ނޭޕާލުގެ އައު ސަރުކާރު މަސައްކަތް ކުރާނީ ޖެން-ޒީންގެ ވިސްނުމާ އެއްގޮތައް ކަމަށް ނޭޕާލުގެ އައު ބޮޑުވަޒީރު ވިދާޅުވެއްޖެ އެވެ.

ނޭޕާލްގެ އައު ވަގުތީ ބޮޑުވަޒީރު އެމަޤާމުގައި 6 މަސްދުވަހަށްވުރެ ދިގު މުއްދަތަކަށް ނުހުންނަވާނެ ކަމަށް ވެސް އޭނޭ ވިދާޅުވިއެވެ.

ހުކުރު ދުވަހު ހުވާކުރެއްވުމަށްފަހު ފުރަތަމަ ފަހަރަށް ވާހަކަފުޅު ދައްކަވަމުން ސުޝީލާ ކާރކީ ވިދާޅުވީ އޭނާ އެ މަގަމާ ހަވާލުވީ މަގާމު ބޭނުންވެގެން ނޫން ކަމަށާއި، އެހެން ނަމަވެސް ގިނަ ބަޔަކު އެކަމަށް އެދުމުން މަގާމާ ހަވާލުވާން މަޖުބޫރިވީ ކަމުަގައެވެ.

އަންނަ އަހަރުގެ މާރޗް 5 ގައި ބޭއްވޭ އިންތިޚާބަށްފަހު އުފެދޭ އައު ސަރުކާރާ ބާރުތައް ހަވާލު ކުރައްވާނެ ކަމަށް އޭނާ ވިދާޅުވިއެވެ.

ކޮރަޕްޝަނާ ދެކޮޅު މުޒާހަރާތަކުގައި 70 އަށްވުރެ ގިނަ މީހުން މަރުވެ، ނޭޕާލްގެ ސަރުކާރު ވައްޓާލުމަށްފަހު ކާރކީ ވަނީ ބޮޑު ވަޒީރު ކަމަށް އައްޔަން ކޮށްފައެވެ.

އޭނާ މަގާމަށް ހަމަޖެއްސީ މުޒާހަރާތައް އިންތިޒާމު ކުރި "ޖެން ޒީ" ގެ އިސް ފަރާތްތަކާއެކު އެއްބަސްވުމަކަށް އައުމަށްފަހުގައެވެ.

"އަޅުގަނޑުމެން މަސައްކަތް ކުރަން ޖެހޭނީ ޖެން ޒީ ޖީލުގެ ވިސްނުމާ އެއްގޮތަށް" އޭނާ ވިދާޅުވިއެވެ. "މިގްރޫޕުން އެދެނީ ކޮރަޕްޝަން ނައްތާލުމާއި، ހެޔޮ ވެރިކަމަކާއި، އިޤްތިޞާދީ ހަމަހަމަ ކަމެވެ." އޭނާ ވިދާޅުވިއެވެ.

ސޯޝަލް މީޑިއާ ޕްލެޓްފޯމްތައް ނޭޕާލުގައި މަނާކުރުމާ ގުޅިގެން މުޒާހަރާތައް ސެޕްޓެމްބަރ 8 ގައި ފެށި، ދެ ދުވަހުގެ ތެރޭގައި ހަމަނުޖެހުމާއި އަނިޔާވެރިކަމަށް ބަދަލުވެ، ސިޔާސީ އިސް ފަރާތްތަކުގެ ގެތަކަށް ގެއްލުންދީ، ޕާލިމެންޓް އަންދާލެވުނެވެ. އޮފިޝަލުން ބުނާ ގޮތުގައި މުޒާހަރާގެ ސަބަބުން މަރުވެފައިވާ މީހުންގެ އަދަދު 72 އަށް އަރާފައިވެއެވެ. މީގެ ތެރޭގައި 3 ފުލުހުން ހިމެނެއެވެ.

ކުރީގެ ސުޕްރީމް ކޯޓުގެ އުއްތަމަ ފަނޑިޔާރު ކާރކީ އަކީ ސާފު އިމޭޖެއް އޮތް ބޭފުޅެއްގެ ގޮތުގައި ފާހަގަކުރެވެއެވެ. ނަމަވެސް އުއްތަމަ ފަނޑިޔާރުކަމުގެ 11 މަސްދުވަހުގެ ދައުރުގައި އިތުބާރުނެތް ކަމުގެ މައްސަލައަކާ އޭނާ ކުރިމަތިލައްވަން ޖެހުނެވެ.

ކާރކީ ގެ ވަގުތީ ސަރުކާރަށް ގިނަ ގޮންޖެހުންތަކާ ކުރިމަތިލާންޖެހޭނެ ކަމަށް ބެލެވެއެވެ. މީގެ ތެރޭގައި ޤާނޫނީ ހަމަތައް އަލުން ޤާއިމުކުރުމާއި، ހަމަލާދެވުނު ޕާލިމެންޓާއި އެހެނިހެން މުހިންމު އިމާރާތްތައް އަލުން އިމާރާތްކުރުމާއި، ބަދަލު ގެންނަން ބޭނުންވާ ޖެން ޒީ މުޒާހަރާކުރި ފަރާތްތައް ރުއްސުމާއި، ޑިމޮކްރަސީއާއި ޤާނޫނީ ނިޒާމު ނެތިދާނެ ކަމަށް ބިރުގަންނަ އެހެން ނޭޕާލީންނަށް ޔަޤީންކަން ދިނުން ހިމެނެއެވެ.