ސްވީޓް އެންޑް ސްޕައިސީ ކޮރެއަން ޗިކެން

މިއީ ކުޅިކޮށް ކާން ބޭނުންވާ ފަރާތްތަކަށް ރަނގަޅު ސައިޑް ޑިޝްއެކެވެ. ބާސްމަތީ ރައިސް އަދި ރޮއްޓާ ޖަހައިގެން ކާން ވެސް މީރުވާނެއެވެ.

ކުކުޅު މެރިނޭޓްކޮށްލަން ޖިންޖަރ ޕައުޑަރ، ލޮނުމެދު، މިލްކް ކްރީމް، ބްލެކް ޕެޕަރ އަދި ލޮނު އަޅައިގެން އެއްކޮށްލާށެވެ. އެއަށްފަހު 15 މިނިޓްވަރު ބަހައްޓާށެވެ.

ސޯސް ތައްޔާރުކުރުމަށް، ބޯތައްޓަކަށް ހަކުރު، ރެޑް ޗިލީ ޕައުޑަރ، ލޮނުމެދު، ސޯއީ ސޯސް، ކެޗަޕް ސޯސް، ޗިލީ ޕެޕަރ އޮއިލް އެޅުމަށްފަހު އެއްކޮށްލާށެވެ.

ކުކުޅުގައި ހޭކުމަށް ފުށް، ކޯން ފްލަރ، ހަނޑޫ ފުށް، ލޮނު އަދި ފެން އަޅައިގެން ގިރާލާށެވެ. ނިމޭއިރު ހުންނާނީ ކުޑަކޮށް އޮލަކޮށެވެ. ދެން އޭގެ ތެރެއަށް ކުރިން މެރިނޭޓްކުރި ކުކުޅު ކޮޅު އަޅާލާށެވެ. ދެން ހޫނު ތެޔޮ އެއްޗެއްގެ ތެރެއަށް ކުކުޅު އަޅައިގެން މުށި ކުލަ އަރައި، ރޯފިލަންދެން ތެލުލާށެއެވެ. ތެލުލާއިރު ދެ ފުށަށް މަސްކޮޅު ފުށުންޖަހަޖަހާ ހުންނަންވާނެއެވެ. ކުލަ ބަދަލުވެ ރޯފިލުމުން ތެޔޮގަނޑު ތެރެއިން ނަގައި އިރުކޮޅަކު ބެހެއްޓުމަށްފަހު، އަނެއްކާވެސް 2 މިނިޓް ފްރައިކޮށްލާށެވެ.

ދެން ކުރިން ތައްޔާރުކުރި ސޯސް ތަވައަކަށް އަޅާލާށެއެވެ. 30 ސިކުންތު ވަންދެން ކައްކާށެވެ. ބޮކި ޖަހަން ފެށުމުން ފްރައި ކުރި ކުކުޅުކޮޅު އަޅާލާށެވެ. ދެން އޭގެ މައްޗަށް ކޮށާފައި ހުރި ދިގުމިރުހާއި، ޕީނަޓްކޮޅު ވެސް އަޅާލާށެވެ. މިހާރު މިހުރީ ތައްޔާރުކޮށް ނިމިފައެވެ.