ކޮވިޑު ފެތުރުން ހުއްޓުވުމަށް ތުރުކީ ފުލް ލޮކްޑައުންއަކަށް!

ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ތުރުކީގައި ނޭޝަން-ވައިޑް ލޮކްޑައުންއެއް ތަންފީޒު ކުރުމަށް ނިންމައިފިއެވެ.

އަލްޖަޒީރާގައި ރިޕޯޓު ކޮށްފައިވާ ގޮތުން ބުރާސްފަތި ދުވަހުން ފެށިގެން ތުރުކީ ލޮކްޑައުން ކުރުމަށް ވަނީ ނިންމާފައެވެ. އަދި މި ލޮކްޑައުން އަންނަ މެއި މަހުގެ 17 ގެ ނިޔަލަށް ދެމި އޮންނާނެކަމަށް ތުރުކީގެ ރައީސް ރަޖަބް ތައްޔިބް އުރުދުޢާން އާ ޙަވާލާދީ އަލްޖަޒީރާގައި ރިޕޯޓު ކޮށްފައިވެއެވެ. އުރުދުޢާން ވަނީ އެ ޤައުމުގެ ރައްޔިތުންނަށް އެކަން އިއުލާނު ކުރައްވައި، މިއީ ތުރުކީގައި ކޮވިޑު ފެތުރުން ކޮންޓްރޯލް ކުރުމުގެ ގޮތުން އަޅަން ޖެހިފައިވާ ފިޔަވަޅެއްކަމަށް ވިދާޅުވެފައެވެ.

އުރުދުޢާން ވިދާޅުވީ، ލޮކްޑައުންގެ ފިޔަވަޅުތަކާއެކު، އެ ޤައުމުގެ އެއް ސިޓީން އަނެއް ސިޓީއަށް ދަތުރު ކުރެވޭނީވެސް ރަސްމީ ހުއްދައެއްގެ ދަށުން ކަމަށެވެ. އަދި ހުރިހާ ސުކޫލުތަކެއްވެސް ބަންދުކޮށް އޮންލައިންކޮށް ކިޔަވައިދިނުމަށް ނިންމާފައިވާއިރު، އާންމު ދަތުރުފަތުރުތަކަށްވެސް ވަކި އުސޫލުތަކެއް ވަނީ ކަނޑައަޅާފައެވެ. އަދި ޚާއްސަ ހުއްދަ ލިބިފައިވާ މީހުންނަށް މަގުމަތީގައި ނުކުމެ އުޅުމުގެ ހުއްދަ ދޭއިރު، އަމާޒަކީ ދުވާލެއްގެ މައްޗަށް ރިޕޯޓު ކުރާ ކޭސްތައް 5000ށް ވުރެ ދަށް ކުރުންކަމަށް އެ ޤައުމުން ވަނީ ބުނެފައެވެ.

ތުރުކީން ފެންނަމުންދާ ކޮވިޑު ކޭސްތައް ފާއިތުވި ދުވަސްތަކުގައި އިތުރުވެ، ފާއިތުވި 24 ގަޑިއިރުވެސް އެ ޤައުމުން 37،000ށް ވުރެ ގިނަ މީހުން ޕޮޒިޓިވްވެފައިވާއިރު، 353 މީހަކު ވަނީ ކޮވިޑު ޖެހިގެން މަރުވެފައެވެ. އެގޮތުން މުޅި ދުނިޔޭގެ ފާއިތުވި 24 ގަޑިއިރުގެ އަދަދުތަކަށް ބަލާއިރު، 4 ވަނައަށް އެންމެ ގިނަ މީހުން ޕޮޒިޓިވްވެގެން ރިޕޯޓުކުރި ޤައުމަކީވެސް ތުރުކީ ކަމަށް އެ ޤައުމުގެ ސިއްހަތާބެހޭ ވުޒާރާއިން އާންމުކޮށްފައިވާ މައުލޫމާތުތަކަށް ބިނާކޮށް އަލްޖަޒީރާގައި ރިޕޯޓު ކޮށްފައިވެއެވެ.