އިނގިރޭސި ޕްރިމިއާ ލީގުގައި ހޯމަދުވަހުގެ ރޭ އަމިއްލަ ދަނޑުގައި ބާންލީއަތުން ބަލިވުމުގެ ސަބަބުން ފުލަމަށް ރެލިގޭޝަން ޔަގީންވެއްޖެއެވެ.
ބާންލީއާ ދެކޮޅަށް ކުޅުނު މެޗު ޑޮމިނޭޓްކޮށްގެން ގިނަ ހަމަލާތައް އުފެއްދީ ފުލަމުން ކަމަށްވިޔަސް ލަނޑު ޖަހައި ދޭއް ސުމަކުން މޮޅުވީ ބާންލީއެވެ. މި ގޯލްތައް ޖަހައިދިނީ ފުރަތަމަ ހާފުގެ ފަހު ފަސް މިނިޓްގެ ތެރޭގައި ވެސްޓްވުޑާއި ވުޑެވެ. މިއީ ތިން ސީޒަނުގެ ތެރޭގައި ފުލަމް ރެލިގޭޓްވި ދެވަނަ ފަހަރެވެ.
ސީޒަނުގައި ކޮންމެ ބަޔަކަށްވެސް އަދި ބާކީ ތިން މެޗު އެބައޮތެވެ. ޕްރިމިއާ ލީގުގެ ތާރީޚުގައިވެސް މިފަހަރު ނޫނީ މިއަދަދަށް ބާކީ ހުއްޓައި ރެލިގޭޓްވާ ތިން ޓީމު ކަށަވަރެއް ނުވެއެވެ. ފުލަމްގެ އިތުރަށް ދެން ރެލިގޭޓް ވެފައިވަނީ ވެސްޓް ބްރޮމާއި ޝެފީލްޑް ޔުނައިޓެޑެވެ.
އަނެއްކޮޅުން ނޮރިޗް ސިޓީއަށް ޗެމްޕިއަންޝިޕުން ޕްރިމިއާ ލީގަށް ޕްރޮމޯޝަން ވަނީ ކަށަވަރުވެފައެވެ. އެ ޓީމު ޕްރިމިއާ ލީގަށް މިއަންނަނީ އެއް ސީޒަނުގެ މެދުކެނޑުމަކަށް ފަހުގައެވެ. ދެން ޕްރިމިއާ ލީގަށް ޗެޕްޕިއަންޝިޕުން އަންނާނެ ދެ ޓީމުކަމަށް ބޮޑަށް ބެލެވެނީ ވޮޓްފަޑާއި ބްރެންޓްފަޑެވެ. ޗެމްޕިއަންޝިޕަކީ އިނގިރޭސިވިލާތުގެ ދެވަނަ ޑިވިޝަނެވެ.
ރެލިގޭޝަން ކަށަވަރުވުމާ ގުޅިގެން ފުލަމްގެ ޒުވާން ކޯޗު ސްކޮޓް ޕާކާ ބުނީ ހިތާމަ ފާޅުކުރުން ފިޔަވައި ދެން ބުނެވޭނެ އެއްޗެއް އަދި ދައްކަންވީ ވާހަކައެއް ނެތް ކަމަށެވެ. ކުރިއަށް އޮތީ އަލުން ޕްރިމިއާ ލީގަށް އައުމަށް ރާވަންޖެހޭ ރޭވުންތަކުގެ ދައުރު ކަމަށްވެސް ބުންޏެވެ.
ރެލިގޭޓްވާ ހުރިހާ ޓީމެއް ކަށަވަރުވުމުން ރެލިގޭޝަން ޒޯނާ ގާތުގައިވާ އެހެން ޓީމުތަކަށް މިހާރު އެއްވެސް ޕްރެޝަރެއް ނެތެވެ. އެގޮތުން އަންގާރަ ދުވަހުގެ ރޭ ސައުތްހެމްޓަނާއި ކްރިސްޓަލް ޕެލަސް ބައްދަލުކުރާ މެޗުގެ މުހިންމުކަންވެސް މިހާރު ވަނީ ކުޑަވެފައެވެ.
އަންގާރަ ދުވަހުގެރޭ ކުޅޭ ދެ މެޗުގެ ތެރެއިން އެންމެ ފޯރިގަދަ މެޗަކަށް ވާނީ ތާވަލުގެ ދެވަނައިގައިވާ މެންޗެސްޓާ ޔުނައިޓެޑާއި ހަތަރުވަނައިގައިވާ ލެސްޓާ ސިޓީގެ މެޗެވެ. މިއީ ގަދަ ހަތަރެއްގެ ތެރޭގައި ހިމެނިގެން ޔުއެފާ ޗެމްޕިއަންސް ލީގަށް ކޮލިފައިވުމަށްޓަކައި ކޮންމެހެންވެސް ލެސްޓާއަށް މުހިއްމު މެޗެކެވެ. މެޗު ފަށާނީ ޔުނައިޓެޑުގެ ދަނޑުގައި މާލޭގަޑިން ރޭގަނޑު ދިހައެއް ޖަހާއިރުއެވެ. މި މެޗުން ޔުނައިޓެޑް މޮޅުނުވެއްޖެނަމަ، މެންޗެސްޓާ ސިޓީއަށް ލީގު ޗެމްޕިއަންކަން ކަށަވަރުވާނެއެވެ.
