ރައީސް ނަޝީދުގެ މިހާރުގެ ހާލުކޮޅު، "މަ ރަނގަޅު"
ރައީސް ނަޝީދު މިހާރުވަނީ ލައިފް ސަޕޯޓުން ނަގާފައި
ރައީސް ނަޝީދުގެ ގެކޮޅު ކައިރީގައި އެއްޗެއް ގޮއްވާލުން- މި ހާދިސާ ބޭރުގެ މާހިރުންގެ އެހީގައި ދަނީ ތަހުގީގު ކުރަމުން
ރައީސް ނަޝީދުގެ ޙާލުކޮޅު މިހާރު ރަނގަޅުކަމަށް އެމަނިކުފާނުގެ އާއިލާއިން ހާމަކޮށްފިއެވެ.
އާއިލާ ބޭފުޅަކު ކުރެއްވި ޓްވީޓެއްގައި ވިދާޅުވީ، ރައީސް ނަޝީދު މިހާރު ލައިފް ސަޕޯޓުން ނަގާފައިވާ ކަމަށާއި، ޙާލުކޮޅު ކުރިއަށްވުރެ މިހާރު ރަނގަޅު ކަމަށެވެ. އެމަނިކުފާނު ހޭފުޅު ލެއްވުމަށްފަހު، މަންމާފުޅާއި ބައްޕާފުޅު އަރިހުގައި " މަ ރަނގަޅޭ" ވިދާޅުވި ކަމަށް ޓްވީޓުގައި ވެއެވެ.
އެމަނިކުފާނުގެ ޙާލުކޮޅު މިހާރު ކުރިއަށްވުރެ ރަނގަޅުކަމަށް އާއިލާ ބޭފުޅަކު ރާއްޖެއެމްވީއަށް ކަށަވަރު ކޮށްދެއްވާފައިވެއެވެ.
އާއިލާގެ އެހެން ބޭފުޅަކު ކުރެއްވި ޓުވީޓެއްގައި ވިދާޅުވެފައިވަނީ ރައީސް ނަޝީދު މިހާރު ނޭވާލަނީ އަމިއްލަފުޅަށް ކަމަށާއި ލައިފް ސަޕޯޓުން ނެގިފައިވާ ކަމަށެވެ. ކޮންމެވެސް ވަރަކަށް ވާހަކަފުޅުވެސް ދައްކަވާ ކަމަށާއި ކުރިއަށްވުރެ ގަދަކޮށް އެނބުރި ވަޑައިގަންނަވާނެ ކަމަށް ވިދާޅުވި ކަމުގައެވެ.
ބުރާސްފަތި ދުވަހުގެ ރޭ ރައީސް ނަޝީދަށް އަމާޒުކޮށް ދިން ހަމަލާގައި އެމަނިކުފާނަށް ލިބިވަޑައިގެންނެވި ޒަޚަމްތަކަށް ފަރުވާ ހޯއްދަވަމުން ގެންދަވަނީ އޭޑީކޭ ހޮސްޕިޓަލްގައެވެ. އައިއީޑީއެއް ގޮއްވާލުމުން ބުރަބުރައިގެން ދިޔަ ތޫނު ގިނަ އެތިއެތިކޮޅު އެމަނިކުފާނުގެ ހަށިކޮޅަށް ހެރިފައިވާތީ އެ ތަކެތި ނެގުމަށް ގިނަ އޮޕަރޭޝަންތަކެއް ކުރި އިރު އެކަމަށް 16 ގަޑިއިރަށް ވުރެ ގިނަ ވަގުތު ހޭދަވިއެވެ.
