ހުޅުމާލޭގެ ފިހާރައެއްގައި މަސައްކަތްކުރަމުންދިޔަ 21 އަހަރުގެ އަންހެނެއްގެ ކަރަށް ތޫނު އެއްޗަކުން ހަމަލާދީފައިވާ ކަމަށް މޯލްޑިވްސް ޕޮލިސް ސަރވިސްއިން ބުނެފިއެވެ.

ފުލުހުން މައުލޫމާތު ދިން ގޮތުގައި، މި ހާދިސާ ހިނގާފައިވަނީ މެންދުރު ފަހު 12:45 ހާއިރުއެވެ. އަނިޔާ ލިބުނު އަންހެން މީހާއަކީ ނޭޕާލަށް ނިސްބަތްވާ މީހެއް ކަމަށާއި، އޭނާ މަސައްކަތް ކުރަމުން ދިޔައީ ހުޅުމާލޭ ފުރަތަމަ ފިޔަވަހީގައި ހުންނަ ފިހާރައެއްގައި ކަމަށް ފުލުހުން ހާމަކުރިއެވެ.

ހަމަލާ ލިބުނު އަންހެން މީހާ ވަނީ ހުޅުމާލޭ ހޮސްޕިޓަލަށް ގެންގޮސްފައެވެ. ނަމަވެސް، އޭނާއަށް ލިބިފައިވާ އަނިޔާގެ ތަފްސީލު ހޮސްޕިޓަލުން މިހާތަނަށް ހާމަ ނުކުރި ނަމަވެސް އެ އަންހެން މީހާ މިހާރު ސްޓޭބަލް ކަމަށް މައުލޫމާތު ލިބެ އެވެ. ފުލުހުން ބުނީ މި މައްސަލައިގެ ތަހުގީގު ކުރިއަށް ދާކަމަށެވެ.

މި ފަހަކަށް އައިސް މިކަހަލަ މައްސަލަތައް އިތުރުވަމުން އަންނަކަން ފާހަގަ ކުރެވެ އެވެ. މީގެ ދެ ހަފުތާއެއް ކުރިން މާލޭގެ މަޖީދީމަގުގައި ޒުވާނަކަށް ތޫނު އެއްޗަކުން ހަމަލާދީފައިވާއިރު، މިދިޔަ މަހުގެ ފަހުކޮޅު ސޯސަންމަގުގައި ވެސް މީހަކަށް ހަމަލާދީ ޒަޚަމްކޮށްލާފައިވެއެވެ.