ނޭޕާލުގެ ހާލަތު ދަށަށް ދާން ފެށުމުން ބޭރުގެ އެހީއަށް އެދިއްޖެ

ނޭޕާލުގައި ކޮވިޑްގެ ކަންތައް ގޯސްވެ ބޭރުގެ އެހީއަށް އެދެން ފަށައިފިއެވެ.

ދުވާލެއްގެ މައްޗަށް އަށެއްކަހާސް މީހުން ބައްޔަށް މިހާރު ދަނީ ޕޮޒިޓިވް ވަމުންނެވެ. އަދި މަރުވާ މީހުންގެ އަދަދުވެސް ދަނީ އިތުރުވަމުންނެވެ. އެއް ދުވަހެއްގެ ތެރޭގައި 255 މީހުން މަރުވެ 9483 މީހުން ވެސް ބައްޔަށް ޕޮޒިޓިވްވެފައިވެއެވެ.

ނޭޕާލުގެ ހެލްތު މިނިސްޓްރީގެ ތަފާސްހިސާބުތައް ދައްކާ ގޮތުން މަރުވި މީހުންގެ ޖުމްލަ އަދަދަކީ 4،084 އެވެ. އަދި ޕޮޒިޓިވްވި މީހުންގެ ޖުމްލައަކީ 413،111 އެވެ. ނަމަވެސް ފަރުވާ ނުލިބި އަދި ބަލި ޖެހިފައިވާކަން ނޭނގި އެތައް ބަޔަކު ތިބޭނެތީ އަސްލު އަދަދު މިއަށް ވުރެ އެތައް ގުނައެއް އިތުރުވާނެ ކަމަށް ބެލެވެއެވެ.

އެކި ގައުމުތަކުން ނޭޕާލަށް އެހީގެ ސާމާނު މިހާރު ވަނީ ފޮނުވަން ފަށާފަައެވެ. ޗައިނާއިން މިހާރު ވެސް ވަނީ އެހީ ފޯރުކޮށްދީފަ އެވެ. އެގޮތުން 400 އޮކްސިޖަން ސިލިންޑަރާއި، 160 އޮކްސިޖަން ކޮންސެންޓްރޭޓަރާއި، 10 ވެންޓިލޭޓަރު ބުދަ ދުވަހު ފޮނުވިއެވެ.

ޗައިނާއިން ވައުދުވެފައި ވަނީ ޖުމްލަ 20،000 އޮކްސިޖަން ސިލިންޑަރާއި އިތުރު އެހީތައް ނޭޕާލަށް ދިނުމަށެވެ. އެ ތަކެތި ނޭޕާލަށް ގެންދާނީ ނޭޕާލް އެއާލައިންސްގެ ޚާއްސަ ފްލައިޓެއްގަ އެވެ. ޗައިނާއިން ވައުދުވީ 780،000 އެމެރިކާ ޑޮލަރުގެ ސާމާނު ފޮނުވުމަށެވެ.

ނޭޕާލުގެ އިތުރުން ދެކުނު އޭޝިއާ ސަރަހައްދުގައި ހާލަތު ގޯސްވެފައިވާ އަފްޣާނިސްތާނާއި، ބަންގްލަދޭޝް، ޕާކިސްތާނު އަދި ސްރީލަންކާއަށް ވެސް އެހީދޭނެ ކަމަށް މިދިޔަ ހަފުތާގައި ޗައިނާގެ ފޮރިން މިނިސްޓަރ ވާންގް ޔީ ވިދާޅުވިއެވެ.

ނޭޕާލުގައި އެއްމެ ގިނަ އަދަދަކަށް މީހުން ޕޮޒިޓިވްވަނީ އިންޑިއާ އާއި ނޭޕާލް ގުޅޭ ބޯޑަރު ސަރަހައްދުގެ ހިސާބުތަކުންނެވެ.