ތަރައްގީއަކީ ހަމައެކަނި އުމްރާނީ ގޮތުން ކުރިއަރައި ދިއުމެއް ނޫނެވެ. އެއީ އިންސާނާގެ ވިސްނުމާ ގުޅިފައިވާ އަދި އިންސާނާގެ ޒާތުން އުފެދިގެން އަންނަ އެއްޗެކެވެ.

މައުލޫމާތު މުއްސަނދިވި ވަރަކަށް އިންސާނާގެ ލޯ ދުނިޔެއަށް ހުޅުވި މީހާ ތަރައްގީވެ ކުރިއަރައިދެއެވެ. މީހާ ތަރައްގީވެ ކުރިއަރައިފިނަމަ އެމީހަކު އުޅޭ މާހައުލެއްވެސް ކުރިއަރައިގެން ދެއެވެ.

މީހަކު ކިތަންމެ މަސައްކަތެއް ކޮށްދިނަސް އިންސާނާ ވިސްނައި ދެނެގަންނަން ބޭނުންވާ މައުލޫމާތެއް މެނުވީ އޭނާގެ ސިކުނޑިއަކަށް ނުވިސްނޭނެއެވެ. މިއީ އިންސާނުންގެ ތަބީއަތެވެ. ކޮންމެއަކަސް މި އިލްމާއި މައުލޫމާތު ހޯދުމުގައި އިންސާނާއަށް އެންމެ އެހީތެރިވާ ވަސީލަތަކީ ލިޔެފައިވާ ލިޔުންތަކާއި ފޮތްތަކެވެ.

ދުނިޔޭގެ ފޮތުގެ ދުވަސް އޭޕްރީލް 23 ވަނަ ދުވަހު ފާހަގަކޮށްފައިވާއިރު ފޮތް ކިޔުމުގެ ފައިދާތައް އެނގުން ވަރަށް މުހިއްމެވެ.

ފޮތް ކިޔުމަކީ މީހާގެ ވިސްނުން ތޫނުކޮށްދީ ސިކުނޑި ތަނަވަސް ކޮށްދޭ ކަމެކެވެ. ކުޑަކުއްޖެއް، ޒުވާނެއް ނުވަތަ މުސްކުޅިއެއް ކަމުގައި ވިޔަސް ފޮތް ކިޔުމުން އެމީހަކު އިލްމީ ގޮތުން މުއްސަނދި ކޮށްދެއެވެ. ވިސްނުންތެރިކަމަށް ދަތުރުކުރެވެއެވެ. ވިސްނުންތެރި ކަމުގެ ބޭނުން ހެޔޮގޮތުގައި ހިފައި ދިރިއުޅުމުގެ މައިދާނުގައި ދިމާވާ ހުރަސްތަކާއި ކުރިމަތިލުމަށް ނަފުސަށް ހިތްވަރު ދެއެވެ. އަދި ކަންކަމުގައި ރަނގަޅު ގޮތާއި މަގު އިޚުތިޔާރުކުރުމަށް ވެސް ފަސޭހަވެއެވެ.

ފޮތް ކިޔުމުގެ ސަބަބުން މުއްސަނދި ބަސްކޮށާރެއް ލިބުމަށް އެހީވެދެއެވެ. މުއްސަނދި ބަސްކޮށާރެއް ލިބުމަކީ އެހެން މީހުންނާ ގިނައިން މުއާމަލާތްކޮށް ރަނގަޅު މައުލޫމާތުތައް ލިބޭނެ ކަމެކެވެ. ފޮތެއް ކިޔައިލީމާ ކުރިން ނޭނގޭ އާ ބަސްބަސް ދަސްވެއެވެ. އެބަސްތައް ބޭނުން ކުރެވޭނެ ގޮތާއި ވަގުތާއި ހާލަތު އެނގިދެއެވެ. އަދި އެއް މާނައެއްގައި ބޭނުން ކުރެވޭ ގިނަ ބަސްތައް ދެނެގަނެވި މީހުންނާ މުއާމަލާތު ކުރަން ފަސޭހަވެ، ވާހަކަދެއްކުންތެރި ކަމުގެ ރޮނގުންވެސް ކުރިއަރަން މަގުފަހިވެއެވެ.

އިންސާނަކު ކުރި އަރައި ދިއުމަށްޓަކައި އެންމެ މުހިއްމު އެއް ކަމަކީ އެމީހެއްގެ ހަނދާން ވަރުގަދަ ކުރުމެވެ. ސައިންސްވެރިންގެ ދިރާސާތަކުން ދައްކާ ގޮތުގައި ގިނަ ގިނައިން ފޮތް ނުވަތަ މައުލޫމާތު ލިބޭ ވަސީލަތެއް ކިޔާ ސިކުނޑިއަކަށް އެ މައުލޫމާތުތައް ފޯރު ކޮށްދޭނަމަ ހަނދާން ވަރުގަދަވެގެންދެއެވެ. އަދި ގިނައިރު ގިނަ ތަކެތި ހަނދާނުގައި ބެހެއްޓުމަށް އެހީވެއެވެ.

އިތުރު ކަންކަމަށް ބަލާއިރު ފޮތް ކިޔުމަކީ އިންސާނާގެ ނަފްސާނީ ދުޅަހެޔޮކަމަަށް ވެސް އޭގެ ހެޔޮ އަސަރު ކުރާ ކަމެކެވެ. ގިނަގިނައިން ފޮތް ކިޔުމުން ބޭކާރު ވިސްނުންތަކާ ޚިޔާލުތަކާ ދުރުވުމަށް އެހީވެދެއެވެ. އަދި އެހެން ދިމާލަކަށް ވިސްނުން އަނބުރާލައެވެ. ހާސްވެ ކަންބޮޑުވާ ވަގުތުގައި ފޮތެއް ނޫހެއް ނުވަތަ މިނޫންވެސް މިފަދަ އެހެން ވަސީލަތެއް ކިޔާލާށެވެ. ހަމަގައިމުވެސް ކަންބޮޑުވުމާ ދުރުވެވޭނެއެވެ. ހަމަޖެހިލުމަށް މަގުފަހި ވެގެންދާނެއެވެ. މީހަކު ކުރިއަރައިގެން ދިޔުމަށްޓަކައިވެސް އެންމެ މުހިއްމު ކަމަކީ ހަމަޖެހިގެން ހުރުމެވެ. ނަފްސާނީ ގޮތުން ދުޅަހެޔޮ މީހަކަށް ވުމެވެ.

ގިނަގިނައިން ފޮތް ކިޔުމަށް އާދަ ކޮށްފިނަމަ މުހިއްމު ކަންކަމަށް ސަމާލުކަން ދޭން ދަސްވާނެއެވެ. މުހިއްމު ބަސްތަކާއި މުހިއްމު ޖުމުލުތަކަށް ސަމާލުކަން ދޭ ފަދައިން ހަޔާތުގައި ދިމާވާ މުހިއްމު ކަންކަމަށް ސަމާލު ކަން ދީ ކުދި ކަންކަމާ މެދު މާބޮޑު ފިކުރު ކުރުމެއް ނެތި ފުރަތަމަ އިސްކަން ދޭންޖެހޭ ކަންކަމަށް އިސްކަންދީ ބޮޑެތި މައްސަލަތައް ހައްލު ކުރަން ދަސްވާނެއެވެ. މިއަށް އިނގިރޭސިން ކިޔައި އުޅެނީ ޕްރަޔޯރަޓައިޒް ކުރުމެވެ.

މިހުރިހާ ކަމަކުންވެސް ހާމަވަނީ އެއްކަމެކެވެ. އެއީ ފޮތް ކިޔައި އުޅޭ މީހަކީ ހުރިހާ ގޮތުންވެސް ގާބިލް ކުރިއަރައިފަވާ މީހަކަށް ވެގެން ދާކަމެވެ. މިފަދަ މީހަކީ ވިސްނުން ތޫނު، ނަފްސާނީ ގޮތުން ދުޅަހެޔޮ، ބަސްކޮށާރު މުއްސަނދި، މުހިއްމު ކަންކަމަށް ސަމާލުކަން ދޭން އެނގޭ މީހެއް ކަމެވެ. މިއީ ގިނަ އިލްމީ މާހިރުން އަދި ސައިންސްވެރިން ވެސް އެއްބަސްވާ ގޮތުގައި ކާމިޔާބު މީހަކަށް ވުމަށް މުހިއްމު ސިފަތަކެކެވެ. ވުމާއެކު ކޮންމެ މީހަކީވެސް ފޮތް ކިޔާ މީހަކަށް ވުމަށް އާދަކުރަމާ ތޯއެވެ.