ކޮރަޕްޝަނާ ދެކޮޅަށް ހިނގި މުޒާހަރާތަކުން ސަރުކާރު ވައްޓާލުމާ ގުޅިގެން، ނޭޕާލްގެ ކުރީގެ ސުޕްރީމް ކޯޓުގެ އުއްތަމަ ފަނޑިޔާރު ސުޝިލާ ކާރކީ، އެ ޤައުމުގެ ވަގުތީ ބޮޑުވަޒީރު ކަމަށް އައްޔަން ކޮށްފިއެވެ.

73 އަހަރުގެ ކާރކީ، ކުރު ރަސްމިއްޔާތެއްގައި ވަނީ މަގާމުގެ ހުވައި ކުރައްވާފައެވެ.

ހިމާލަޔަން ސަރަހައްދުގައި އޮންނަ ނޭޕާލުގައި މިދިޔަ ހަފްތާގައި ހިނގި މުޒާހަރާތަކުގައި ރައިޓް ފުލުހުންގެ ހަމަލާތަކުގައި 50 އަށްވުރެ ގިނަ މީހުން މަރުވެފައިވެއެވެ. މި މުޒާހަރާތައް ފެށުނީ ސޯޝަލް މީޑިއާ ޕްލެޓްފޯމްތައް މަނާކުރުމާ ގުޅިގެންނެވެ. ފަހުން މި މަނާކުރުން ނިމުމަކަށް ގެނެވުނު ނަމަވެސް، އޭގެ ކުރިން މުޒާހަރާތައް ވަނީ ބޮޑު ހަރަކާތަކަށް ބަދަލުވެފައެވެ. އަންގާރަ ދުވަހު ރުޅިގަދަވެފައިވާ މުޒާހަރާތަކުގެ ބައިވެރިން ވަނީ ޕާލިމެންޓާއި ސަރުކާރުގެ އިމާރާތްތަކަށް އަލިފާން ޖަހާފައެވެ. މިކަމާ ގުޅިގެން ބޮޑުވަޒީރު ކޭޕީ ޝަރމާ އޯލީ އިސްތިއުފާ ދެއްވިއެވެ.

ހުކުރު ދުވަހުގެ ކުރީކޮޅު، ރައީސް ރާމް ޗަންދްރާ ޕައުޑެލް އާއި މުޒާހަރާގެ ލީޑަރުންނާ ދެމެދު އެއްބަސްވުމަކަށް އާދެވުނީ ދުވަސްތަކެއް ވަންދެން މަޝްވަރާ ކުރުމަށްފަހުގައެވެ. ޤާނޫނީ މާހިރުން ވެސް މަޝްވަރާތަކުގައި ބައިވެރިވިއެވެ.

ވަގުތީ ބޮޑުވަޒީރަށް ޕާލިމެންޓް އަވަހަށް އުވާލައި، 6 މަސްދުވަހުގެ ތެރޭގައި އާންމު އިންތިޚާބު ބޭއްވުމަށް ވަނީ ހަވާލުކުރެވިފައެވެ. ކާރކީ އަކީ ސާފު އިމޭޖެއް އޮތް ބޭފުޅެއްގެ ގޮތުގައި ފުޅާ ދާއިރާއެއްގައި ބެލެވެއެވެ. އަދި "ޖެން ޒީ" ގެ ލީޑަރުން ވަގުތީ ސަރުކާރުގެ ވެރިޔަކަށް އޭނާއަށް ތާއީދުކުރެއެވެ.

އަންގާރަ ދުވަހު، ވަގުތީ ބޮޑު ވަޒީރު ވަނީ ކަތުމަންޑޫގައި މުޒާހަރާ ތައް ހިނގި ސަރަޙައްދަށް ޒިޔާރަތްކުރައްވާފައެވެ. އަދި ހޮސްޕިޓަލުގައި ފަރުވާ ދެމުންދާ ޒަޚަމްވި ބައެއް މީހުންނާވެސް ބައްދަލުކުރެއްވިއެވެ.

ގާނޫނީ ވަކީލެއްގެ ގޮތުން މަސައްކަތް ފެއްޓެވި ކާރކީ 2016 ގައި ނޭޕާލްގެ އުއްތަމަ ފަނޑިޔާރުކަމަށް ވަޑައިގަތުމުގައި ފިރިކަލުންގެ އެހީތެރިކަން ވަރަށް މުހިންމު ދައުރެއް އަދާކުރި ކަމަށް އޭނާ ވިދާޅުވެފައިވެއެވެ.

ކާރކީ އުއްތަމަ ފަނޑިޔާރުކަމުގެ 11 މަސްދުވަހުގެ ދައުރުގައި އިތުބާރުނެތް ކަމުގެ މައްސަލައަކާ ވެސް ކުރިމަތިލާން ޖެހިވަޑައިގެންނެވިއެވެ.

ނޭޕާލްގެ އަސްކަރިއްޔާ އިން ވަނީ ކަތުމަންޑޫގެ މަގުތަކުގައި ސަލާމަތީ ކަންކަން ބެލެހެއްޓުމާ ހަވާލުވެފައެވެ.

ސަރުކާރާ ދެކޮޅު މުޒާހަރާތައް ފެށުނީ ސަރުކާރުން ވަޓްސްއެޕް، އިންސްޓަގްރާމް އަދި ފޭސްބުކް ހިމެނޭ 26 ސޯޝަލް މީޑިއާ ޕްލެޓްފޯމް މަނާކުރުމާ ގުޅިގެންނެވެ. ނަމަވެސް މިކަން ފަހުން ބަދަލުވެގެން ދިޔައީ ނޭޕާލްގެ ސިޔާސީ އިސްވެރިންނާ ދޭތެރޭ އޮތް ފުން ނުރުހުމަކަށެވެ.

ސޯޝަލްމީޑިއާ މަނާ ކުރުމުގެ ކުރިން ހަފްތާތަކެއް ވަންދެން، ސިޔާސީ ވެރިންގެ ދަރިންގެ ޚަރަދުބޮޑު ދިރިއުޅުމާއި ކޮރަޕްޝަންގެ ތުހުމަތުތައް ފާހަގަކުރާ "ނެޕޯ ކިޑް" ކެމްޕޭނެއް ސޯޝަލް މީޑިއާގައި ފެތުރެމުން ގޮސްފައިވެއެވެ.