ވުލްވްސް ބަލިކޮށް ޔުނައިޓެޑަށް ހަމަ ނޭވާއެއް

އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން ހަމަ ޖެހުމެއް ހޯދައިފި އެވެ.

ވުލްވްސްގެ އަމިއްލަ ދަނޑުގައި ހޯމަ ދުވަހުގެ ރޭ ދަންވަރު ކުޅުނު މެޗު ޔުނައިޓެޑުން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ޔުނައިޓެޑުން ލީޑު ނަގާފައި ވަނިކޮށް، ވުލްވްސް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ހާފުގައި ތިން ލަނޑު ޖަހައިގެން ޔުނައިޓެޑު ވަނީ މެޗުން މޮޅުވެފަ އެވެ.

މެޗު ފަށައިގެން ފުރަތަމަ ހާފުގެ 25 ވަނަ މިނެޓުގައި ޔުނައިޓެޑަށް ލަނޑު ޖަހައި ކުރި ހޯދައިދިނީ އެ ޓީމުގެ ކެޕްޓަން ބްރޫނޯ ފެނާންޑޭސް އެވެ. އެއީ މަތެއުސް ކުންހާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ ފުރަތަމަ ހާފުގެ އިތުރު ވަގުތުގައި ޖިއަން ރިސްނާ ބެލަގާޑް ވަނީ ލަނޑު ޖަހައި ވުލްވްސް އަށް ނަތީޖާ ހަމަހަމަ ކޮށްދީފަ އެވެ.

މެޗުގައި ދެ ވަނަ ފަހަރަށް ޔުނައިޓެޑުން ލީޑު ނެގީ ދެ ވަނަ ހާފު ފަށައިގެން ހަ ވަނަ މިނެޓުގަ އެވެ. ޑިއޭގޯ ޑަލޮޓް ތަނަވަސްކޮށްދިން ފުރުސަތެއްގައި ޔުނައިޓެޑަށް އެ ލަނޑު ޖަހައިދިނީ ބްރަޔަން އެމްބުއޭމޯ އެވެ. އޭގެ ފަހުން މެޗުގެ 62 ވަނަ މިނެޓުގައި މޭސަން މައުންޓް ވަނީ ޔުނައިޓެޑުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އަދި މެޗުގައި ޔުނައިޓެޑުގެ ފަހު ލަނޑު ފެނާންޑޭސް ޖެހީ، އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ.

މެޗަށް ފަހު ވާހަކަ ދައްކަމުން ޔުނައިޓެޑުގެ ކޯޗު ރުބެން އަމޯރިމް ބުނެފައި ވަނީ، ޔުނައިޓެޑުން މެޗު ފެށީ ރަނގަޅަށް ކަމަށާއި، ރަނގަޅު ކުޅުމެއް ދައްކައި އެ ޓީމުން ލަނޑު ވެސް ޖެހި ކަމަށެވެ. ނަމަވެސް، ވުލްވްސް އަށް މެޗުގެ ނަތީޖާ ހަމަހަމަ ކުރެވުނީ ޔުނައިޓެޑުން ބައެއް ކަންކަން ދޫކޮށްލުމުން ކަމަށް ވެސް އަމޯރިމް ބުންޏެވެ. އޭނާ ބުނީ މެޗުގެ ފުރަތަމަ ހާފުގެ ވަކި ހިސާބަކުން ޔުނައިޓެޑަށް ގިނަ ކަންކަން އުނދަގޫވި ކަމަށެވެ.

ނަމަވެސް، މެޗުގެ ދެ ވަނަ ހާފު ފަށައިގެން އަނެއްކާ ވެސް ޔުނައިޓެޑުން ކުޅުން ރަނގަޅުކޮށް، ލަނޑު ތަކެއް ޖެހި ކަމަށް އޭނާ ބުންޏެވެ. ޚާއްސަކޮށް ލަނޑުތައް ޖެހުމުގެ އިތުރުން، ޔުނައިޓެޑުގެ ކުޅުން ރަނގަޅު ކަމަށާއި، އެ ޓީމުން ގިނަ ފުރުސަތު ތަކެއް ހޯދިކަން އަމޯރިމް ވަނީ ފާހަގަ ކޮށްފަ އެވެ. މެޗު ނިމުނު ގޮތާ މެދު ހިތްހަމަ ޖެހިގެން ހުރިކަން ފާހަގަކޮށް އަމޯރިމް ބުނީ، ކުޅުންތެރިން ވެސް ތިބީ އުފަލުން ކަމަށެވެ.

މެޗުން މޮޅުވެ ޔުނައިޓެޑުން ވަނީ ލީގު ތާވަލްގެ ހަ ވަނަ މަގާމަށް ޖެހިލައިފަ އެވެ. މިހާތަނަށް ލީގުގައި ކުޅެފައިވާ 15 މެޗުން 25 ޕޮއިންޓާ އެކު ޔުނައިޓެޑު އޮތީ ހަ ވަނައިގަ އެވެ. ފަސް ވަނައިގައި އޮތް ޗެލްސީ ވެސް ހަމަ އެ އަދަދަށް މެޗު ކުޅެފައިވާއިރު، އެ ޓީމަށް ވެސް ލިބެނީ 25 ޕޮއިންޓެވެ. މި ސީޒަންގެ ޕްރިމިއާ ލީގުގައި ހަތް މެޗުން ޔުނައިޓެޑު މޮޅުވެފައިވާއިރު، ހަތަރު މެޗުން ބަލިވެ، އަނެއް ހަތަރު މެޗުން ވަނީ އެއްވަރުވެފަ އެވެ.