ބްރެންޓްފޯޑް ބަލިކޮށް، އާސެނަލް އިން ލީޑު ފުޅާ ކޮށްފި

އިނގިރޭސި ޕްރިމިއާ ލީގުގައި ބްރެންޓްފޯޑާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ އެއް ވަނަ މަގާމުގައި ލީޑު ފުޅާ ކޮށްފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ބުދަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި ފުރަތަމަ ހާފުގައި އާސެނަލް އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 11 ވަނަ މިނެޓުގައި އާސެނަލް އަށް ލަނޑު ޖަހައި ކުރި ހޯދައިދިނީ މިކޭލް މެރީނޯ އެވެ. އެއީ ބެން ވައިޓް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި އާސެނަލް އިން އިތުރު ލަނޑު ޖަހަން ވެސް ފުރުސަތު ތަނަވަސް ކުރިއިރު، ފަހު ލަނޑު އެ ޓީމުން ޖެހީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. މެރީނޯ ތަނަވަސްކޮށްދިން ފުރުސަތެއްގައި އާސެނަލް އަށް އެ ލަނޑު ޖަހައިދިނީ ބުކަޔޯ ސަކާ އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، ބްރެންޓްފޯޑަކީ އިދިކޮޅަށް ކުޅޭއިރު އެތައް ނުރައްކަލެއް ކުރިމަތި ކުރުވާ ޓީމެއް ކަމަށެވެ. އެ ޓީމުން ލަނޑު ޖަހަން ނުރައްކާތެރި ފުރުސަތެއް ވެސް ހޯދިކަން ފާހަގަކޮށް އާޓެޓާ ބުނީ، އެ ބޯޅަ ސަލާމަތް ކުރުމަކީ އާސެނަލް އަށް ލިބުނު ވަރަށް ބޮޑު ފައިދާއެއް ކަމަށެވެ.

މެޗުގައި ހިނގި ގިނަ ކަންކަމަށް ބަލާއިރު، މެޗު ކޮންޓްރޯލް ކޮށްގެން އާސެނަލް އިން ރަނގަޅަށް ކުޅުނު ކަމަށް އާޓެޓާ ޤަބޫލު ކުރެ އެވެ. ނަމަވެސް، އާސެނަލް ކޮޅަށް މެޗު ނިމޭނެކަން މުޅިން ޔަޤީންވީ ފަހު ވަގުތުގައި ޖެހި ދެ ވަނަ ލަނޑާ އެކު ކަމަށް ވެސް އާޓެޓާ ބުންޏެވެ.

މެޗުން މޮޅުވެ އާސެނަލް އިން ވަނީ ލީގު ތާވަލްގެ އެއް ވަނައިގައި ފަސް ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 14 މެޗުން އެ ޓީމަށް ލިބެނީ 33 ޕޮއިންޓެވެ. ދެ ވަނައިގައި އޮތް މެންޗެސްޓަރ ސިޓީ ވެސް ހަމަ އެ އަދަދަށް މެޗު ކުޅެފައިވާއިރު، އެ ޓީމަށް ލިބެނީ 28 ޕޮއިންޓެވެ.