ކ. މާލެ
|
10 މެއި 2021 | ހޯމަ 04:53
ރެނެސް އާއި ޕީއެސްޖީ ބައްދަލުކުރި މެޗުގެ ތެރެއިން: މި މެޗު އެއްވަރުވީ 1-1 ން
ރެނެސް އާއި ޕީއެސްޖީ ބައްދަލުކުރި މެޗުގެ ތެރެއިން: މި މެޗު އެއްވަރުވީ 1-1 ން
ގެޓީ އިމޭޖަސް
ފްރެންޗް ލީގު
ރެނެސްއާ އެއްވަރުވެ ޕީއެސްޖީއަށް ފުރުސަތު ހަނިވެއްޖެ
 
ރެނެސް އާއި ޕީއެސްޖީ އެއްވަރުވީ 1-1 ގެ ނަތީޖާއަކުން
 
ތާވަލުގެ ދެވަނައިގައި ޕީއެސްޖީ އޮތީ 76 ޕޮއިންޓާއެކު

ފްރެންޗް ލީގުގައި އާދީއްތަ ދުވަހުގެރޭ ކުޅުނު މެޗުން ރެނެސްއާ އެއްވަރުވެ، ލީގު ދިފާއުކުރުމުގެ ފުރުސަތު ޕީއެސްޖީއަށް ހަނިވެއްޖެއެވެ.

ރެނެސްގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ޕީއެސްޖީންނެވެ. ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ނޭމާއެވެ. މިއީ އޭރިއާ ތެރެއިން ޕީއެސްޖީގެ ލަވިން ކުރްޒާވާއަށް ރެނެސްގެ ނައިފް އަގުއާޑް ކުރި ފައުލަކަށް ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.

އޭގެ ފަހުން މެޗުގެ ދެވަނަ ހާފުގައި ރެނެސްއިން ގިނަ ހަމަލާތަކެއް އުފެއްދިއިރު، މެޗުގެ 70 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. ބެންޖަމިން ބޯރިގާޑް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ސޭރިހޫ ގިރާސީއެވެ. އަދި މި މެޗު ޕީއެސްޖީން ނިންމާލާފައިވަނީ އެއް ކުޅުންތެރިއަކު މަދުކޮށެވެ. އެއީ މެޗު ނިމެން ތިން މިނެޓަށް ވެފައި ވަނިކޮށް އެ ޓީމުގެ ޕްރެސްނެލް ކިމްޕެމްބޭއަށް ސީދާ ރަތް ކާޑެއް ދެއްކުމުންނެވެ. އޭނާއަށް ސީދާ ރަތް ކާޑެއް ދެއްކީ ރެނެސްގެ ޖެރެމީ ޑޮކޫއަށް ކުރި ނުރައްކާތެރި ފައުލަކާ ގުޅިގެންނެވެ.

މި މެޗުން އެސްޖީ އެއްވަރުވުމުން ލީގުގެ އެއްވަނައިގައި ލިލްއަށް ވަނީ ތިން ޕޮއިންޓުގެ ލީޑެއް ލިބިފައެވެ. ލީގުގައި ބާކީ ދެ މެޗު އޮތްއިރު، ލީގު ޗެމްޕިއަންކަން ހޯދަން ލިލްއަށް ދެން ބޭނުންވަނީ ހަތަރު ޕޮއިންޓެވެ. ތާވަލުގެ އެއްވަނައިގައި ކުޅުނު 36 މެޗުން 79 ޕޮއިންޓާއެކު ލިލް އޮތްއިރު، ދެވަނައިގައި ޕީއެސްޖީ އޮތީ 36 މެޗުން 76 ޕޮއިންޓާއެކުއެވެ. އަދި ތިންވަނައިގައި އޮތީ އާދީއްތަ ދުވަހުގެރޭ ރެއިމްސް އަތުން 1-0 ގެ ނަތީޖާއަކުން މޮޅުވި މޮނާކޯއެވެ. މޮނާކޯއަށް 36 މެޗުން 74 ޕޮއިންޓް ލިބިފައިވާއިރު، ހަތަރުވަނައިގައި އޮތް ލިޔޯނަށް ވަނީ 36 މެޗުން 73 ޕޮއިންޓް ލިބިފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
50%
0%
0%
0%
50%
0%
ކޮމެންޓް