ސިއްހީ ހިދުމަތްދޭ އަމިއްލަ މަރުކަޒުތަކުން، އާސަންދެ ހިދުމަތް މެދުކަނޑާލިތާ 24 ގަޑިއިރު ފަހުން، އެ ނިންމުން ބަދަލުކޮށް، ސިއްހީ ހިދުމަތްދޭ އަމިއްލަ މަރުކަޒުތަކުން އާސަންދަގެ ހިދުމަތް ދިނުމަށް ސަރުކާރުން ނިންމައިފި އެވެ.

އަމިއްލަ ތަންތަނުން އާސަންދަ ކަނޑާލިކަން އެނގީ ލޯކަލް ކައުންސިލްގެ އިންތިހާބު ބޭއްވި ހޮނިހިރު ދުވަހުގެ ރޭ 23:22 ހާއިރު އެވެ. 

އާސަންދަ ފުރިހަމަ އަށް އިޔާދަ ކުރުމާ ގުޅޭ ގޮތުން ރައީސް އޮފީހުން ހޯމަ ދުވަހު ހެނދުނު އިޔާދަ ކުރުމަށް ފަހު ނެރުނު ބަޔާނުގައި ބުނެފައި ވަނީ އާސަންދައަކީ، ދިވެހިރާއްޖޭގެ ހުރިހައި ރައްޔިތުންނަށް އެކަށީގެންވާ ރަނގަޅު ފެންވަރުގެ އަސާސީ ޞިއްޙީ ޚިދްމަތް ލުއިފަސޭހަ ގޮތެއްގައި ލިއްބައިދިނުމުގެ ގޮތުން ޤައުމީ ފެންވަރުގައި ހިންގަމުންގެންދާ އިޖްތިމާޢީ ޞިއްޙީ އިންޝުއަރަންސްގެ ނިޒާމެއް ކަމަށެވެ. އަދި ނިޒާމު މިހާރަށް ބައްޓަންކުރެވި ހިނގަމުންދާ ގޮތަކީ، މިފަދަ ނިޒާމެއް ހިންގުމަށް އެންމެ ދެމެހެއްޓެނިވި ގޮތްކަމަށް ނުވާކަމަށް ރައީސް އޮފީހުގެ ބަޔާނުގައި ބުނެފައިވެއެވެ.

ބަޔާނުގައި ބުނެފައިވަނީ، މި ނިޒާމުގެ ހިންގުމުގެ ޚަރަދުތަކާއި، ޞިއްޙީ ޚިދްމަތުގެ ޚަރަދުތައް ކުޑަކޮށް، ޞިއްޙީ ވަސީލަތްތައް އެންމެ ފައިދާކުރަނިވި ގޮތެއްގައި ބޭނުންކުރެވެމުންނުދާތީ، ނިޒާމަށް ސަރުކާރުން ކުރާ ޚަރަދުތަކުގައި އިސްރާފު އުޅޭކަމަށް ބޭރުގެ މާލީ އިދާރާތަކުން ދަނީ ފާހަގަކޮށްފައިވާ ކަމަށެވެ. އަދި ދުނިޔޭގެ ބެސްޓް ޕްރެކްޓިސްއާ އެއްގޮތަށް މި ނިޒާމުގެ ކަންކަން ތަރުތީބު ކުރުމަށްވެސް އެ ފަރާތްތަކުން ލަފާ ދީފައިކަމަށް ރައީސް އޮފީހުގެ ބަޔާނުގައި ބުނެފައިވެއެވެ.

ރައީސް އޮފީހުން ބުނީ، މައްސަލަތައް ހައްލުކުރުމަށް ސަރުކާރުން ވާނީ ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)އަށް ހުށަހަޅާފައިކަމަށެވެ. އަދި އެކަމާ ގުޅިގެން 3 މޭ 2017 ގައި އެންސްޕާގެ ބޯޑުން ނިންމާފައިވަނީ، ޞިއްޙީ ޚިދުމަތްދޭ އަމިއްލަ ތަންތަނުން ފޯރުކޮށްދެމުންދިޔަ އިންޕޭޝަންޓް، އައުޓްޕޭޝަންޓް، ލެބޯޓަރީ އިންވެސްޓިގޭންޝަން އަދި ސްކޭންކުރުމުގެ ޚިދްމަތްތައް އާސަންދައިން އުނިކުރުމަށް ނިންމުމަށް ކަމަށެވެ.

ރައީސް އޮފީހުން ބުނީ، އެގޮތަށް ޢަމަލުކުރުމަކީ، އެއްގޮތަކަށްވެސް ސަރުކާރުގެ ހުށަހެޅުމެއްނޫން ކަމަށެވެ. އަދި އާސަންދައިގެ ޚިދުމަތް ފޯރުކޮށްދިނުމަށް މެދުވެރިވާ އަމިއްލަ ފަރާތްތައް އެކަހެރި ކުރުމަށް ސަރުކާރުން އެއްވެސް ލަފައެއް ދީފައެއްނުވާނެކަމަށް ރައީސް އޮފީހުން ބުނެފައިވެއެވެ. އޭގެ އިތުރުން، އެކަމާގުޅޭ ގޮތުން 6 މޭ 2017 ގައި އެންސްޕާއިން މި ޚިދްމަތް ފޯރުކޮށްދޭ އަމިއްލަ ފަރާތްތަކަށް އެންގި އެންގުމަކީ، ވަކި ތާރީޚެއްގެ ކުރިން ނުވަތަ، ވަކި ތާރީޚެއްގައި ތަންފީޒުކުރުމަށް ސަރުކާރުން އެންސްޕާއަށް އަންގާފައިވާ އެންގުމެއް ނޫންކަންވެސް ރައީސް އޮފީހުން ބުނެފައިވެއެވެ. ސަރުކާރުން މިހާރު ވާނީ، ކުރިއެކޭ އެއްގޮތަށް އަމިއްލަ ފަރާތްތައް އާސަންދައިގައި ހިމަނައިގެން ޞިއްޙީ ދާއިރާގެ ކަންކަން ކުރިއަށް ގެންދިއުމަށް އަންގާފައި ކަމަށާއި، ސަރުކާރުގެ ޚަރަދުތަކުގެ ލީކޭޖް ކުޑަ ކުރުމަށް އެހެން ގޮތްގޮތުން ހައްލު ހޯދައި، އެކަން އަލުން ހުށަހެޅުމަށްވެސް ސަރުކާރުން ވާނީ އަންގާފަކަމަށް ރައީސް އޮފީހުން ބުނެފައިވެއެވެ.

އާސަންދަގެ ހިދުމަތް ނުދިނުމަށް ސަރުކާރުގެ 100 އިންސައްތަ ހިއްސާވާ ކުންފުނިން ނިންމީ، ކައުންސިލް އިްނތިހާބުގެ ނަތީޖާ އިއުލާންކުރަމުންދަނިކޮށެވެ. އަދި ވަގުތި ނަތީޖާއިން ދެއްކިގޮތުގައި ސަރުކާރު ބޮޑުތަނުން ބަލިވެފައިވަނިކޮށެވެ. އެ ނިންމުން ނިންމިތާ، 24 ގަޑިއިރު ފަހުން އެ ނިންމުން އަނބުރާ ގެންގޮސް، ނިޒާމަކީ ހަރަދު ބޮޑު ނިޒާމެއްކަމަށް ރައީސް އޮފީހުން ހާމަކުރިއިރު، ރައީސް މުހައްމަދު ނަޝީދުގެ ސަރުކާރުންދޭން ފެށި އާސަންދައިގެ ނިޒާމަކީ، ކަމުދާ އެއްޗެއް ނޫންކަމަށް ބުނެ، "ހުސްނުވާ އާސަންދަ" ނަމަށް، ނަން ބަދަލުކޮށް، ޕޮލިސީ އަށް ވެސް ބަދަލުތަކެއް ގެނަ އެވެ.