މި ސީޒަނަށްފަހު ފްލިކް ބަޔާން ދޫކޮށްލަނީ

މި ސީޒަނަށްފަހު ދުނިޔޭގެ ޗެމްޕިއަން ބަޔާން މިއުނިކް ދޫކޮށްލަން ނިންމާފައިވާ ކަމަށް އެ ޓީމުގެ ކޯޗު ހަންސީ ފްލިކް ބުނެފިއެވެ.

ރިޕޯޓުތައް ބުނާ ގޮތުން އުމުރުން 56 އަހަރުގެ ފްލިކް ބަޔާން ދޫކޮށްލަން ނިންމީ، މި އަހަރުގެ ޔޫރޯ ފުޓްބޯޅަ މުބާރާތަށްފަހު ޖަރުމަނުގެ ޤައުމީ ފުޓްބޯޅަ ޓީމާ ހަވާލުވުމަށެވެ. އެގޮތުން ޔޫރޯއަށްފަހު ޖަރުމަނުގެ ޤައުމީ ޓީމުގެ ކޯޗުކަން 14 އަހަރަށްފަހު ދޫކޮށްލަން ޔޮއަހިމް ލޯ މީގެ ކުރިން ވަނި ނިންމައި، އެކަން އިޢުލާން ކޮށްފައެވެ.

އެއާއެކު ޖަރުމަނުގެ ޤައުމީ ޓީމުން ވަނީ ފްލިކް ހޯދަން މަސައްކަތް ފަށާފައެވެ. ފްލިކަކީ 2014 ވަނަ އަހަރު ބްރެޒިލުގައި ބޭއްވި ފީފާ ވޯލްޑް ކަޕް ކާމިޔާބުކުރި ޖަރުމަން ޤައުމީ ޓީމުގެ އެސިސްޓަންޓް ކޯޗެވެ. އަދި ފްލިކް ވަނީ 2014 ވަނަ އަހަރުން ފެށިގެން 2017 ވަނަ އަހަރަށް ޖަރުމަން ފުޓްބޯޅަ ފެޑެރޭޝަނުގެ ސްޕޯޓިން ޑިރެކްޓަރެއްގެ ގޮތުގައި މަސައްކަތްކޮށްފައެވެ.

ޖަރުމަނުގެ ޓީމަކަށް ދިން އިންޓަވިއުއެއްގައި ފްލިކް ބުނީ މި ވަގުތަށް ނިންމާފައިވަނީ ބަޔާނާއެކު ހަދާފައިވާ އެއްބަސްވުން މި ސީޒަން ނިމުމުން އުވާލުމަށް ކަމަށެވެ. އެކަމަކު މުސްތަޤުބަލާ ބެހޭގޮތުން އަދި ވަކި ގޮތެއް ނުނިންމާ ކަމަށާއި، އެކަމަކު ޖަރުމަނުގެ ކޯޗުކަމަކީވެސް އޮތް ފުރުޞަތެއް ކަމަށް ފްލިކް ވަނީ ބުނެފައެވެ.

ބަޔާނުގެ އެއްބަސްވުން ފްލިކް އުވާލާއިރު، އެންމެ ފުރަތަމަ އޭނާ ބަޔާނާ ގުޅުނީ 2019 ވަނަ އަހަރުގެ ޖުލައި މަހު ކްރޮއޭޝިއާގެ ނިކޯ ކޮވަޗްގެ އެސިސްޓަންޓެއްގެ ގޮތުގައެވެ. އެކަމަކު އެ އަހަރުގެ ނޮވެމްބަރު ކުރީކޮޅުގައި ބަޔާނުގެ ކޯޗުކަމުން ކޮވަޗް ވަކިކޮށް، ޓީމު ވަގުތީ ގޮތުން ވަނީ ފްލިކާ ހަވާލުކޮށްފައެވެ. އަދި ފަހުން ބަޔާނުގެ ކޯޗުކަން ފްލިކާ ރަސްމީކޮށް ހަވާލުކުރިއިރު، މިދިޔަ އަހަރުގެ އޭޕްރީލް މަހުގެ ތެރޭގައި އޭނާ ވަނީ އެއްބަސްވުން އާކޮށްފައެވެ. އެހެންކަމުން ބަޔާނާއެކު ފްލިކް މިހާރު ހަދާފައިވާ އެއްބަސްވުން ހަމަވާނީ 2023 ވަނަ އަހަރުގެ ޖޫން މަހުއެވެ.

މި ސީޒަނަށްފަހު ފްލިލް ބަޔާން ދޫކޮށްލާއިރު، އޭނާ ވަނީ މަދު ދުވަސްކޮޅެއްގެ ތެރޭގައި ބަޔާނާއެކު ގިނަ ކާމިޔާބީތަކެއް ހޯދާފައެވެ. އެގޮތުން ބަޔާނާ ހަވާލުވުމަށްފަހު ފްލިކް ވަނީ އެ ޓީމުގެ ހާލަތު ބަދަލުކޮށް، ބަޔާނަށް މިދިޔަ ސީޒަނުގެ ޖަރުމަން ލީގާއި، ޖަރުމަން ކަޕް އަދި ޔުއެފާ ޗެމްޕިއަންސް ލީގު ހޯދައިދީފައެވެ. އަދި ފަހުން ޖަރުމަން ސުޕަ ކަޕާއި، ޔުއެފާ ސުޕަ ކަޕް އަދި ކުލަބު ވޯލްޑް ކަޕުވެސް ފްލިކް ވަނީ ހޯދައިދީފައެވެ.