފުޅާމިނެއްގައި ފޯރުކޮށްދީ، އެހީތެރިވެދިނުމަށް ތައްޔާރަށް އޮތް ކަމަށެވެ.

ވެކްސިންއެއް ނުވަތަ ފަރުވާއެއް ހޯދިފައިނުވާ ކޮވިޑް-19 އިން ރައްކާތެރިވުމަށް އަމިއްލައަށް ކުރެވިދާނެ އެންމެ މުހިންމު ކަމަކީ ސާފުތާހިރުކަން ހިފެހެއްޓުމެވެ. ކޮވިޑް-19ހަލުވިކަމާއެކު ފެތުރެމުންދާއިރު، ޞިއްޙީ މާހިރުންނާއި، ޑޮކްޓަރުން އެންމެ ގިނައިން އިރުޝާދުދޭ އެއްކަމަކީ ގިނަ ގިނައިން އަތްދޮވުމެވެ. ދުނިޔޭގެ ޞިއްޙަތު ޖަމްޢިއްޔާއިންވެސް ލަފާދެނީ މިހެންނެވެ. ހަމަ އެއާއެކު ޑަބްލިއުއެޗްއޯއިން މިއަދު ވަނީ SafeHands# ގެ ނަމުގައި ޗެލެންޖެއް ފަށާފައެވެ. މި ޗެލެންޖް ފަށްޓަވައިދެއްވީ އެ ޖަމާއަތުގެ ޑިރެކްޓަރ ޖެނެރަލް ޑރ. ޓެޑްރޯސް އެދެނޯމް ގެބްރިޔޭސަސް އެވެ،، މި ޗެލެންޖު ގެ މަޤްޞަދަކީ ކޮވިޑް-19 އިން މިންޖުވުމަށްޓަކައި ސާފުތާހިރުވުމުގެ ގެ ވަރުގަދަކަން ދައްކުވައިދީ، އަތްދޮވުން ޕްރޮމޯޓްކުރުމުވެ.

ކޮވިޑް-19 އިން ރައްކާތެރިވުމަށް މީހުން އެއްވާ ތަންތަނަށް ނުދިއުމަށް ނައިބު ރައީސް ފައިސަލް ނަސީމް ގޮވާލައްވައިފިއެވެ.

ކޮވިޑް-19 އިން ރައްކާތެރިވުމަށް ސަރުކާރުން ގިނަ މަސައްކަތްތަކެއްކުރާކަން ފާހަގަކުރައްވައި ނައިބު ރައީސް ފައިސަލް ވިދާޅުވީ ކޮވިޑް-19 އިން ރައްކާތެރިވެ ތިބުމަށް ޢާންމު ސާފުތާހިރުކަމަށް އިސްކަންދޭންޖެހޭ ކަމަށެވެ.

އެގޮތުން ގިނަގިނައިން އަތްދޮވެ، މީހުން އެއްވާ ތަންތަނަށް ނުދިއުމަށް އެމަނިކުފާނު އިލްތިމާސްކުރެއްވިއެވެ.

ނައިބު ރައީސް ފައިސަލް ވިދާޅުވީ މިދަނޑިވަޅުގައި ކަމާ ބެހޭ އިދާރާތަކުންދޭ އިރުޝާދުތައް އަޑުއަހާ އެއަށް ޢަމަލުކުރަންޖެހޭ ކަމަށެވެ.

އޭޑީކޭ ހޮސްޕިޓަލުން "އޮންލައިން ފްލޫ ކްލިނިކް"އެއް ޤާއިމުކޮށް މިއަދު ހެދުނު 8 ޖެހިއިރު ޚިދުމަތް ދޭން ފަށައިފިއެވެ.

ކޮންމެ ދުވަހެއްގެވެސް ހެދުނު 8 އިން ރޭގަނޑު 8 ޖަހަންދެން އޮންލައިން ޕްލެޓްފޯމް މެދުވެރިކޮށް އެ ހޮސްޕިޓަލުގެ ޑޮކްޓަރުންނަށް ދެއްކުމުގެ ޚިދުމަތް މިކްލިނިކުން ހިލޭ ހޯދޭނެކަމަށް އޭޑީކޭއިން ބުނެއެވެ. އެޕޮއިންޓްމަންޓް ހެއްދުމަށް ގުޅާލުމުން، ޑިޖިޓަލް މެމޯއެއް ފޯނަށް ލިބޭނެ އިންތިޒާމުވަނީ ހަމަޖައްސާފައެވެ. އަދި މީގެ އިތުރުން "އާސްކް އޭޑީކޭ" މެދުވެރިކޮށް ވައިބަރ، ޓެލެގްރާމް ނުވަތަ ފޭސްބުކް މެސެންޖަރއިން ކިއު ތަރުތީބު ބަލާލެވޭނެއެވެ. ކިއު ތަރުތީބުން އޮންލައިން ކްލިނިކްގެ ޑޮކްޓަރު ޚިދުމަތް ދެމުންދާއިރު، ބަލި މީހާއަށް ގުޅާ، ބަލީގެ އަމާލާތްތައް ދެނެގަނެ، ބޭސް ސިޓީއާއި، ޑޮކްޓަރުގެ އިރުޝާދުތައްވެސް ލިބޭނެކަމަށް އޭޑީކޭއިން ބުނެއެވެ.

ޕާކިސްތާނުގެ މަދަރުސާތަކާއި، ކޮލެޖުތަކާއި،ސްކޫލްތަކާއި، ޔުނިވަރސިޓީތައް ތިން ހަފުތާގެ މުއްދަތަކައް ބަންދުކުރަން އެޤައުމުގެ ސަރުކާރުން ނިންމައިފިއެވެ. މިގޮތައް ނިންމެވީ އިއްޔެ ބޭއްވި އެޤައުމުގެ ޤައުމީ ސަލާމަތާއި ބެހޭ ކޮމިޓީންނެވެ. ބޮޑު ވަޒީރު އިމްރާންޚާން ރިޔާސަތުގައި އިންނަވާ މިކޮމިޓީގައި، ކެބިނެޓާއި، އަސްކަރިއްޔާގެ އިސްވެރިން ބައިވެރިވަޑައިގެންނެވިއެވެ.

މި ބައްދަލުވުމުގެ ތަފުޞީލު ހާމަކުރައްވަމުން ޕާކިސްތާނުގެ އެޑިއުކޭޝަން މިނިސްޓަރ ޝަފްޤާތު މަޙްމޫދު ވިދާޅުވެފައިވަނީ އެޕްރީލްމަހުގެ 5 ވަނަ ދުވަހުގެ ނިޔަލަށް އެޤައުމުގެ ހުރިހާ މަދަރުސާތަކާއި، ކޮލެޖުތަކާއި،ސްކޫލްތަކާއި، ޔުނިވަރސިޓީތައް ބަންދުކުރަން ކޮމިޓީން ނިންމާފައިވާކަމަށެވެ. އަދި އަލުން ހުޅުވުމުގެ ކުރިން މިކަމާއި ބެހޭ ބައްދަލުވުމއް މާރޗުމަހުގެ 26 ވަނަ ދުވަހު ބާއްވާނެކަމަށް މިނިސްޓަރު ވިދާޅުވެފައިވެއެވެ.

އެމެރިކާގައި ހުންނަ، އިންޓަރނޭޝަނަލް މަނިޓަރީ ފަންޑް(އައިއެމްއެފް)ގެ މައި މަރުކަޒުގެ މުވައްޒަފަކު ވައިރަސްއަށް ޕޮޒިޓިވްވުމާއި ގުޅިގެން، އެތާނގެ މުވައްޒަފުން ގޭގައި ތިބެގެން ވަޒީފާގެ ޒިންމާ އަދާކުރެވޭނެ އިންތިޒާމު އެ އިދާރާގެ މެނޭޖްމެންޓުން ހަމަޖައްސައިދީފިއެވެ.

މިކަން ހާމަކޮށް މާލީ އިދާރާއިން ޢާންމުކޮށްފައިވާ ބަޔާނުގައި ވަނީ މުވައްޒަފަކު ވައިރަސްއަށް ޕޮޒިޓިވްވުމާއި ގުޅިގެން އެހެން މުވައްޒަފުންގެ ސަލާމަތާއި ރައްކަލަކަށް، ވަކި ގޮތެއް އަންގަންދެން ގޭގައި މަޑުކޮށްގެން މަސައްކަތްކުރަން އަންގާފައިވާކަމަށެވެ. އެއިދާރާއިން ވަނީ މިކަމާއި ގުޅިގެން ޔޫރަޕަށް ކުރަން އޮތް މިޝަންތަކުގެ ދަތުރުތައްވެސް ހުއްޓާލާފައެވެ.

ވައިރަސްއަށް ޕޮޒިޓިވްވި އައިއެމްއެފްގެ މުވައްޒަފު އެކަހެރިކޮށްގެން ފަރުވާދެމުންދާއިރު، އެކި ޙައިޞިއްޔަތުތަކުން އޭނާއާއި ދިމާވި މީހުން ހޯދުމުގެ މަސައްކަތް މިހާރުދަނީ ކުރަމުންނެވެ. އައިއެމްއެފްގެ އިމާރާތް މިހާރު ޑިސްއިންފެކްޓް ކުރުމުގެ މަސައްކަތް ދަނީ ކުރަމުންނެވެ. 2،000 މީހުން މަސައްކަތްކުރަމުންދާ މި މަރުކަޒު ހުންނަނީ، އެމެރިކާގެ ރިޔާސީ ގަނޑުވަރު ވައިޓްހައުސްއާއި އިންވެގެންނެވެ.

އެޤައުމުގެ ދާޚިލީ ވުޒާރާއިން ބުނެފައިވަނީ ނޮވެލް ކޮރޯނާވައިރަސް ފެތުރުން ހުއްޓުވުމަށް ކުރަމުންދާ މަސައްކަތުގެ ދަށުން މިއަދުން ފެށިގެން ދެހަފުތާގެ މުދައްތަކައް ބައިނަލްއަޤުވާމީ ހުރިހައި އުދުހުންތަކެއް ހުއްޓާލާކަމަށެވެ. އެވުޒާރާއިން ބުނެފައިވަނީ ދަތުރުކުރުން މަނާ މި ދެހަފުތާތެރޭގައި، ޚާއްޞަ ޙާލަތުގައި ސަރުކާރުން ކަނޑައަޅާ ފްލައިޓުތަކައް ޖިއްދާ އެއަރޕޯޓުގައި ޖެއްސުމުގެ ހުއްދަ ދޭނެކަމަށެވެ.

ސައުދީން ފާއިތުވެދިޔަ 24 ގަޑިއިރުގެތެރޭގައި، 24 ކޭސްއެއް ރިޕޯޓުކޮށްފައިވާއިރު، މިހާތަނަށް އެޤައުމުން 86 ކޭސްއެއް ވަނީ ރިޕޯޓުކުރެވިފައެވެ.

ބްރެޒިލްގެ ރައީސް ހެއަރ ބޯލްސޮނާރޯ ކޮވިޑް-19 އަށް ޓެސްޓްކުރެއްވިއިރު ވައިރަސްއަށް ނެގެޓިވްކަން ހާމަވެއްޖެއެވެ. އެމަނިކުފާނު މިކަން ހިއްސާކުރައްވާފައިވަނީ ފޭސްބުކް ޕޯސްޓެއްގައެވެ. ވައިރަސްގެ އެއްވެސް އަލާމާތެއް އެމަނިކުފާނުގެ ހަށިގަނޑުން މިހާތަނަށް ނުފެނުނު ނަމަވެސް ޓެސްޓްކުރެއްވީ، އެމަނިކުފާނުގެ ޤާނޫނީ ވަކީލު ވައިރަސްއަށް ޕޮޒިޓިވްވުމާއި ގުޅިގެންކަމަށް ރިޕޯޓުތައް ބުނެއެވެ.

ބްރެޒިލްގެ ރައީސް ހެއަރ ބޯލްސޮނާރޯގެ ޤާނޫނީ ވަކީލު ކަރީނާ ކޫފާ ކޮވިޑަ-19 އަށް ޕޮޒިޓިވްވެއްޖެއެވެ.

އޭނާއަށް ވައިރަސް ޖެހުނި އެމެރިކާއަށް ދާދި ފަހުން ކުރެއްވި ރަސްމީ ދަތުުރުފުޅުގެތެރެއިން ކަމަށް ރިޕޯޓުތައް ބުނެއެވެ.

ދުނިޔޭގެ 123 ޤައުމަކުން މި ވައިރަސް ފެނިފައިވާއިރު، މިހާތަނަށް އައިއިރު އަދިވެސް މިވައިރަސް އެންމެ ގިނައިން ރިޕޯޓުކޮށްފައިވަނީ ޗައިނާއިންނެވެ.

އެންމެ ގިނަ އަދަދަކަށް ވައިރަސް ރިޕޯޓުކުރެވުނު 08 ޤައުމުގެ ތަފުޞީލު:

* ޗައިނާ: 80,824 ކޭސް/ 3,189 މަރު

* އިޓަލީ:17,660ކޭސް/1,26 މަރު

* އިރާން: 11,364 ކޭސް/514 މަރު

* ދެކުނު ކޮރެއާ: 8,086 ކޭސް/ 72 މަރު

* ސްޕެއިން: 5,232 ކޭސް/ 133 މަރު

* ޖަރުމަންވިލާތް: 3,675 ކޭސް/ 08 މަރު

* ފަރަންސޭސިވިލާތް: 3,661 ކޭސް/ 79 މަރު

* އެމެރިކާ: 2,291 ކޭސް/ 50 މަރު

ދުނިޔޭގެ ޞިއްޙަތު ޖަމްޢިއްޔާއިން ހާމަކުރާގޮތުގައި، ދުނިޔޭގެ 123 ޤައުމަކުން މިހާރު ވައިރަސް ރިޕޯޓުކޮށްފައިވާއިރު، ޖުމުލަ 145,634 މީހުންނަށް މިވައިރަސް ޖެހި، ވައިރަސްއަށް ފަރުވާދެމުން ދަނިކޮށް 5,436 މީހުން ވަނީ މަރުވެފައެވެ.

* ވައިރަސް ޖެހުނު މީހުންގެ އަދަދު:145,634

* މަރުވި މީހުންގެ އަދަދު:5,436

* ފަރުވާދީގެން ރަނގަޅުވީ މީހުންގެ އަދަދު:72,528

* މިހާރު ފަރުވާދެމުންދާ މީހުންގެ އަދަދު:67,670

* ފަރުވާދެމުންދާ މީހުންގެ ތެރެއިން ނާޒުކު ހާލަތްތަކުގައި ތިބި މީހުންގެ އަދަދު:6,082

ފަރަންސޭސި ވިލާތުގެ ހެލްތު މިނިސްޓަރ އޮލީވިއަރ ވެރަންއާއި ޙަވާލާދީ ބޭރުގެ މީޑިއާތަކުން ރިޕޯޓުކުރާ ގޮތުގައި، މިދިޔަ ބުރާސްފަތި ދުވަހާއި ހުކުރު ދުވަހު އެކަނިވެސް އެޤައުމުން 800 މީހުން ކޮވިޑް-19އަށް ޕޮޒިޓިވްވެފައިވެއެވެ.

މިއާއެކު އެޤައުމުގައި ވައިރަސް ޖެހުނު މީހުންގެ އަދަަދު ވަނީ 3،661އަށް އަރާފައެވެ. އަދި މަރުވި މީހުންގެ ޖުމުލަ އަދަދަކީ 79އެވެ.

ކޮވިޑް-19 އެމެރިކާއިން ފެނުނު ފަހުން މިހާތަނަށް 2،204 ކޭސް ރިޕޯޓުކުރެވިފައިވާއިރު، މީގެތެރެއިން 49 މީހުން ވަނީ މަރުވެފައެވެ.

އެމެރިކާގެ ސެންޓަރސް ފޮރ ޑިޒީސް ކޮންޓްރޯލް އެންޑް ޕްރިވެންޝަން އިން މައުލޫމާތު ދޭގޮތުގައި، މީގެތެރެއިން 70 މީހުންނަކީ ޗައިނާގައި ތިއްބާ ވައިރަސް ޖެހުނު މީހުންނާއި، ޖަޕާނުގައި ކަރަންޓީންކުރި ޑައިމަންޑް ޕްރިންސެސްގައި ދަތުރުކުރަމުންދަނީކޮށް ވައިރަސްއަށް ޕޮޒިޓިވްވީ މީހުންކަމުގައެވެ.

އަދި ބާކީ 2،134 މީހުންނަކީ ސީދާ އެމެރިކާގެ އެކި ސްޓޭޓުތަކުން ޕޮޒިޓިވްވީ މީހުންކަމަށް އެ ސެންޓަރުން ބުނެއެވެ.

އެމެރިކާގެ 49 ސްޓޭޓަކުން މިހާރު މި ވައިރަސް ރިޕޯޓުކޮށްފައިވާއިރު، މިހާރު ވައިރަސް ނުފެންނަނީ ހަމަ އެކަނި ވެސްޓް ވާރޖީނިއާއިންކަމަށްވެސް އެސެންޓަރުން ބުނެއެވެ.

ބްރެޒިލްގެ ރައީސް ހެއަރ ބޯލްސޮނާރޯ ކޮވިޑް-19 އަށް ޓެސްޓްކުރައްވައިފިއެވެ. ވައިރަސްގެ އެއްވެސް އަލާމާތެއް އެމަނިކުފާނުގެ ހަށިގަނޑުން މިހާތަނަށް ނުފެނުނު ނަމަވެސް ޓެސްޓްކުރެއްވީ، ސަލާމަތާއި ރައްކާތެރިކަމުގެ ފިޔަވަޅެއްގެ ގޮތުންކަމަށް އެމަނިކުފާނުގެ ދަރިކަލުން އެޑުއާރޑޯ ވަނީ ވިދާޅުވެފައެވެ.

އެމެރިކާގެ ރިޔާސީ ގަނޑުވަރު ވައިޓްހައުސްއާއި ޑިމޮކްރޭޓުން ގުޅިގެން އެކުލަވާލާފައިވާ ކޮރޯނާ ވައިރަސް ރިލީފް ބިލަަށް ތާއީދުކުރައްވާކަން އެޤައުމުގެ ރައީސް ޑޮނާލްޑް ޓްރަމްޕް ހާމަކުރައްވައިފިއެވެ.

ހައުސް އޮފް ރެޕްރެޒެންޓޭޓިވްގައި މިރޭ މި ބިލަށް ވޯޓަށް އަހާނެއެވެ. މި ބިލު ފާސްވެއްޖެނަމަ އެމެރިކާގެ ހުރިހައި ރައްޔިތުންނަށް ހިލޭ ކޮވިޑް-19 އަށް ޓެސްޓް ކުރުމުގެ ފުރުޞަތު ލިބި، މުސާރަ ލިބޭގޮތައް ޗުއްޓީ ލިބޭނެ އިންތިޒާމު ހަމަޖެހިގެންދާނެއެވެ.

އިންޑިއާގެ ނޫސްތަކުން ރިޕޯޓުކުރާގޮތުގައި އިއްޔެ ވައިރަސްޖެހިގެން ފަރުވާ ހޯދަމުން ދަނިކޮށް ވެރިރަށް ނިއުދިއްލީގެ އުމުރުން 68 އަހަރުގެ އަންހެނަކު ވަނީ މަރުވެފައެވެ. މިއީ މިވައިރަސްގައި އިންޑިއާގައި މަރުވި ދެވަނަ މީހާއެވެ.

އޭނާއަށް ވައިރަސް ޖެހިފައިވަނީ އޭނާގެ ދަރިފުޅުގެ ފުށުން ކަމަަށް ރިޕޯޓުތައް ބުނެއެވެ. އެއީ އޭނާގެ ދަރިފުޅު އަމިއްލަ ބޭނުމަކު މިދިޔަ ހަފުތާފައި ސްވިޒަރލޭންޑަށާއި، އިޓަލީއަށް ދަތުރުކުރުމަށްފަހު އެނބުރި ޤައުމަށް އައިސް އޭނާއާއި އެއްކޮށް ދިރިއުޅެފައިވާތީކަމަށްވެއެވެ.

މީގެ ކުރިން މި ވައިރަސްގައި ބުރާސްފަތިދުވަހު މަރުވެފައިވަނީ އިންޑިއާގެ ކަރްނާޓަކާ ސްޓޭޓުގެ އުމުރުން 76 އަހަރުގެ ފިރިހެނެކެވެ.

އިންޑިއާއިން މިހާތަނަށް އައިއިރު 82 މީހުން ވަނީ ވައިރަސްއަށް ޕޮޒިޓިވްވެފައެވެ.

ރޮއިޓަރސްއިން ރިޕޯޓުކުރާގޮތުގައި، އިއްޔެ އެކަނިވެސް ސައުދީން ވަނީ 24 މީހުން ވައިރަސް ޖެހިގެން ރިޕޯޓުކޮށްފައެވެ. މިއާއެކު އެޤައުމުގައި ވައިރަސް ޖެހުނު މީހުން އަދަދު ވަނީ 86 އަށް އަރާފައެވެ.

އިއްޔެ ވައިރަސްއަށް ޕޮޒިޓިވްވީ މީހުންގެ ތެރޭގައި އެޤައުމުގައި ދިރިއުޅޭ މިޞްރުގެ 14 މީހުން ހިމެނެއެވެ.

ދެކުނު އެމެރިކާގެ ގައުމެއް ކަމަށްވާ އުރުގުއޭ އަދި މެދު އެމެރިކާގެ ގައުމެއްކަމަށްވާ ގުއަންޓަމޭލާއިން ކޮވިޑް-19 ގެ ޕޮޒިޓިވް ކޭސްތަކެއް ފެނިއްޖެކަމަށް އެ 2 ގައުމުން ހާމަކޮށްފިއެވެ.

އުރުގުއޭގެ ހެލްތް މިނިސްޓްރީން ހާމަކޮށްފައިވާ ގޮތުން އެގައުމުން 4 މީހަކު ވަނީ ކޮރޯނާވައިރަސް އަށް ޕޮޒިޓިވްވެފައެވެ. އަދި މިއީ އެގައުމުން ފުރަތަމައަށް ފެނުނު ހަތަރު ކޭސް ކަމަށާއި، އެމީހުންނަކީ މި މަހުގެ ކުރީ ކޮޅު އިޓަލީގެ މިލާނުން އައި ބައެއް ކަމަށް އެގައުމުގެ ހެލްތް މިނިސްޓްރީން ވަނީ ބުނެފައެވެ.

އުރުގުއޭގެ ހެލްތް މިނިސްޓްރީން ބުނީ މި އެންމެންގެ ވެސް ހާލު ރަނގަޅުކަމަށާއި އެމީހުން ތިބީ ގޭގައި ބައިތިއްބާފައި ކަމަށެވެ.

މީގެ އިތުރުން ގުއަންޓަމޭލާގެ ރައީސް އެލެޖެންޑްރީ ގިއަމްމައްޓޭ ހުކުރު ދުވަހު އެގައުމުން ވެސް ކޮރޯނާވައިރަސްއަށް ޕޮޒިޓިވްވެފައިވާ މީހަކު ފެނިފައިވާ ކަން ހާމަކުރައްވާފައެވެ.

ގިއަމްމައްޓޭ ވިދާޅުވީ ކޮރޯނާވައިރަސް ޖެހިފައިވަނީ ފިރިހެނެއް ކަމަށާއި، އޭނާ އަކީ މިދިޔަ ހަފްތާގެ ބުދަ ދުވަހު އިޓަލީއަށް ދަތުރުކޮށްފައައި މީހެއް ކަމަށާއި، އޭނާ އަނބުރާ ގައުމަށް އައިސްފައިވަނީ އެއޮރޯމެކްސިކޯގެ ފުލައިޓަކުން ކަމަށެވެ.

ޓްވިޓާގައި އާންމުކުރި ބަޔާނެއްގައި ގުއަންޓަމޭލާގެ ރައީސް ވަނީ މި ދަނޑިވަޅުގައި ހާސް ނުވުމަށާއި، ރައްކާތެރިވުމުގެ ގޮތުން ފިޔަވަޅު އެޅުމަށް ގޮވާލައްވާފައެވެ.

ހުކުރު ދުވަހުގެ ރޭ އެކަނި ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރި 7 މީހަކު ފެނިގެން 4 ރިސޯޓެއް މޮނިޓާ ކުރަން ފަށައިފިއެވެ.

އެޗްޕީއޭއިން ހުކުރު ދުވަހުގެ ރޭ ބުނެފައިވަނީ މި އެންމެންނަކީ ވެސް ބިދޭސީން ކަމަށެވެ. ނަމަވެސް އެއީ އެ ރިސޯޓުގައި މަސައްކަތް ކުރާ މުވައްޒަފުން ކަމެއް ނުވަތަ ފަތުރުވެރިން ކަމެއް ހާމަކޮށްފައެއް ނުވެއެވެ.

އެގޮތުން މީރު އައިލެންޑް ރިސޯޓުން ބިދޭސީއެއްގެ ގައިން ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރި މީހަކު ފެނިގެން ހޯމް އައިސޮލޭޓްކޮށްފައިވާ ކަމަށެވެ. އަދި ރައްކާތެރިކަމުގެ ގޮތުން ރިސޯޓް މޮނިޓަރިންއަށް ލެވިފައިވާ ކަމަށެވެ.

މީގެ އިތުރުން ބަނޑޮސް އައިލެންޑް ރިސޯޓުން ބިދޭސީއެއް ކޮވިޑް-19 އަށް ޝައްކުކުރެވޭ އަލާމާތްތަކެއް ހުރެގެން އެކަހެރިކޮށްފައިވާ އިރު ރިސޯޓް ވަނީ މޮނިޓރިންއަށްލާފައެވެ. އަދި އޮޅުވެލި ރިސޯޓުން ވެސް ކޮވިޑް-19 އަށް ޝައްކުކުރެވޭ އަލާމާތްތަކެއް ހުރި 2 މީހަކު ފެނިގެން އެ ރިސޯޓާއި، ޝެރަޓަން މޯލްޑިވް ފުލްމޫންއިން ވެސް ބިދޭސީއެއް ފެނިގެން އެކަހެރިކޮށް ރިސޯޓްވަނީ މޮނިޓަރިންއަށް ލާފައެވެ.

އަދި ސިކްސް ސެންސަސް ލާމުން އިތުރު 2 މީހަކު ގައިން ކޮވިޑް-19 އަށް ޝައްކުކުރެވޭ އަލާމާތްތަކެއް ފެނިގެން އެ ދެމީހުން ވެސް ވަނީ އެކަހެރިކޮށްފައެވެ. މި 2 މީހުންނާއެކު އެ ރިސޯޓުގައި 4 މީހަކު ވަނީ އައިސޮލޭޓް ކޮށް މޮނިޓާކުރަމުންނެވެ.

މީރު އައިލެންޑް ރިސޯޓުން ކޮވިޑް-19 ގެ އަލާމާތްތައް ހުރި ބިދޭސީއެއް ފެނިގެން ޓެސްޓްކުރުމުގެ މަސައްކަތް ފަށައިފިއެވެ.

އެޗްޕީއޭއިން ބުނީ އޭނާ މިވަގުތު ހުތީ ހޯމް އައިސޮލޭޝަންގައި ކަމަށާއި، ރިސޯޓް މޮނިޓަރިންގެ ހާލަތަށް ގެނެސްފައިވާ ކަމަށެވެ.

ބަނޑޮސް ރިސޯޓުން ބިދޭސީއެއްގެ ގައިން ކޮވިޑް-19 އަށް ޝައްކުކުރެވޭ އަލާމާތްތަކެއް އެ ރިސޯޓް މޮނިޓާކުރަން ފަށައިފިއެވެ.

އެޗްޕީއޭއިން ކުރި ޓްވީޓެއްގައި ބުނެފައިވަނީ ބަނޑޮސް ރިސޯޓުން ކޮވިޑް-19 އަށް ޝައްކުރުވޭ އަލާމާތްތަކެއް ހުރި ބިދޭސީއެއް ހޯމް އައިސޮލޭޝަންއަށް ލުމަށްފަހު ޓެސްޓް ކުރުމަށް ސާމްޕަލް ނަގާފައިވާ ކަމަށެވެ. އަދި ރައްކާތެރިކަމުގެ ފިޔަޅު އެޅުމުގެ ގޮތުން އެ ރިސޯޓް މޮނިޓަރިންގެ ހާލަތަކަށް ގެނެސްފައިވާ ކަމަށެވެ.

އޮޅުވެލި ބީޗް ރިސޯޓުން ދެ ބިދޭސީއެއްގެ ގައިން ކޮވިޑް 19 އަށް ޝައްކުކުރެވޭ އަލާމާތްތަކެއް ހުރުމުން ގޭގައި އައިސޮލޭޓްކޮށްފި ކަމަށް އެޗްޕީއޭ އިންބުނެފިއެވެ. އެޗްޕީއޭ އިން ބުނީ އެރަށް މިހާރު ދަނީ މޮނީޓަރ ކުރެވެމުންކަމަށެވެ.

ޝެރަޓަން މޯލްޑިވްސް ފުލް މޫން ރިސޯޓުގައި ހުރި ބިދޭސީއެއްގެ ގައިން ކޮވިޑް 19 އަށް ޝައްކުކުރެވޭ އަލާމާތްތަކެއް ހުރުމުން އޭނާ ގޭގައި އައިސޮލޭޓް ކޮށްފައިވާ ކަމަށް އެޗްޕީއޭ އިން ބުނެފިއެވެ. އެޗްޕީއޭ އިން ބުނީ އެ ރިސޯޓު މޮނީޓަރ ކުރަމުންދާކަމަށެވެ.

ކޮވިޑް-19 އަށް ޝައްކުކުރެވޭ އަލާމާތްތަކެއް ހުރި ބިދޭސީއެއް ބ. ފެހެންދޫގައިވަނީ އެކަހެރިކޮށް، ސާމްޕަލް ނަގައި ޓެސްޓު ކުރުމުގެ މަސައްކަތް ފަށާފައި. މިކަމާއި ގުޅިގެން އެ ރަށްވަނީ މޮނީޓަރިންގ ހާލަތަކަށް ގެނެވިފައި.

ކޮރޯނާވައިރަސް (ކޮވިޑް-19) އަށް ފިއޮރެންޓީނާގެ ފޯވާޑް ޑޫޝަން ވްލާހޮވިޗް ޕޮޒިޓިވްވެއްޖެ އެވެ.

އުމުރުން 20 އަހަރުގެ ޑޫޝަން ކޮރޯނާވައިރަހަށް ޕޮޒިޓިވްވިކަން އެޓީމުން ވަނީ ކަށަވަރުކޮށްދީފައެވެ. ރިޕޯޓުތައް ބުނާގޮތުން ޑޫޝަން މި ވައިރަހަށް ޕޮޒިޓިވްވުމާއެކު، މިހާރު އޭނާ ވަނީ އައިސޮލޭޝަނަށް ލާފައެވެ. އަދި މުޅި ޓީމުގެ ކުޅުންތެރިންނާއި އޮފިޝަލުންގެ ކަންކަންވެސް މިހާރު ބަލަމުންދާ ކަމަށް ރިޕޯޓުތައް ބުނެއެވެ.

ފިއޮރެންޓީނާގެ ފޯވާޑް ޑޫޝަން ވްލާހޮވިޗް ކޮރޯނާވައިރަސް (ކޮވިޑް-19) އަށް ޕޮޒިޓިވްވިއިރު، މީގެ ކުރިން ވަނީ ޔުވެންޓަސްގެ ޑިފެންޑަރު ޑެނިއެލް ރުގާނީ އާއި ސަމްޕްޑޯރިއާގެ ފޯވާޑް މަނޯލޯ ގަބިއަޑިނީ ވެސް ވަނީ މި ވައިރަހަށް ޕޮޒިޓިވްވެފައެވެ. އަދި ހުކުރު ދުވަހުގެ ވަގުތެއްގައި ސަމްޕްޑޯރިއާއިން ވަނީ އެޓީމުގެ އިތުރު ކުޅުންތެރިންތަކެއްވެސް މި ވައިރަހަށް ޕޮޒިޓިވްވެފައިވާ ކަމަށް ބުނެފައެވެ. ނަމަވެސް އެއީ ކޮން ކުޅުންތެރިންނެއް ކަމެއް ހާމަކޮށްފައެއް ނުވެއެވެ.

ކޮވިޑް19- އިން ރައްކާތެރިވުމުގެ ގޮތުންތަންތަން ސާފުކުރުމަށް ބޭނުން ކުރަން ރަނގަޅީކޮންކަހަލަ ޑިސްއިންފެކްޓެންޓެއް؟

ސާފުކުރަން ބޭނުންވާ ތަން ހަޑިކޮށް ހުރެއްޖެނަމަ ފުރަތަމަ އެތަނެއް އާމުކޮށް ތަންތަންސާފުކުރާ ދޮންނަކުނޑިއެއް ބޭނުން ކޮށްގެން ރަނގަޅަށް ސާފު ކޮށްލާ.

އޭގެ ފަހުގައި (1މިލިލީޓަރުގ ބުލީޗް އަދި 9 މިލިލީޓަރު ފެން) މި މިންގަޑަށް ޑައިލޫޓްކޮށްފައިވާ ބުލީޗު ސޮލިއުޝަންއިން) އެތަނެއް ނުވަތަ އެއްޗެއް ސާފުކުރޭ.

ބްލީޗް ބޭނުންކުރުމުގެ ކުރިން އަތްތިލަ ރައްކާތެރި ކުރުމުގެ ގޮތުން ރަބަރު އަންގިއެއްފަދަ އެއްޗެއް ބޭނުންކުރޭ.

24 ގަޑި އިރުގެ ތެރޭގައި ޕޮޒިޓިވްވި ކޭސްގެ އަދަދު - 1

މިހާތަނަށް ބަލި ފެނުނު މީހުންގެ އަދަދު - 9

ފަރުކޮޅުފުށި އައިސޮލޭޝަންގައި - 9

ވިލިވަރު ކަރަންޓީންގައި - 17

ލ. ސިކްސް ސެންސަސް ރިސޯޓުން އިތުރު 2 މީހަކު ހޯމް އައިސޮލޭޓްކޮށްފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކުރި ޓްވީޓެއްގައި ބުނެފައިވަނީ އެ ދެމީހުން ހޯމް އައިސޮލޭޝަން ކުރުމަށްފަހު މޮނިޓާ ކުރަމުންދާ ކަމަށާއި، ރާއްޖެ އެތެރެވުމުގެ ކުރިން އެ ދެ މީހުން ވެސް ކޮވިޑް-19 އަށް ޕޮޒިޓިވް ވެފައިވާ މީހަކާއި ކޮންޓެކްޓް ވެފައިވާ ކަމަށް އެ ދެމީހުންގެ ފަރާތުން މައުލޫމާތު ލިބިފައިވާ ކަމަށެވެ.

މިއާއެކު އެ ރިސޯޓުގައި ހޯމް އައިސޮލޭޝަންގައި 4 މީހަކު އެބަތިއްބެވެ.

އެޗްޕީއޭއިން ބުނީ މީގެ ތެރެއިން އެއްވެސް މީހަކުގެ ގައިން ކޮވިޑް-19 އަށް ޝައްކު ކުރެވޭ އަލާމާތެއް ފެނިފައި ނުވާތި އެ ރިސޯޓް މޮނިޓަރިންގެ ހާލަތަކަށް ގެނެސްފައި ނުވާ ކަމަށެވެ.

ޗައިނާގެ ހޫބެއި ޕްރޮވިންސްގެ، ވުހާން ސިޓީން އުފަންވެގެން ދުނިޔޭގެ ގައުމުތަކަށް ފެެތުރިގަންނަމުން އަންނަ ކޮވިޑް-19 ސްޕެއިންގައި ފެތުރެމުންދާތީވޭ ބައްޔާ ދެކޮޅަށް މަސައްކަތް ކުރުމުގެ ގޮތުން އެ ގައުމުގައި ކުރިޔަށް އޮތް 45 ދުވަހާ ހަމައަށް ކުއްލި ހާލަތު އިއުލާންކޮށްފި އެވެ.

ސްޕެއިންގައި ކުއްލި ހާލަތު އިއުލާން ކުރެއްވީ ހުކުރު ދުވަހު އެ ގައުމުގެ ބޮޑު ވަޒީރު ޕެޑްރޯ ސަންޗޭޒް އެވެ. އެކަމަށް ރަސްމީ ގޮތުން ނިންމަވާނީ ހޮނިހިރު ދުވަހު އޮންނަ ވަޒީރުންގެ މަޖިލީހުގެ ބައްދަލުވުމުގައި ކަަމަށް މީޑިއާތަކުން ރިޕޯޓްކުރެ އެވެ.

އިޓަލީ އަށް ފަހު ޔޫރަޕްގެ ގައުމުތަކުގައި އެންމެ ބޮޑަށް ކޮރޯނާވައިރަސް ފެތުރެމުންދަނީ ސްޕެއިންގަ އެވެ. އެ ގައުމުގައި މިހާތަނަށް ކޮވިޑް-19 އަށް 4209 މީހަކު ވަނީ ޕޮޒިޓިވްވެފައެވެ. ބުރާސްފަތި ދުވަހު އެކަނިވެސް ސްޕެއިނުން ކޮވިޑް-19 ގެ 1000 ކޭހެއްވަނީ ރިޕޯޓް ކޮށްފަ އެވެ. އަދި 120 މީހަކު ވަނީ މި ރޯގާގެ ސަބަބުން މަރުވެފަ އެވެ.

ކޮވިޑް-19 އިން ރައްކާތެރިވުމުގެ ގޮތުން އަޅަމުންދާ ފިޔަވަޅު ތަކުގެ ތެރެއިން ސްކޫލްތަކާއި، ސިނާމާތަކުގެ އިތުރުން ކުޑަކުދިން ކުޅޭ ޕާކްތައް ވަނީ ވަގުތީ ގޮތުުން ބަންދުކޮށްފަ އެވެ. ސްޕޭންގެ ވެރިރަށް އަދި އެ ގައުމުގެ އެންމެ މުއްސަނދި އެއް ސީޓީ މެޑްރިޑް ސަރަހައްދުގެ ރެސްޓޯރެންޓްތަކާއި، ފިހާރަަތައް ހޮނިހިރު ދުވަހުން ފެށިގެން ބަންދުކުރުމަށް ވަނީ ނިންމާފައެވެ.

ސްޕެއިންގައި ކުއްލި ހާލަތު އިއުލާންކޮށްފައިވާއިރު، އިޓަލީ، ސްލޮވޭކިޔާ، ހަންގޭރީ، ޗެކް ރިޕަބްލިކް އަދި ބަލްގޭރިއާ ގައި ވަނީ ކުއްލި ހާލަތު އިއުލާން ކޮށްފައެވެ.