ހިޔާ ފްލެޓްތަކުގެ ކަރަންޓުގެ ޚިދުމަތް ދިނުމަށް ގެނައި ކޭބަލްތައް ގެއްލުނު މައްސަލަ ތަހުގީގު ކުރަނީ
ކުންފުނީގެ އިންޓަރނަލް އޮޑިޓުންނާއި ފުލުހުން ގުޅިގެން މައްސަލަ ތަހުގީގު ކުރަމުންދަނީ
ހިޔާ ފްލެޓް މަޝްރޫއުގެ ދަށުން އަޅާފައިވާ ފްލެޓްތައް
ހިޔާ މަޝްރޫއުގެ ދަށުން އިމާރާތްކޮށްފައިވާ ހައުސިންގ ޔުނިޓުތަކަށް ކަރަންޓުގެ ޚިދުމަތް ދިނުމަށް ގެނައި ކޭބަލްތައް ގެއްލުނު މައްސަލަ ހައުންސިންގ ޑިވަލޮޕްމަންޓް ކޯޕަރޭޝަން (އެޗްޑީސީ)ން އެކަން ތަހުގީގު ކުރަން ފަށައިފިއެވެ.
އެޗްޑީސީން މިކަމާ ގުޅިގެން ނެރުނު ނޫސްބަޔާނެއްގައި ބުނީ ކޭބަލްތައް ގެއްލިފައިވާކަން ކުންފުނީގެ ސަމާލުކަމަށް އައުމުން ކުންފުނީގެ އިންޓަރނަލް އޮޑިޓުންނާއި ފުލުހުން ގުޅިގެން އެ މައްސަލަ ތަހުގީގު ކުރަމުންދާ ކަމަށެވެ. އަދި ހުޅުމާލެ ފޭސް 2 ހިޔާ ފްލެޓް ސަރަހައްދުގައި މީހުން ދިރިއުޅެން ފެށުމުގެ ކުރިން ކަރަންޓުގެ ޚިދުމަތް ދިނުމަށް ގިނަ މަސައްކަތްތަކެއް ކުރެވެމުންދާއިރު އެފަދަ ކަމަކާ ކުރިމަތިވުމަކީ އެކަމުގެ ސަބަބުން މަޝްރޫއު ހިންގުމަށް އެތައް ދަތިތަކެއް ކުރިމަތިވާނެ ކަމަށް ވެސް އެ ކުންފުނިން ވަނީ ބުނެފައެވެ.
މި މައްސަލައިގައި ބައިވެރިވާ ފަރާތްތަކަކީ ކޮބައިތޯ ދެނެގަތުމުގެ މަސައްކަތް މިހާރު ކުރެވެމުންދާއިރު އެޗްޑީސީގެ އެއްވެސް މުވައްޒަފެއްގެ ބައިވެރިވުން އެކަމުގައިވާނަމަ އެ މުވައްޒަފަކާ މެދު ފިޔަވަޅު އެޅުމަށް ފަސް ނުޖެހޭނެ ކަަމަށް ވެސް އެ ކުންފުނިން ވަނީ ބުނެފައެވެ.
ކޭބަލްތައް ގެއްލުނު މައްސަލަ ތަހުގީގު ކުރަމުންދާއިރު އެޗްޑީސީން ވަނީ ހިޔާ ފްލެޓުތައް ލިބިފައިވާ މީހުންނަށް ލިބެނީ ކޮން އެޕާޓްމެންޓެއްތޯ ކަނޑައެޅުމަށް ގުރުއަތުލުންތައް ބާއްވާފައެވެ. އަދި ފްލެޓްތަކުގެ އެގްރީމަންޓުގައި ސޮއިކޮށް، ތަޅުދަނޑިތައް ހަވާލުކުރާނެ ތާރީޚެއް ފަހުން އިއުލާން ކުރާނެ ކަމަށް ވެސް މީގެ ކުރިން އެ ކުންފުނިން ވަނީ ބުނެފައެވެ. ހިޔާ ފްލެޓްތައް ލިބެނީ ދޮރާއި ބޮއްކާއި ޓައިލްސް ހަރު ނުކޮށެވެ. އެހެންކަމުން މި ފްލެެޓްތަކުގެ ތަޅުދަނޑި ހަވާލުކުރާ ދުވަހުން ފެށިގެން ތިން މަސް ދުވަސް މި މަސައްކަތް ކުރަން ލިބޭނެ ކަމަށް ސަރުކާރުންވަނީ ބުނެފައެވެ. މި މުއްދަތުގައި ކުލި ނުނަގާނެ ކަމަށް ސަރުކާރުން އިއުލާނު ކޮށްފައިވާއިރު، ހިޔާ ފްލެޓެއްގެ ކުލި 7000ރ. އަށް ވުރެ ބޮޑު ނުވާނެކަމަށް ވެސް ސަރުކާރުން ބުނެފައިވެއެވެ.
