މުވައްޒަފުންނަށް ބޯނަސް ދިނުމަށް ދަނީ މަޝްވަރާ ކުރަމުން، ވަކި ގޮތެއް ނުނިމޭ: ސީއެސްސީ

ސިވިލް ސަރވެންޓުންނަށް 2014 ވަނަ އަހަރު ދޭންފެށި ސިވިލް ސަރވިސް ބޯނަސް މިދިޔަ އަހަރު ދީފައި ނުވާއިރު އެކަމާ ގުޅޭ މަޝްވަރާތައް ސިވިލް ސަރވިސް ކޮމިޝަނުން ސަރުކާރާ އެކު ކުރަމުންދާ ކަމަށް އެކޮމިޝަނުން ބުނެފިއެވެ.

ސިވިލް ސަރވިސް ކޮމިޝަނުން ބުނީ، އެ ކޮމިޝަނުން ބޯނަސް ދިނުމާ ގުޅޭ ގޮތުން ގޮތެއް ނިންމުމަށް ސަރުކާރުގެ އިސް ފަރާތްތަކާ އެކު މަޝްވަރާ ކުރަމުންދާ ކަމަށެވެ. އެހެން ނަމަވެސް ބޯނަސް ލިބޭނެތޯ ނުވަތަ ނޫންތޯ ވެސް އެކޮމިޝަނުން ހާމަކޮށްފައެއް ނުވެއެވެ.

ދިވެހި ސިވިލް ސަރވިސްގައި މަސައްކަތް ކުރަމުންދާ މުވައްޒަފުންގެ ތެރެއިން އެންމެ ރަނގަޅަށް މަސައްކަތްކުރާ މުވައްޒަފުނަށް ބޯނަސް ދޭން ދިވެހި ސިވިލް ސަރވިސް ކޮމިޝަނުން ނިންމި ނިންމުމާ ގުޅިގެން އެއަހަރުގެ ބަޖެޓުން އެ ފައިސާ ވަނީ ހަމަޖައްސާދީފަ އެވެ. އެގޮތުން 2014 ވަނަ އަހަރު 40 މިލިއަން ރުފިޔާ ފިނޭންސް މިނިސްޓްރީގެ ޚާއްސަ ބަޖެޓުގެ ތެރެއިން ކަނޑައަޅާފައި ވެއެވެ.

ބޯނަސް ދިނުމަށް ނިންމާފައިވަނީ ސިވިލް ސަރވިސްއިން އާންމު ރައްޔިތުންނަށް ފޯރުކޮށްދޭ ޚިދުމަތުގެ ފެންވަރު މަތިކޮށް ރަނގަޅު ކުރުމުގެ ގޮތުން ކުރަމުންދާ މަސައްކަތުގެ ތެރެއިން އެފަދަ މުވައްޒަފުންގެ ޚިދުމަތުގެ އަގު ވަޒަން ކުރުމުގެ ގޮތުން ކަމަށް އެ ކޮމިޝަނުން ހާމަކުރެ އެވެ.

ސިވިލް ސަރވިސް ބޯނަސް 2014 ވަނަ އަހަރާއި 2015 ވަނަ އަަހަރު ދިން ނަމަވެސް 2016 ވަނަ އަހަރު ދީފައެއް ނުވެއެވެ. ބޯނަސް ދެނީ ކޮންމެ އަހަރަކު ވެސް އޭގެ ކުރީ އަހަރުގެ ނަތީޖާގެ ބޯނަހެވެ. އެގޮތުން 2014 ވަނަ އަހަރު ބޯނަސް ދީފައިވަނީ 2013 ވަނަ އަހަރުގެ އެންމެ ރަގަޅަށް މަސައްކަތް ކުރި މުވައްޒަފުންނަށް ބަލައިގެންނެވެ. އަދި 2015 އަހަރު ބޯނަސް ދީފައިވަނީ 2014 ވަނަ އަހަރަށެވެ.