ކޮވިޑް-19: އެންމެ ފަހުގެ

ކޮވިޑް-19 އާއި ގުޅިގެން އެމްޑަބްލިޔުއެސްސީގެ އޮންލައިންގެ ޚިދުމަތްތައް ބޭނުންކުރުމަށް އިލްތިމާސްކޮށްފި އެވެ. އެކަމާއި ގުޅިގެން އެމްޑަބްލިޔުއެސްސީން ނެރެފައިވާ ބަޔާނެއްގައި ބުނެފައިވަނީ ކަސްޓަމަރ ސަރވިސް ކައުންޓަރަށް ވަޑައިގަތުމުގެބަދަލުގައި، މިކުންފުނީގެ މޯބައިލް އެޕް އަދި އޮންލައިން ޚިދުމަތުގެ ބޭނުން ހިފުމަށް މިކުންފުނިން ކަސްޓަމަރުންނަށް އިލްތިމާސްކުރާ ކަމަށެވެ.

އަފްޣާނިސްތާނުގައި ވައިރަސް ޖެހުނު މީހުންގެ އަދަދު 5 ށް އަރައިފިކަމަށް އެގައުމުން ބުނެފި އެވެ.

އެގައުމުން ބުނީ މިމީހާއަކީ ދާދިފަހުން އިރާނަށް ދަތުރުކުރި މީހެއްކަމަށެވެ.

ކޮވިޑް-19 އާއި ގުޅިގެން މާލޭގެ މިސްކިއްތަކަށް ދާ މީހުން ބޭނުން ކުރުމަށް ދިޔާ ސައިބޯނި ބަހަށްޓަން މިނިސްޓްރީ އޮފް އިސްލާމިކް އެފެއާސް އާއި މާލެ ސިޓީ ކައުންސިލް އިން ގުޅިގެން ނިންމައިފިއެވެ.މި ވައިރަސް އާއި ގުޅިގެން މާލޭގެ މިސްކިއްތަކަށް ދާ މީހުން ބޭނުން ކުރުމަށް ދިޔާ ސައިބޯނި ބެހެއްޓިގެން ދާނެ ކަމަށް މިނިސްޓްރީ އޮފް އިސްލާމިކް އެފެއާސް ގެ ޑެޕިއުޓީ މިނިސްޓަރ އަހްމަދުﷲ ޖަމީލް ކުރައްވާފައިވާ ޓްވީޓް އެއްގައި ވިދާޅުވެފައި ވެއެވެ.

ކޮވިޑް-19 އެންމެ ބާރަށް ފެތުރެމުންދާ 10 ގައުމަކީ:

ޗައިނާ: 80،754 މީހުންނަށް ވައިރަސް ޖެހިފައި، 3136 މީހުން މަރުވެފައި

އިޓަލީ: 9,172 މީހުންނަށް ޖެހިފައި، 463 މީހުން މަރުވެފައި

ސައުތު ކޮރެއާ: 7,513 މީހުންނަށް ޖެހިފައި، 54 މީހުން މަރުވެފައި

އިރާން: 7,161 މީހުންނަށް ޖެހިފައި، 237 މީހުން މަރުވެފައި

ޖަޕާން: 1,210 މީހުންނަށް ޖެހިފައި، 16 މީހުން މަރުވެފައި

ފްރާންސް: 1,116 މީހުންނަށް ޖެހިފައި، 30 މީހުން މަރުވެފައި

ޖަރމަނީ: 1,112 މީހުންނަށް ޖެހިފައި، 2 މީހުން މަރުވެފައި

އެމެރިކާ: 728 މީހުންނަށް ޖެހިފައި، 26 މީހުން މަރުވެފައި

ސްޕެއިން: 647 މީހުންނަށް ޖެހިފައި، 28 މީހުން މަރުވެފައި

އިނގިރޭސިވިލާތް: 273 މީހުންނަށް ޖެހިފައި، 5 މީހުން މަރުވެފައި

ތައިލެންޑުން އިތުރު 3 މީހުން ކޮވިޑް-19 އަށް ޕޮޒިޓިވް ވެފައިވާ ކަމަށް އެގައުމުން ބުނެފި އެވެ. އެއާއެކު އެގައުމުން މިވައިރަސް ޖެހުނު މީހުންގެ އަދަދު ވަނީ 53 ށް އަރާފަ އެވެ. އަދި ރަނގަޅުވި މީހުންގެ އަދަދު އުޅެނީ 33 ގައެވެ.

ރާއްޖެއިން މިހާރު ފެނިފައިވާ ކޮރޯނާވައިރަސް (ކޮވިޑް-19) ގެ ސަބަބުން ސަރުކާރު އޮފީސްތަކާއި ކުންފުނިތަކަށް އަމާޒުކޮށްގެން ބާއްވަމުން އަންނަ ކްލަބު މޯލްޑިވްސް ކަޕް ފަސްކުރަން ނިންމައިފި އެވެ.

މި މުބާރާތް ފެށުމަށް ކުރިން ތާވަލުކޮށްފައިވަނީ އޭޕްރިލް މަހުގެ ހަތްވަނަ ދުވަހު އެވެ. އެކަމަކު ކޮރޯނާވައިރަސް (ކޮވިޑް-19) ރާއްޖެއިން ފެނުމާއި ގުޅިގެން، މުބާރާތް އަންނަ ޖުލައި މަހުގެ މެދަކާއި ހަމައަށް ފަސްކުރަން ވަނީ ނިންމާފައެވެ.

ކޮވިޑް-19 އާ ގުޅޭ އެންމެ ފަހުގެ މައުލޫމާތު ދިނުމަށް މިއަދު މެންދުރު 14:30 ގައި ދަރުބާރު ގޭގައި ނޫސްވެރިންގެ ބައްދަލުވުމެއް އޮންނާނެކަމަށް އެޗްޕީއޭއިން ބުނެފި އެވެ.

ކޮވިޑް-19 ފެތުރެމުންދާތީ އަޅާ ރައްކާތެރި ކަމުގެ ފިޔަވަޅެއްގެ ގޮތުން ހުޅުމާލޭ ހޮސްޕިޓަލުގައި ތިބޭ ބަލި މީހުންނަށް ޒިޔާރާތް ކުރުން ވަގުތީގޮތުން ހުއްޓުވައިފި އެވެ.

މިކަމާއި ގުޅިގެން ހުޅުމާލެ ހޮސްޕިޓަލުން ނެރުނު ބަޔާނެއްގައި ބުނެފައި ވަނީ ކޮވިޑް-19 އާ ގުޅިގެން ރައްކާތެރިވުމުގެ ގޮތުން މީހުންނަށް ޒިޔާރަތް ކުރުން ވަގުތީ ގޮތުން މަރޗް މަހުގެ 9 ވަނަ ދުވަހުން ފެށިގެން މެދުކަނޑާލާފައިވާ ކަމަށެވެ.

ކޮވިޑް-19 އަށް ޓެސްޓް ކުރި 3 މީހުންވެސް އެވައިރަސް އަށް ނެގެޓިވް ވެފައިވާކަމަށް އެޗްޕީއޭއިން ބުނެފި އެވެ.

އެޗްޕީއޭއިން ބުނީ މީގެ ތެރޭގައި ށ.ފޯކައިދޫ އާއި ޔުނިވަރސަލް ޓިކެޓް އޮފީހުގައި ހުރި މީހާގެ ސާމްޕަލްވެސް ހިމެނޭ ކަމަށެވެ.

ރާއްޖެއިން މިހާރު ފެނިފައިވާ ކޮރޯނާވައިރަސް (ކޮވިޑް-19) ގެ ސަބަބުން ރިޒޯޓުތަކުގެ މެދުގައި ބާއްވަމުން އަންނަ ރިސޯޓު ލީގު 2020 ގެ ހަތަރު ޒޯނުގެ މުބާރާތްތައް ފަސްކޮށްފި އެވެ.

މިހާތަނަށް މި މުބާރާތުގެ ދ. ޒޯނުގެ ކުޅުން ނިމިފައިވާއިރު، ފަސްކޮށްފައިވަނީ ނޯތު މާލެ ޒޯނާއި، ބ. ޒޯނާއި، ސައުތު އަރި ޒޯން އަދި ސައުތު މާލެ ޒޯނުގެ މުބާރާތްތަކެވެ.

ކޮރޯނާވައިރަސް (ކޮވިޑް-19) ގެ ސަބަބުން އަންނަ އޭޕްރީލް މަހުގެ ތިންވަނަ ދުވަހުގެ ނިޔަލަށް އެއްވެސް ކުޅިވަރު ހަރަކާތެއް ނުބޭއްވުމަށް އިޓަލީން ނިންމައިފި އެވެ.

މިކަން އިއުލާނުކޮށްފައިވަނީ ހޯމަ ދުވަހުގެރޭ އިޓަލީގެ ބޮޑުވަޒީރު ޖުސެއްޕޭ ކޮންޓޭ އެވެ. އިޓަލީގައި ހަލުވިކަމާއެކު ކޮރޯނާ ވައިރަސް ފެތުރެމުން އަންނާތީ އިޓަލީ ސަރުކާރުގެ މި ނިންމުމާއެކު، އޭޕްރީލް ތިނެއްގެ ކުރިން ކުޅެން ހަމަޖެހިފައި އޮތް އިޓާލިއަން ލީގުގެ އެއްވެސް މެޗެއް ކުރިއަކަށް ނުގެންދާނެ އެޗެ. އެކަމަކު ބައިނަލްއަގުވާމީ މުބާރާތްތަކުގައި ބައިވެރިވާ އިޓަލީގެ ކްލަބުތަކާއި، ގައުމީ ޓީމުތައް ކުޅޭ މެޗުތައް ކުރިއަށްދާނެ އެވެ.

ދަ ބިލް އެންޑް މެލިންޑާ ގޭޓްސް ފައުންޑޭޝަނާއި އިތުރު ދެ ޗެރިޓީ ފައުންޑޭޝަނަކުން 125 މިލިއަން ޑޮލަރު ކޮވިޑް-19 އަށް ފަރުވާއެއް ހޯދުމަށް ކުރާ މަސައްކަތްތަށް ދިނުމަށް ނިންމައިފި އެވެ. މިއީ މިވައިރަސް އިން ރައްކާތެރިވުމަށް ވެކްސިން އެއް ނުވަތަ ބޭހެއް އުފެއްދުމަށް ކުރާ މަސައްކަތްތަކަށް އިންވެސްޓްކުރުމަށް ކަނޑައަޅާފައިވާ ފައިސާއެވެ. އަދި މިކަމުން އުފައްދާ ބޭސް ނުވަތަ ވެކްސިން ބޭނުންކުރުމަށް ހަމަޖެހިފައިވަނީ ފަގީރު ގައުމުތަކަށެވެ.

ސިންގަޕޯރުގައި އެހެން ގައުމުތަކުގެ ރައްޔިތުން ކޮވިޑް-19 އަށް ފަރުވާ ހޯދާ ޓެސްޓްކުރާނަމަ އެމީހުން އަތުން އަގެއްނަގާ ގޮތަށް އެގައުމުން ހަމަޖައްސައިފި އެވެ. އެގައުމުން އެގޮތަށް ހަމަޖައްސާފައިމިވަނީ ވައިރަސް ޖެހޭ މިންވަރު އެގައުމުގައި އިތުރުވަމުން ދިޔުމާ ގުޅިގެންނެވެ. މިކަމަށް އަމަލުކުރަން ފަށާނީ މަރޗް މަހުގެ 7 ވަނަ ދުވަހުން ފެށިގެން ކަމަށް އެގައުމުން ބުނެއެވެ. ނަމަވެސް ކުރުމުއްދަތަކަށް އެގައުމަށް އަންނަ ފަރާތްތަކާއި އެގައުމުގެ ރައްޔިތުންނަށް ހިލޭ ފަރުވާ ހޯދޭނެކަމަށް އެގައުމުން ބުނެއެވެ.

އެމެރިކާގެ ރައީސް ޑޮނަލްޑް ޓްރަމްޕް އަދި ކޮރޯނާވައިރަސް އަށް ޓެސްޓް ނުކުރައްވާކަމަށް ވައިޓް ހައުސް އިން ބުނެފި އެވެ. އެމެރިކާގައި މިވައިރަސް ފެތުރެމުންދާތީ އެގައުމުގެ އިސްފަރާތްތަކުން އަންނަނީ އަމިއްލައަށް ކަރަންޓީނުގައި ތިއްބަވަމުންނެވެ. އެގޮތުން ޕާލަމަންޓް މެމްބަރުން ގެންދަވަނީ އަމިއްލަ ފުޅަށް ކަރަންޓީނުގައި ތިއްބަވާކަމަށް ހާމަކުރައްވަމުންނެވެ. އެއީ ފާއިތުވި ދުވަސްތަކުގައި މިވައިރަސް ޖެހިފައިވާ މީހުންނާ ކައިރީގައި އުޅެވިފައިވާ ފަރާތްތަކެވެ.

ހަލުވިކަމާއެކު މުޅި ދުނިޔޭގައި މިހާރު ފެތުރެމުންދާ ކޮވިޑް-19 އެންމެ ފުރަތަމަ ފެނުނު ވުހާން އަށް ޗައިނާގެ ރައީސް ޝީ ޖިންޕިންގ ފުރަތަމަ ފަހަރަށް ވަޑައިގަންނަވާނެކަމަށް އެގައުމުން ބުނެފި އެވެ.

މިދަތުރުފުޅުގައި ޝީ ވުހާންގައި ހަރަކާތްތެރިވާ ސިއްހީ އެހީތެރިންނާއި އޮފިޝަލުންނާއި ބައްދަލުކުރެއްވުމަށް ވަނީ ހަމަޖެހިފަ އެވެ.

ކޮވިޑް-19 އެމެރިކާގައި ފެތުރެމުންދާތީ އެގައުމުގެ ޔުނިވަރސިޓީތަކާއި ސްކޫލްތައް ބަންދުކޮށް އޮންލައިންކޮށް ކްލާސްތައް ގެންދަން ފަށައިފި އެވެ.

ކޮވިޑް-19 ޖެހިފައިވާ ފުރަތަމަ މީހާ ޕެނަމާއިން ފެނިފައިވާ ކަމަށް އެގައުމުން ބުނެފި އެވެ.

އެގައުމުން ބުނީ މިއީ 40 އަހަރުގެ އަންހެނެއްކަމަށާއި މިމީހާ ސްޕެއިނަށް ދަތުރުކޮށްފައިވާ ކަމަށެވެ.

ކޮވިޑް-19 މުޅި ދުނިޔޭގައި ހަލުވިކަމާއެކު ފެތުރެމުންދާތީ މުޅި އިޓަލީ ލޮކްޑައުންކޮށްފި އެވެ. މިއާއެކު އިޓަލީން އެއްވެސް މީހަކު ބޭރަށް ދިޔުމާއި އިޓަލީއަށް އެރުން މިވަނީ މަނާވެފަ އެވެ.

އިޓަލީގެ ބޮޑުވަޒީރު ރައްޔިތުންނާ މުހާތަބު ކުރައްވާ ވިދާޅުވީ ހުރިހާ ރައްޔިތުންވެސް ސަލާމަތްތެރިކަމާއެކު ގޭގައި ތިބުމަށް އިލްތިމާސް ކުރައްވާ ކަމަށާއި ކޮންމެހެން ކުރަންޖެހޭ ޒަރޫރީ ދަތުރެއް ކުރާނަމަ ކަމާބެހޭ ފަރާތްތަކުގެ ހުއްދަ ހޯދަންވާނެ ކަމަށެވެ.

އެޗްޕީއޭއިން ކޮށްފައިވާ ޓުވީޓެއްގައި ބުނެފައިވަނީ އދ. ވިލަމަންދޫ ރިސޯޓުގައި މަސައްކަތްކުރަމުންދާ ދިވެއްސެއް ކޮވިޑް 19 އަށް ޝައްކުކުރެވޭ އަލާމާތްތައް ހުރުމުން ޓެސްޓު ހެދުމުގެ މަސައްކަތް ކުރިއަށް ގެންދާކަމަށާއި މޮނިޓަރ ކުރުމަށާއި "ކޮންޓެކްޓް ޓްރޭސިންގ" ހެދުމަށް އެރަށަށް އަރައި ފޭބުން ވަގުތީ ގޮތުން ހުއްޓާލާފައިވާކަމަށެވެ.

ޗައިނާ ސަރުކާރުން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، ކޮވިޑް-19 އަށް އަލަށް ޕޮޒިޓިވްވެފައި ވަނީ އެންމެ 19 މީހެކެވެ.

މިއީ މި ބަލި އެންމެ ފުރަތަމަ ފެނުނު އިރާ އަޅާ ބަލާއިރު، އެންމެ މަދުން ބަޔަކު ޕޮޒިޓިވްވީ ކަމަށް ދެއްކި ދުވަހެވެ. ޗައިނާގައި މި ބަައްޔަށް ޕޮޒިޓިވްވީ މީހުންގެ ތެރެއިން 70 އިންސައްތަ މީހުން ރިކަވަރވެފައިވާ ކަމަށްވެސް އެ ގައުމުގެ ސަރުކާރުން ވަނީ ހާމަކޮށްފައެވެ.

އެގޮތުން ޖުމްލަ 80،754 މީހަކު މި ވައިރަސްއަށް ޕޮޒިޓިވްވެގެން ފަރުވާ ހޯދާފައިވާއިރު، އޭގެ ތެރެއިން 60،000 މީހުން އެއްކޮށް ރަނގަޅުވެގެން ވަނީ ދޫކޮށްލާފައެވެ. މިހާރު އެކްޓިވް ކޭސަސްގެ ގޮތުގައި އެ ގައުމުން ފާހަގަކުރެވިފައިވަނީ، 17،713 އެވެ. އޭގެ ތެރެއިން 4،794 މީހެއްގެ ހާލު ސީރިއަސްކަމަށް ޗައިނާ ސަރުކާރުގެ ކަމާބެހޭ އިދާރާތަކުން ވަނީ ހާމަކޮށްފައެވެ.

ކޮވިޑް-19 އަށް ޕޮޒިޓިވް ވެފައިވާ މީހަކާ "ކޮންޓެކްޓް" ވުމުގެ ސަބަބުން، ރައްކާތެރިކަމުގެ ފިޔަވަޅެއްގެ ގޮތުން، 8 ބިދޭސީން ކަރަންޓީން ފެސިލިޓީއަކަށް ބަދަލުކުރުމުގެ މަސައްކަތް ކުރަމުންދާ ކަމަށް އެޗްޕީއޭއިން ބުނެފިއެވެ.

މިކަމާއި ގުޅޭ ގޮތުން، ސައުދީގެ ރަސްކަމުގެ ދަރުބާރުން ބުނެފައިވަނީ، އަންގާރަދުވަހުން ފެށިގެން އެޤައުމުގެ ހުރިހައި މިސްކިތްތަކަށާއި ޤަދީމީ ބިނާތަކައް ކާބޯތަކެތި ވެއްދުން މަނާކަމަށެވެ. ޙަރަމްފުޅު ފަދަ ތަންތަނަކީ، ގިނަ ބަޔަކު އަޅުކަމުގައި ވަކިން ޚާއްޞަކޮށް ރޭ އަޅުކަމަށް ގިނަ ވަގުތު ތަކެއް ހޭދަކުރާ ތަނެކެވެ. އެހެންނަމަވެސް ކޮރޯނާވައިރަސްގެ ބަލިމަޑުކަމާހުރެ، އެންމެހައި ރައްޔިތުންގެ ސަލާމަތާއި ރައްކާތެރިކަމަށް އެޅި ފިޔަވަޅެއްގެ ގޮތުން، އަންގާރަ ދުވަހުން ފެށިގެން، ކާބޯތަކެތި މިސްކިތްތަކަށާއި، ބިނާ ތަކަށް ވެއްދުން ވަނީ މަނާކޮށްފައެވެ.

ދަތުރު ކުރުމަށް ފަހު އެކަމާއި ބެހޭ މައުލޫމާތު ހާމަނުކޮށް، ސިއްރުކުރާ މީހުން ބޮޑު ޢަދަދަކުން ޖޫރިމަނާ ކުރުމަށް ސައުދީ ސަރުކާރުން ނިންމައިފިއެވެ. އެޤައުމުގެ ރަސްކަމުގެ ދަރުބާރުން މިކަމާއި ގުޅޭގޮތުން ބުނެފައިވަނީ، މަޢުލޫމާތު ފޮރުވާ، އޮޅުވާލާ މީހުން ގިނަ ވެގެން 133،000 ޑޮލަރުން ޖޫރިމަނާ ކުރާނެކަމަށެވެ.

ސައުދީ ސަރުކާރުން މިގޮތައް ނިންމީ އެޤައުމުން، ވައިރަސް ފެނި، އެ ހިފަހައްޓަން މަސައްކަތް ކުރަމުންދާއިރު، ބައެއް ފަރާތްތަކުން ދަތުރުކޮށްފައިވާ ތަންތަނާއި، އަދި ބައެއް އެފަދަ މަޢުލޫމާތު ހޯދަމުން ދާއިރު، ބައެއް ފަރާތްތަކުން ސިއްރު ކުރަމުންދާތީއެވެ.

ބޭރުގެ މީޑިއާތަކުން ޚަބަރުފަތުރާ ގޮތުގައި، ސައިޕްރަސްއިން ހޯމަ ދުވަހު ވަނީ ކޮވިޑް-19 އަށް ދެމީހަކު ޕޮޒިޓިވްވެފައެވެ.

މިއާއެކު، ޔޫރަޕުގެ 27 ޤައުމުން މިހާރު ވަނީ ވައިރަސް ފެނިފައެވެ.

ކޯވިޑް-19 ގެ ބަލިމަޑުކަމާއި ބެހޭ މަޢުލޫމާތު ގެނެސްދިނުމުގައި ޒިންމާދާރު ވުމަށް ބްރޯޑްކާސްޓަރުންނަށް މޯލްޑިވްސް ބްރޯޑްކާސްޓިން ކޮމިޝަނުން އިލްތިމާސް ކޮށްފިއެވެ.

ހޯމަ ދުވަހުގެ ރޭ އެ ކޮމިޝަނުން ނެރެފައިވާ ސަރކިއުލަރ އެއްގައި ވަނީ މުޅި ދުނިޔޭގައި ހަލުވިކަމާއި އެކު ފެތުރެމުންދާ ކޯވިޑް-19 ރާއްޖެއިންވެސް ފެނިފައިވާ މި ދަނޑިވަޅުގައި، ޢާންމުންގެ މެދުގައި ބިރުވެރިކަން އުފެދި، ނުތަނަވަސްކަން އަންނަ ގޮތަށް ސާބިތު ނުހިފޭ މަޢުލޫމާތު ގެނެސްދިނުމުން އެއްކިބާވުމަށާއި، މިކަމާއި ގުޅޭ އެންމެހާ ކޮންޓެންސް ގެނެސްދިނުމުގައި ޒިންމާދާރު ނޫސްވެރިކަން ކުރިއަށް ނެރުމަށް ބްރޯޑްކާސްޓަރުންނަށް އިލްތިމާސް ކުރާ ކަމަށެވެ.

ކޯވިޑް-19 ގެ ބަލިމަޑުކަމާއި ގުޅޭ ކޮންޓެންޓް ބްރޯޑްކާސްޓް ކުރުމުގައި، ސާފު ސީދާ ތެދު މަޢުލޫމާތު ގެނެސްދިނުމަށާއި ކަމާއި ގުޅޭ އިދާރާތަކުގެ ބަސް ހޯދައި، އެފަރާތްތަކާއި ޙަވާލާދީ ކޮންޓެންޓް ގެނެސްދިނުމަށް ބްރޯޑްކާސްޓަރުން މަސައްކަތް ކުރުމަށްވެސް ވަނީ އިލްތިމާސްކޮށްފައެވެ.

ނޮވެލް ކޮރޯނާ ވައިރަސްގައި މަރުވީ މީހުންގެ އަދަދު 4،003 އަށް އަރައިފިއެވެ. ކޮވިޑް-19 ގެ މައޫލުމާތު އެންމެ ޞައްޙަކަމާއެކު ބަލަހައްޓަމުން އަންނަ "ވަރލްޑޯމީޓަރސް"ގެ ޑޭޓާ ބޭސްއަށް ބަލާއިރު، މިއަދު އެކަނިވެސް މުޅި ދުނިޔެއިން 198 މީހުން ވައިރަސްގައި މަރުވެފައިވެއެވެ.

މިހާތަނަށް 114,045 މީހުންނަށް މި ވައިރަސް ޖެހިފައިވާއިރު، މިއަދު އެކަނިވެސް 4,094 ވައިރަސްއަށް ޕޮޒިޓިވްވެފައިވެއެވެ.

ވައިރަސްއަށް 47,208 ފަރުވާ ހޯދަމުންދާއިރު، ސީރިއަސް ޙާލަތުގައި 6,042 މީހުން އެބަތިބި ކަމަށް އެޑޭޓާ ބޭސްއިން ދައްކައެވެ.

އަދި ފަރުވާއަށް ފަހު 62,834 މީހުން މުޅިން ރަނގަޅުވެފައިވާކަމަށްވެސް އެ ޑޭޓާ ބޭސްއިން ދައްކައެވެ.

ބޭރުގެ މީޑިއާތަކުން ރިޕޯޓުކުރާގޮތުގައި، ވައިރަސްގައި ހޯމަދުވަހު މަރުވީ، އެ ޤައުމުގެ އުތުރު ވެންކޫވާގެ ރައްޔިތެކެވެ. މިއީ އެޤައުމުން ވައިރަސް ޖެހިގެން މީހަކު މަރުވި ފުރަތަމަ ފަހަރެވެ.

ފްރާންސްގެ ޕެރިސްގެ މައި އިންޓަރނޭޝަނަލް ދެ އެއަަރޕޯޓު ހިންގާ ކުންފުނި ގްރޫޕޭ އޭޑީޕީ ސީއީއޯ، އޮގަސްޓިން ޑި ރޮމަނެޓް ވައިރަސްއަށް ޕޮިޓިވްވެއްޖެއެވެ.

ވައިރަސްއަށް ޕޮޒިޓިވްވި ނަމަވެސް އޭނާގެ ޞިއްޙީ ހާލަތު ރަނގަޅުކަމަށާއި، ދެހަފުތާ ވަންދެން ގޭގައި އެކަހެރިކޮށް މަޑުކުރުމަށް އޭނާ ނިންމާފައިވާކަމަށްވެސް ރިޕޯޓުތައް ބުނެއެވެ.

އޮގަސްޓިން ވައިރަސްއަށް ޕޮޒިޓިވްވުމާއި ގުޅިގެން ފާއިތުވެދިޔަ ދުވަސްތަކުގައި އޭނާއާއި ބައްދަލުކޮށްފައިވާ މީހުން ދެނެގަތުމުގެ މަސައްކަތް މިހާރު ވަނީ ފަށާފައެވެ.

ކޯވިޑް-19 އާއި ގުޅިގެން ޓެރެވަލް ރިލޭޓެޑް ކްލިނިކެއް މާލޭގައި ހުޅުވަން ނިންމައިފިއެވެ.

ކޯވިޑް-19 އާއިގުޅޭގޮތުން ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ހާލަތާއި ގުޅިގެން އުފައްދާފައިވާ ޓާސްކް ފޯސްގެ ތަރުޖަމާން މަބްރޫކް އަޒީޒް ވިދާޅުވީ މި ކްލިނިކް ހުޅުވިގެންދާނީ އަންގާރަ ދުވަހު ހެނދުނު 10:00 ގައި ކަމަށެވެ.

މި ކްލިނިކް ހުންނާނީ މާލެ ހިޔާ ފުރަގަހުގައި އޮންނަ ޖާގައިގައި ކަމަށް އޭނާ ވިދާޅުވިއެވެ.

މި ކްލިނިކްގެ މަޤްސަދަކީ ރާއްޖެއިން ބޭރަށް ދަތުރުކުރައްވާފައި ތިބި ފަރާތްތަކުން އަދި ރާއްޖޭގައި ވެސް މިކަމުގެ އަލާމާތްތައް ހުރި ކަމަށް އަމިއްލައަށް ޝައްކު ކުރެވޭ ފަރާތްތަކަށް ގޮސް ޓެސްޓް ކުރެވޭނެ ވަސީލަތެއް ޤާއިމްކޮށްދިނުން ކަމަށެވެ.

އަދި ހުރިހާ ފަރާތްތަކަށްވެސް އެ ކްލިނިކަށް ދިއުމުގެ ފުރުޞަތު އޮންނާނެ ކަމަށް މަބްރޫކް ވިދާޅުވިއެވެ.

އިރާޤުގެ ރައީސް މިއަދު އާންމު ކުރެއްވި ރިޔާސީ ޤަރާރެއްގައި ވަނީ، ހޯމަ ދުވަހުން ފެށިގެން ޢާންމު އެއްވުންތައް އިންތިޒާމު ކުރުމާއި، މަދަނީ އެއްވުންތައް ރާވާ ހިންގުމާއި، އަދި މިފަދަ ޙަރަކާތްތަކުގައި ބައިވެރިވުން މަނާކުރާކަމަށެވެ. މީގެ އިތުރުން މިދުވަސްވަރު ޤަދީމީ އަދި އާޘާރީ ބިނާތަކާއި ފަތުުރުވެރި މަންޒިލްތަކައް ދަތުރުކުރުން ވެސްވަނީ މަނާކޮށްފައެވެ.

މީގެ އިތުުރުން އިރާޤު ސަރުކާރުން ވަނީ އިރާން، ޗައިނާ، ދެކުނު ކޮރެއާ، އިޓަލީ، ޖަޕާން، ތައިލޭންޑް، ސިންގަޕޫރު، ކުވައިތު،އަދި ބަހްރައިން އަށް ދަތުރުކޮށްފައި އެނބުރި ޤައުމަށޤ އަންނަ ރައްޔިތުންވެސް 14 ދުވަސްވަންދެން އަމިއްލައަށް ކަރަންޓީންވެގެން ތިބުމަށް އަންގާފައެވެ.

ރާއްޖޭގައި އަރާ ފޭބުން ވަގުތީ ގޮތުން މިވަގުތު ހުއްޓާލާފައިވަނީ ޅ. ކުރެއްދޫ އައިލަންޑް ރިސޯޓާއި، އއ. ސޭންޑީސް ބަތަލާގައި ކަމަށް އެޗްޕީއޭއިން ބުނެފިއެވެ. މިނޫން އެއްވެސް ރަށަކަށް އަރާ ފޭބުން ހުއްޓާލަން އަންގާފައި ނުވާނެ ކަމަށް އެޗްޕީއޭއިން މަޢުލޫމާތު ދެއެވެ.

އީރާނުގެ ދައުލަތުގެ މީޑިއާއިން ޚަބަރު ފަތުރާ ގޮތުގައި ހިފެހެއްޓުމެއް ނެތި، ވައިރަސް ފެތުރެމުންދާތީ ރައްކާތެރިކަމުގެ ފިޔަވަޅެއްގެ ގޮތުން މިއަދު ވަނީ 70،000 ޤައިދީން ވަގުތީ ގޮތުން މިނިވަންކޮށްފައެވެ. އެހެންނަމަވެސް، ބަލިމަޑުކަން ނިމުމުން އެމީހުންނާމެދު އަމަލުކުރާނެ ގޮތެއް ހާމަކޮށްފައެއް ނުވެއެވެ.

އީރާނުގައި މިއަދު އެކަނިވެސް ވައިރަސްއަށް ފަރުވާ ހޯދަމުންދިޔަ 43 މީހުން ވަނީ މަރުވެފައެވެ. މިއާއެކު، މަރުވީ މީހުންގެ އަދަދު ވަނީ 237 އަށް އަރާފައެވެ.

އިޓަލީ ވިލާތުގެ ނޫސް އޭޖެންސީތަކުން ޚަބަރުފަތުރާގޮތުގައި، މިއަދު އެކަނިވެސް އެޤައުމުން 97 މީހުން ވަނީ ވައިރަސްޖެހިގެން މަރުވެފައެވެ. މިހާރު މަރުވީ މީހުންގެ ޖުމުލަ އަދަދަކީ 463 އެވެ.

ވައިރަސް ޖެހުނު މީހުންގެ އަދަދު 9،000 އަށް އަރާފައިވާއިރު، ހަ މިލިޔަނަށްވުރެ ގިނަ މީހުންވަނީ ކަރަންޓީންކޮށްފައެވެ.

އީރާނު ސަރުކާރުން ހާމަކޮށްފައިވާ އެންމެ ފަހުގެ ތަފާސް ހިސާބުތަކަށް ބަލާއިރު، ވައިރަސް ޖެހުނު މީހުންގެ އަދަދަކީ 237 އަދި މަރުވި މީހުންގެ އަދަދަކީ 43 އެވެ.

އިންޑިއާގެ ހެލްތު މިނިސްޓްރީއާއި ޙަވާލާދީ އިންޑިއާގެ ނޫސްތަކުން ޚަބަރުފަތުރާގޮތުގައި، މިއަދު އެކަނި އެޤައުމުގެ އެކި ކަންކޮޅުތަކުގައި 3،003 މީހުންވަނީ ވައިރަސްއަށް ޓެސްޓްކޮށްފައެވެ. މީގެތެރެއިން 43 މީހުން ވައިރަސްއަށް ޕޮޒިޓިވްވީ އިރު، ބާކީ 2،694 މީހުން ވައިރަސްއަށް ނެގެޓިވްކަމަށް ރިޕޯޓުކޮށްފައިވެއެވެ.

އިންޑިއާގެ އެއަރޕޯޓުތަކުގައި މިހާރު ވައިރަސްއަށް ސްކްރީންކުރަމުންދާއިރު، މިހާތަނަށް 8،255 ފްލައިޓަކުން އިންޑިއާއަށް ދަތުރުކުރި 8،74،708 ފަސިންޖަރުން ސްކްރީން ކޮށްފައިވާކަމަށެވެ. މީގެތެރެއިން 1،921 މީހުންގެ ހަށިގަނޑުގައި ވައިރަސްގެ އަލާމާތް ހުރިކަން ދެނެގަނެވުމާއެކު ހޮސްޕިޓަލުގައި އެކަހެރިކޮށް ފައރުވާދީފައިވާކަމަށް ރިޕޯޓުކޮށްފައިވެއެވެ.

މިޔަންމާ ސަރުކާރުން މިކަން ހާމަކޮށް ޢާންމުކުރި ބަޔާނުގައި ވަނީ، މިޔަންމާއާއި ބަންގްލަދޭޝް ގުޅޭ އެއްގަމު ޞަރަޙައްދީ އިން ބަންދުކުރަން ސަރުކާރުން މުއްދަތެއް ނެތްގޮތައް ނިންމާފައިވާކަމަށެވެ. ސަރުކާރުން ވަކިގޮތެއް އަންގަންދެން އެއްވެސް ޤައުމެއްގެ މީހަކަށް ދެޤައުމުގެ ގުޅޭ "މިޒޮރާމް" ބޯޑަރު ހުރަސް ކުުރުމުގެ ހުއްދަ ނުދޭނެކަމަށް ބުނެފައިވެއެވެ.

އެހެންނަމަވެސް، ދެޤައުމުގެ އިސް މަސްއޫލުވެރިންނަށާއި، ޞިއްޙީ މަސައްކަތްތެރިންނަށް މިޔަންމާ ސަރުކާރުގެ ވަކި ހުއްދައެެއްގެ ދަށުން ބޯޑަރު ހުރަސްކޮށް މިޔަންމާއަށް ވަދެވޭނެ އިންތިޒާމު ހަމަޖައްސައިދޭނެކަމަށް ބަޔާނުގައިވެއެވެ. އަދި އެތެރެއަށް ވަންނަން ހުއްދަ ދޭނީ ޚާއްޞަ ސްކްރީނިންގް އަކަށްފަހު ކަމަށްވެސް ބަޔާނުގައި ބުނެފައިވެއެވެ.

އިންޑިއާގެ އެކި ކަންކޮޅުތަކުގައި މިހާތަނަށް އައިއިރު 45 މީހަކަށް ވައިރަސް ޖެހުނުކަން އިންޑިއާ ސަރުކާރުން ވަނީ ކަށަވަރުކޮށްދީފައެވެ.

ވަކި ވަކި ސްޓޭޓުތަކުން ވައިރަސް ޖެހުނު އަދަދު:

* ނިއު ދިއްލީ: 04 (އިންޑިއާ)

* ހަރިޔާނާ ސްޓޭޓް: 14 (ބޭރު މީހުން)

* ކެރަލާ ސްޓޭޓް: 09 (އިންޑިއާ)

* ރާޖެސްތާން ސްޓޭޓް: 02 (ބޭރު މީހުން)

* ތެލަންގާ: 01 (އިންޑިއާ)

* އުއްތަރް ޕްރަދޭޝް: 09 (އިންޑިއާ)

* ލަދަޚް: 02 (އިންޑިއާ)

* ޓެމިލްނާޑޫ ސްޓޭޓް: 01 (އިންޑިއާ)

* ޖައްމޫ އެންޑް ކަޝްމީރު: 01 (އިންޑިއާ)

* ޕަންޖާބް ސްޓޭޓް: 01 (އިންޑިއާ)

* ކަރްނާޓަކާ ސްޓޭޓް: 01 (އިންޑިއާ)

އިންޑިއާގެ ނޫސްތަކުން ރިޕޯޓުކުރާ ގޮތުގައި، ވައިރަސްގެ އަލާމާތްތައް ފެނިގެން މިއަދު ކަަރަންޓީންކޮށްފައިވަނީ، ދާދި ފަހުން ޗައިނާއަށާއި، އިރާނަށް ދަތުރުކޮށްފައިވާ 41 މީހުންނެވެ. މީީގެތެރޭގައި ހިމެނެނީ ޗައިނާއަށް ދަތުރުކުރި 31 މީހުންނާއި އިރާނަށް ދަތުރުކުރި 10 މީހުން ކަމަށެވެ.

މިހާރު ސަރުކާރު ހޮސްޕިޓަލްތަކުގައި ކަރަންޓީންކޮށް ފަރުވާދެމުންދާއިރު، އެމީހުންގެ ލޭގެ ސާމްޕަލްތައް ނަގާ މިހާރު ޓެސްޓުކުރަން ފޮނުވާފައިވާކަމަށްވެސް ރިޕޯޓުތައް ބުނެއެވެ.

ކޮވިޑް-19 އެންމެ ބޮޑަށް ފެތުރުނު ޗައިނާގައި އެ ވައިރަސް ޖެހުނު މީހުންގެ ތެރެއިން 70 އިން ސައްތަ މީހުން ފަރުވާއަށް ފަހު ރަނގަޅުވެފައިވާކަމަށް ޑަބްލިއުއެޗްއޯއިން ބުނެފިއެވެ. އެހެންނަމަވެސް އެކަމާއި ގުޅޭ ތަފާސް ހިސާބު އަދި ހާމަކޮށްފައެއް ނުވެއެވެ.

މުޅި ދުނިޔެއިން ވައިރަސްގައި 3،893 މީހުން މަރުވީއިރު، މީގެތެރޭގައި ޗައިނާގެ 3،120 މީހުން ހިމެނެއެވެ.