ގަޑިއިރެއް ވަންދެން ވައިގެ ތެރޭގައި ހަރުލާފައި ހުންނަ ކޮވިޑް ވޭރިއަންޓެއް ލަންކާއިން ފެނިއްޖެ

ގާތްގަނޑަކަށް ގަޑިއިރެއް ވަންދެން ވައިގެ ތެރޭގައި ހަރުލާފައި ހުންނަ ކޮވިޑް ވޭރިއަންޓެއް ސްރީލަންކާއިން ފެނިއްޖެއެވެ.

ލަންކާގެ ސިއްހަތާބެހޭ އިދާރާތަކާއި ޙަވާލާދީ ބޭރުގެ މީޑިއާތަކުން ރިޕޯޓު ކޮށްފައިވާ ގޮތުން މި އައު ވޭރިއަންޓު ފެތުރޭ މިންވަރުވެސް ކޮވިޑް-19 ގެ އާންމު ވައިރަހަށްވުރެ ހަލުވިއެވެ. އަދި މި ވޭރިއަންޓު ގަޑިއެއްހާއިރު ވަންދެން ވައިގެ ތެރޭގައި ހަރުލާފައި ހުންނަކަމަށް ސްރި ޖަޔަވަރދެނާ ޔުނިވަރސިޓީގެ އިމިއުނޮލޮޖީ އެންޑް މޮލިކިއުލަރ ސައިންސްގެ އެޗްއޯޑީ ނީލިކާ މަލާވީ ވިދާޅުވެފައިވެއެވެ.

ރިޕޯޓުތައް ބުނާގޮތުން ކޮވިޑުގެ މި އައު ވޭރިއަންޓު ކުއްލި ގޮތަކަށް ފެތުރެން ފަށާފައި މިވަނީ މިދިޔަ ހަފްތާގައި ފާހަގަކުރި ލަންކާގެ އައު އަހަރުގެ ހަފްލާތަކަށް ފަހުއެވެ. އަދި މި ވޭރިއަންޓުގެ ސަބަބުން ކުރިއަށް އޮތް ދުވަސްތަކުގައިވެސް ކޮވިޑުގެ ގިނަ ކޭސްތަކެއް ރިޕޯޓު ކުރެވެމުން ދިއުމަކީ އެކަށީގެންވާ ކަމެއް ކަމަށް ރިޕޯޓުތައް ބުނެއެވެ.

ލަންކާއިން ފެންނަމުންދާ ކޮވިޑުގެ ކޭސްތައް ކޮންޓްރޯލް ކުރުމަށްޓަކައި އެ ޤައުމުގައި މިހާރު ވަނީ ހަރުކަށި ފިޔަވަޅުތަކެއްވެސް އަޅާފައެވެ. އެގޮތުން މި ފިޔަވަޅުތައް އަންނަ މެއި މަހުގެ 31 ވަނަ ދުވަހުގެ ނިޔަލަށް ދެމި އޮންނާނެކަމަށް އެ ޤައުމުގެ ނޫސްތަކުން ރިޕޯޓު ކޮށްފައިވެއެވެ. މި ފިޔަވަޅުތަކުގެ 50 އިންސައްތައަކީ އާންމުން އެއްވެ އުޅުން ހުއްޓުވައި، މަދު ކުރުމާ ގުޅޭ ފިޔަވަޅުތަކެވެ.

ލަންކާއިން މިހާރު ދުވާލެއްގެ މައްޗަށް 600އެއްހާ ކޭސް ރިޕޯޓު ކުރެވެއެވެ. އަދި މިވަގުތު އެ ޤައުމުގެ ސިއްޙީ ނިޒާމަށްވެސް ބޮޑެތި ގޮންޖެހުންތަކާ ކުރިމަތިލާން ޖެހިފައިވާއިރު، ސިއްޙީ ނިޒާމަށް ނުކަތާވަރަށް ކޭސްތައް ފެންނަމުން ދިއުމުގެ ކަންބޮޑުވުން މިހާރު ވަނީ ކުރިމަތިވެފައެވެ.

މިހާތަނަށް ލަންކާއިން ކޮވިޑު ޖެހިގެން 642 މީހަކު ނިޔާވެފައިވާއިރު، އެ ޤައުމުން ޕޮޒިޓިވްވި މީހުންގެ އަދަދުވެސް މިހާރު ވަނީ ލައްކައިން މައްޗަށް ގޮސްފައެވެ. އެގޮތުން މިހާތަނަށް 100،586 މީހުންނަށް ކޮވިޑު ޖެހިގެން އެ ޤައުމުން ރިޕޯޓު ކޮށްފައިވެއެވެ.